കൊൽക്കത്ത: പശ്ചിമ ബംഗാളിൽ ഒന്നാം ഘട്ട വോട്ടെടുപ്പ് പുരോഗമിക്കവെ, തങ്ങളുടെ പ്രശസ്തമായ “മാ, മാട്ടി, മനുഷ്” (അമ്മ, മണ്ണ്, മനുഷ്യൻ) എന്ന മുദ്രാവാക്യം ഉയർത്തി വോട്ടർമാരെ സമീപിച്ച് തൃണമൂൽ കോൺഗ്രസ്. ഭയരഹിതമായി സമ്മതിദാനാവകാശം വിനിയോഗിക്കണമെന്ന് പാർട്ടി ജനങ്ങളോട് അഭ്യർത്ഥിച്ചു.(Vote For Maa, Mati, Manush, TMC appeals to voters )
സോഷ്യൽ മീഡിയ പ്ലാറ്റ്ഫോമായ എക്സിലൂടെയാണ് തൃണമൂൽ കോൺഗ്രസ് വോട്ടർമാർക്കായി സന്ദേശം പങ്കുവെച്ചത്. “ബംഗാളിൽ ഒന്നാം ഘട്ട വോട്ടെടുപ്പ് നടക്കുകയാണ്. ഓരോ വോട്ടറും തങ്ങളുടെ ജനാധിപത്യപരമായ അവകാശം സ്വതന്ത്രമായും നിഷ്പക്ഷമായും ഭയമില്ലാതെയും വിനിയോഗിക്കണമെന്ന് ഞങ്ങൾ ആഹ്വാനം ചെയ്യുന്നു. തലയുയർത്തിപ്പിടിച്ച് ബൂത്തുകളിലേക്ക് കടന്നുചെല്ലുക. നമ്മുടെ ‘അമ്മ’യെ (മാ) ആദരിക്കാൻ വോട്ട് ചെയ്യുക. നമ്മുടെ ‘മണ്ണിനെ’ (മാതി) പ്രതിരോധിക്കാൻ വോട്ട് ചെയ്യുക. നമ്മുടെ ‘മനുഷ്യരെ’ (മാനുഷ്) സംരക്ഷിക്കാൻ വോട്ട് ചെയ്യുക.”
സ്വയംപര്യാപ്ത ബംഗാളിലെ വികസന കുതിപ്പ് നിലനിർത്താൻ വോട്ട് ചെയ്യുക. ഓരോ വ്യക്തിയുടെയും അവകാശങ്ങൾ സംരക്ഷിക്കപ്പെടുന്നതിനായി വോട്ട് രേഖപ്പെടുത്തുക. ബംഗാൾ വിരുദ്ധരായ പുറത്തുനിന്നുള്ള ജന്മികൾ വർഷങ്ങളായി നടത്തുന്ന അവഗണനയ്ക്കും പീഡനത്തിനും ചൂഷണത്തിനും നിർണ്ണായകമായ മറുപടി നൽകാൻ വോട്ട് ഉപയോഗിക്കുക.നിങ്ങളുടെ വോട്ടവകാശം കവർന്നെടുക്കാൻ ഗൂഢാലോചന നടത്തുന്നവർക്ക് തകർപ്പൻ മറുപടി നൽകാൻ ഈ അധികാരം വിനിയോഗിക്കുക. നിങ്ങളുടെ വോട്ടാണ് നിങ്ങളുടെ ശബ്ദമെന്നും പാർട്ടിയുടെ പോസ്റ്റിൽ വ്യക്തമാക്കുന്നു.
