തിരുവനന്തപുരം: കേരള നിയമസഭാ തെരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കാൻ ഇനി ഒരു ദിവസം കൂടി മാത്രം ബാക്കി. അവധി ദിനമായ ഇന്ന് കഴിഞ്ഞ്, തിങ്കളാഴ്ച വൈകുന്നേരത്തോടെ പത്രികാ സമർപ്പണത്തിനുള്ള സമയം അവസാനിക്കും. ഏപ്രിൽ 9-ന് നടക്കുന്ന വോട്ടെടുപ്പിന് മുന്നോടിയായി പ്രമുഖ മുന്നണികളുടെ സ്ഥാനാർത്ഥികളെല്ലാം നാളെ പത്രിക സമർപ്പിക്കാനുള്ള ഒരുക്കത്തിലാണ്.(Assembly elections, One more day for filing nominations tomorrow)
മാർച്ച് 15-ന് തെരഞ്ഞെടുപ്പ് പ്രഖ്യാപിച്ചതിന് പിന്നാലെ വളരെ കുറഞ്ഞ സമയം മാത്രമാണ് സ്ഥാനാർത്ഥികൾക്ക് പത്രിക നൽകാൻ ലഭിച്ചത്. സൂക്ഷ്മ പരിശോധന മാർച്ച് 24നും, പത്രിക പിൻവലിക്കാനുള്ള അവസാന ദിവസം മാർച്ച് 26മാണ്. വോട്ടർ പട്ടികയിൽ ഇതുവരെ പേര് ചേർത്തിട്ടില്ലാത്തവർക്ക് അതിനായി ലഭിക്കുന്ന അവസാന അവസരവും നാളെയാണ്. നാമനിർദ്ദേശ പത്രിക സമർപ്പിക്കുന്ന ദിവസം വരെയാണ് പുതിയ വോട്ടർമാർക്ക് അപേക്ഷിക്കാൻ തിരഞ്ഞെടുപ്പ് കമ്മീഷൻ സമയം അനുവദിച്ചിരിക്കുന്നത്. 18 വയസ്സ് തികഞ്ഞവർക്ക് ‘വോട്ടർ ഹെൽപ്പ് ലൈൻ’ ആപ്പ് വഴിയോ തിരഞ്ഞെടുപ്പ് കമ്മീഷന്റെ വെബ്സൈറ്റ് വഴിയോ ഇന്ന് തന്നെ അപേക്ഷിക്കാവുന്നതാണ്.
തിരുവനന്തപുരം സെൻട്രൽ, മലപ്പുറം എന്നിവിടങ്ങളിലടക്കം അവസാനഘട്ട സ്ഥാനാർത്ഥികളെ പ്രഖ്യാപിച്ചതോടെ എൽഡിഎഫ് പ്രചാരണത്തിൽ സജീവമായി. സീറ്റ് വിഭജനവും സ്ഥാനാർത്ഥി നിർണ്ണയവും പൂർത്തിയാക്കി യുഡിഎഫ് കളത്തിലിറങ്ങിക്കഴിഞ്ഞു. ബിജെപിയുടെ മൂന്നാം സ്ഥാനാർത്ഥി പട്ടിക കൂടി പുറത്തുവന്നതോടെ എൻഡിഎ ക്യാമ്പുകളും സജീവമാണ്.
