തിരുവനന്തപുരം: സ്കൂളുകളുടെ വേനലവധി ഒരു മാസം വെട്ടിക്കുറച്ചുവെന്ന വ്യാജപ്രചാരണത്തിനെതിരെ കർശന നടപടിയുമായി പൊതുവിദ്യാഭ്യാസ വകുപ്പ്. പൊതുവിദ്യാഭ്യാസ സെക്രട്ടറി ഇത് സംബന്ധിച്ച് സംസ്ഥാന പോലീസ് മേധാവിക്ക് പരാതി നൽകി.(Summer vacation has not been cut short, Department of General Education files complaint with DGP)
വിദ്യാഭ്യാസ സെക്രട്ടറിയുടെ പേരും വിലാസവും ഔദ്യോഗിക മുദ്രകളും ദുരുപയോഗം ചെയ്ത് വ്യാജ ഉത്തരവ് നിർമ്മിച്ചാണ് സോഷ്യൽ മീഡിയയിലൂടെ പ്രചാരണം നടന്നത്. അധ്യാപകരിലും വിദ്യാർത്ഥികളിലും പരിഭ്രാന്തിയുണ്ടാക്കാനും സർക്കാരിനെതിരെ തെറ്റായ സന്ദേശം നൽകാനും ബോധപൂർവ്വമായ ശ്രമം നടന്നതായാണ് പരാതിയിൽ പറയുന്നത്.
നിലവിലെ അവധി ക്രമീകരണങ്ങളിൽ യാതൊരു മാറ്റവുമുണ്ടാകില്ലെന്നും വേനലവധി പതിവുപോലെ തുടരുമെന്നും വിദ്യാഭ്യാസ വകുപ്പ് ഔദ്യോഗികമായി അറിയിച്ചു. പരിഭ്രാന്തി പരത്താൻ ശ്രമിച്ചവർക്കെതിരെ നടപടി എടുക്കണമെന്നാണ് ആവശ്യം.
