ചെന്നൈ: തമിഴ്നാട് നിയമസഭാ തിരഞ്ഞെടുപ്പിനുള്ള ബിജെപിയുടെ പ്രകടനപത്രിക ഇന്ന് പുറത്തിറക്കും. ചെന്നൈയിലെ സ്വകാര്യ ഹോട്ടലിൽ രാവിലെ 11:30-ന് നടക്കുന്ന ചടങ്ങിൽ ബിജെപി ദേശീയ അധ്യക്ഷൻ ജെ.പി. നദ്ദ, കേന്ദ്രമന്ത്രി പിയൂഷ് ഗോയൽ എന്നിവർ ചേർന്നാണ് പ്രകടനപത്രിക പ്രകാശനം ചെയ്യുന്നത്. എൻഡിഎ സഖ്യത്തിന്റെ ഭാഗമായി തമിഴ്നാട്ടിൽ 27 സീറ്റുകളിലാണ് ബിജെപി മത്സരിക്കുന്നത്.(Tamil Nadu Assembly Elections, BJP to release manifesto today)
തിരഞ്ഞെടുപ്പ് ആവേശത്തിലേക്ക് കടന്നതോടെ പ്രധാന രാഷ്ട്രീയ കക്ഷികളെല്ലാം ഇന്ന് സംസ്ഥാനത്തിന്റെ വിവിധ ഭാഗങ്ങളിൽ പ്രചാരണത്തിലാണ്. മുഖ്യമന്ത്രി എം.കെ. സ്റ്റാലിൻ ഇന്ന് വെല്ലൂർ, തിരുപ്പത്തൂർ ജില്ലകളിലെ പൊതുസമ്മേളനങ്ങളെ അഭിസംബോധന ചെയ്യും. എടപ്പാടി പളനിസാമി തിരുച്ചിറപ്പള്ളി, ദിണ്ഡിഗൽ ജില്ലകളിൽ പ്രചാരണം നടത്തും. ഡി. രാജ ഇന്ന് ചെന്നൈ നഗരത്തിലെ വിവിധയിടങ്ങളിൽ പ്രചാരണ യോഗങ്ങളിൽ പങ്കെടുക്കും.
ചെന്നൈയിലെ പെരമ്പൂർ മണ്ഡലം സംസ്ഥാന ശ്രദ്ധാകേന്ദ്രമായി മാറിയിരിക്കുകയാണ്. നടൻ വിജയ്യുടെ പാർട്ടിയായ തമിഴക വെട്രി കഴകം ഇവിടെ കടുത്ത വെല്ലുവിളിയാണ് ഉയർത്തുന്നത്. വിജയ് നേരിട്ടാണ് ഇവിടെ മത്സരിക്കുന്നത്. സിറ്റിംഗ് എംഎൽഎയായ ആർ.ഡി. ശേഖർ ന്യൂനപക്ഷ വോട്ടുകളുടെ ഏകീകരണത്തിലും സ്റ്റാലിൻ സർക്കാരിന്റെ ക്ഷേമപദ്ധതികളിലുമാണ് പ്രതീക്ഷ അർപ്പിക്കുന്നത്. മണ്ഡലത്തിൽ വിജയ് മൂന്നാം സ്ഥാനത്തേക്ക് പിന്തള്ളപ്പെടുമെന്ന് അദ്ദേഹം അവകാശപ്പെട്ടു.
