ചെന്നൈ: തമിഴ്നാട് നിയമസഭാ തിരഞ്ഞെടുപ്പിൽ ഏറ്റവും വലിയ ഒറ്റകക്ഷിയായി മാറിയ തമിഴക വെട്രി കഴകത്തെ (TVK) സർക്കാർ രൂപീകരിക്കാൻ ക്ഷണിക്കാത്ത ഗവർണറുടെ നടപടിക്കെതിരെ ചലച്ചിത്ര ലോകത്തുനിന്ന് ശക്തമായ പ്രതിഷേധം. കമൽ ഹാസൻ, വിശാൽ, ഖുശ്ബു സുന്ദർ തുടങ്ങിയ പ്രമുഖർ വിജയിന് പിന്തുണ പ്രഖ്യാപിച്ചുകൊണ്ട് രംഗത്തെത്തി.(Tamil Cinema Stars Support Vijay Against Governors Decision On Government Formation)
“ജനവിധി മാനിക്കപ്പെടണം” എന്ന തലക്കെട്ടോടെ എക്സിൽ (X) പങ്കുവെച്ച കുറിപ്പിൽ ഗവർണറുടെ നടപടിയെ കമൽ ഹാസൻ രൂക്ഷമായി വിമർശിച്ചു. 108 സീറ്റുകൾ നേടി ഏറ്റവും വലിയ ഒറ്റകക്ഷിയായ വിജയിനെ സർക്കാർ രൂപീകരിക്കാൻ ക്ഷണിക്കാത്തത് തമിഴ്നാട്ടിലെ ജനങ്ങളെ അപമാനിക്കുന്നതിന് തുല്യമാണെന്ന് അദ്ദേഹം പറഞ്ഞു. ഭൂരിപക്ഷം തെളിയിക്കേണ്ടത് ലോക്ഭവനല്ല, നിയമസഭയിലാണെന്ന എസ്.ആർ. ബൊമ്മൈ കേസ് വിധി അദ്ദേഹം ഓർമ്മിപ്പിച്ചു. ഉത്തരവാദിത്തമുള്ള പ്രതിപക്ഷമായി ഇരിക്കുമെന്ന് പ്രഖ്യാപിച്ച എം.കെ. സ്റ്റാലിന്റെ രാഷ്ട്രീയ പക്വതയെ പ്രശംസിച്ച കമൽ ഹാസൻ, ഗവർണറും സമാനമായ ഭരണഘടനാ പക്വത കാണിക്കണമെന്ന് ആവശ്യപ്പെട്ടു.
ഡിഎംകെയും എഐഎഡിഎംകെയും ചേർന്ന് സർക്കാർ രൂപീകരിക്കാൻ ശ്രമിച്ചാൽ അത് വലിയ ദുരന്തമായിരിക്കുമെന്ന് നടൻ വിശാൽ മുന്നറിയിപ്പ് നൽകി. അത്തരമൊരു സഖ്യം ജനങ്ങൾ അംഗീകരിക്കില്ലെന്നും അത് തമിഴ്നാട് രാഷ്ട്രീയത്തിൽ ഗുരുതരമായ പ്രത്യാഘാതങ്ങൾ ഉണ്ടാക്കുമെന്നും അദ്ദേഹം പറഞ്ഞു. രാഷ്ട്രീയമായ വിയോജിപ്പുകൾ മാറ്റിവെച്ച് ബിജെപി നേതാവ് കൂടിയായ ഖുശ്ബു സുന്ദറും വിജയിനെ പിന്തുണച്ചു. തമിഴ്നാട്ടിലെ ജനങ്ങൾ ഒരു മുഖ്യമന്ത്രിയെ തിരഞ്ഞെടുത്താൽ അദ്ദേഹത്തെ ഭരിക്കാൻ അനുവദിക്കണമെന്നും വിജയ് തന്നെ സംസ്ഥാനത്തെ നയിക്കണമെന്നും ഖുശ്ബു വ്യക്തമാക്കി.
തമിഴ്നാട് നിയമസഭയിലെ 234 സീറ്റുകളിൽ 108 എണ്ണവും വിജയിച്ച ടിവികെ, പതിറ്റാണ്ടുകൾ നീണ്ട ദ്രാവിഡ പാർട്ടികളുടെ ആധിപത്യത്തിനാണ് അന്ത്യം കുറിച്ചത്. മെയ് 6-ന് ഗവർണറെ കണ്ട് വിജയ് അവകാശവാദം ഉന്നയിച്ചിരുന്നെങ്കിലും 118 പേരുടെ പിന്തുണക്കത്തുകൾ ഇല്ലാതെ സർക്കാർ രൂപീകരിക്കാൻ അനുവദിക്കില്ലെന്ന നിലപാടിലാണ് ലോക്ഭവൻ.
Story Summary
Prominent film industry figures like Kamal Haasan, Vishal, and Khushbu Sundar have extended their support to Vijay amid the ongoing government formation crisis in Tamil Nadu. They urged the Governor to respect the mandate and invite the single largest party, TVK, to prove its majority in the assembly.
