കൊച്ചി: കഴിഞ്ഞ ദിവസം ഇടിവ് രേഖപ്പെടുത്തിയ സ്വർണ്ണവില സംസ്ഥാനത്ത് ഇന്ന് വീണ്ടും വർദ്ധിച്ചു. പവന് 400 രൂപ വർദ്ധിച്ച് 1,18,480 രൂപയിലാണ് ഇന്ന് വ്യാപാരം നടക്കുന്നത്. ഗ്രാമിന് 50 രൂപ വർദ്ധിച്ച് 14,810 രൂപയായി. ഇന്നലെ രണ്ടു തവണയായി 640 രൂപ കുറഞ്ഞതിന് പിന്നാലെയാണ് ഇന്ന് വില തിരിച്ചുകയറിയത്.(Kerala Gold price hiked by RS 400)
സംസ്ഥാനത്തെ സ്വർണ്ണവിപണിയിൽ ഈ മാസം വലിയ തോതിലുള്ള വില വ്യതിയാനമാണ് പ്രകടമാകുന്നത്. കഴിഞ്ഞ ദിവസം ഒറ്റയടിക്ക് 1120 രൂപ വർദ്ധിച്ചതോടെയാണ് വില വീണ്ടും 1,18,000 കടന്നത്. ഈ മാസത്തെ ഏറ്റവും ഉയർന്ന നിരക്ക് ബുധനാഴ്ച രേഖപ്പെടുത്തിയ 1,18,720 രൂപയാണ്. ഫെബ്രുവരി രണ്ടിന് രേഖപ്പെടുത്തിയ 1,07,920 രൂപയാണ് ഈ മാസത്തെ ഏറ്റവും താഴ്ന്ന നിലവാരം.
സ്വർണ്ണവിലയിലെ എക്കാലത്തെയും ഉയർന്ന റെക്കോർഡ് ജനുവരി 29-ന് രേഖപ്പെടുത്തിയ 1,31,160 രൂപയാണ്. കഴിഞ്ഞ ഡിസംബർ 23-നാണ് പവൻ വില ആദ്യമായി ഒരു ലക്ഷം കടന്നത്. ആഗോള വിപണിയിലെ സാമ്പത്തിക സാഹചര്യങ്ങൾ, ഡോളറിന്റെ മൂല്യത്തിലുണ്ടാകുന്ന മാറ്റങ്ങൾ എന്നിവയാണ് പ്രാദേശിക വിപണിയിലും പ്രതിഫലിക്കുന്നത്. വരും ദിവസങ്ങളിലും വിലയിൽ ചാഞ്ചാട്ടം തുടരാനാണ് സാധ്യതയെന്ന് വിപണി വിദഗ്ധർ വിലയിരുത്തുന്നു.
