തിരുവനന്തപുരം: കാട്ടാക്കടയിൽ വീടിനുള്ളിൽ പ്രസവിച്ച യുവതിയുടെ കുഞ്ഞ് മരിച്ച സംഭവത്തിൽ ദുരൂഹതയേറുന്നു. കുഞ്ഞിന്റെ മൃതദേഹത്തിൽ നിരവധി മുറിവുകൾ കണ്ടെത്തിയതിനെത്തുടർന്ന് ആശുപത്രി അധികൃതർ പോലീസിനെ വിവരമറിയിക്കുകയായിരുന്നു. 21 വയസ്സുകാരിയായ യുവതി പ്രസവിച്ച കുഞ്ഞാണ് മരിച്ചത്.(Newborn baby found dead, Wounds on body)
ഭാര്യ ഗർഭിണിയായിരുന്നു എന്ന വിവരം താൻ അറിഞ്ഞിരുന്നില്ലെന്നാണ് ഭർത്താവ് പോലീസിന് നൽകിയ പ്രാഥമിക മൊഴി. കഴിഞ്ഞ ദിവസം വീട്ടിലെത്തിയപ്പോൾ ഭാര്യ അതീവ അവശനിലയിലായിരുന്നു. കഠിനമായ വയറുവേദനയാണെന്ന് യുവതി പറഞ്ഞതിനെത്തുടർന്ന് ആശുപത്രിയിൽ പോകാനായി സാധനങ്ങൾ എടുക്കാൻ മുറിയിൽ കയറിയപ്പോഴാണ് രക്തക്കറ കണ്ടത്.
ബെഡ്ഷീറ്റിൽ പൊതിഞ്ഞ നിലയിലായിരുന്നു കുഞ്ഞ്. ഉടൻ തന്നെ കുഞ്ഞിനെയും ഭാര്യയെയും ആശുപത്രിയിൽ എത്തിച്ചെങ്കിലും കുഞ്ഞിന് ജീവനില്ലായിരുന്നു. ആശുപത്രിയിൽ എത്തിച്ചപ്പോൾ തന്നെ കുഞ്ഞിന് അനക്കമില്ലായിരുന്നുവെന്ന് ഡോക്ടർമാർ സ്ഥിരീകരിച്ചു. എന്നാൽ പരിശോധനയിൽ കുഞ്ഞിന്റെ ശരീരത്തിൽ അസ്വാഭാവികമായ മുറിവുകൾ കണ്ടെത്തിയത് സംശയത്തിനിടയാക്കി. ഇതോടെയാണ് പോലീസ് സ്ഥലത്തെത്തി അന്വേഷണം ആരംഭിച്ചത്. യുവതി നിലവിൽ ആശുപത്രിയിൽ ചികിത്സയിലാണ്.
