ജനീവ: നിലവിൽ റിപ്പോർട്ട് ചെയ്യപ്പെട്ട ഹന്റാവൈറസ് വ്യാപനം കോവിഡ്-19 പോലെയോ ഇൻഫ്ലുവൻസ പോലെയോ ഉള്ള ഒരു ആഗോള മഹാമാരിയായി മാറാൻ സാധ്യതയില്ലെന്ന് ലോകാരോഗ്യ സംഘടന ( WHO on Hantavirus). കപ്പലിലെ യാത്രക്കാർക്കിടയിൽ റിപ്പോർട്ട് ചെയ്ത വൈറസ് ബാധയെക്കുറിച്ച് വിശദീകരിക്കവേയാണ് ഡബ്ല്യു.എച്ച്.ഒ എപ്പിഡമിക് ആൻഡ് പാൻഡമിക് മാനേജ്മെന്റ് ഡയറക്ടർ ഡോ. മരിയ വാൻ കെർഖോവ് ഈ ഉറപ്പ് നൽകിയത്.
ഹന്റാവൈറസ് വ്യാപനത്തെക്കുറിച്ചുള്ള പ്രധാന വിവരങ്ങൾ:
- വ്യാപന രീതി: കോവിഡ് വായുവിലൂടെ അതിവേഗം പടരുമെങ്കിൽ, ഹന്റാവൈറസ് പ്രധാനമായും എലികളിൽ നിന്നാണ് മനുഷ്യരിലേക്ക് പടരുന്നത്. മനുഷ്യരിൽ നിന്ന് മനുഷ്യരിലേക്ക് വൈറസ് പടരുന്നത് വളരെ അപൂർവ്വമാണ്. ‘ആൻഡീസ്’സ്ട്രെയിൻ ബാധിച്ചാൽ മാത്രമേ മനുഷ്യരിൽ നിന്ന് മനുഷ്യരിലേക്ക് പടരാൻ സാധ്യതയുള്ളൂ. അതിന് തന്നെ രോഗബാധിതരുമായി ദീർഘനേരം അടുത്ത സമ്പർക്കം പുലർത്തേണ്ടതുണ്ട്.
- കോവിഡുമായുള്ള വ്യത്യാസം: കോവിഡ് പോലെ ഒരു മുറിയിലുള്ള എല്ലാവരിലേക്കും ഈ വൈറസ് പടരില്ല. അതിനാൽ തന്നെ ഇതൊരു വലിയ പകർച്ചവ്യാധിയായി മാറാൻ സാധ്യത കുറവാണ്. എന്നാൽ വ്യക്തിഗത അടിസ്ഥാനത്തിൽ പരിശോധിച്ചാൽ കോവിഡിനേക്കാൾ മാരകമാണ് ഹന്റാവൈറസ്.
- ഭീതി വേണ്ട: ഇത് കോവിഡ് മഹാമാരിയുടെ തുടക്കമല്ലെന്നും ഒരു നിശ്ചിത പ്രദേശത്തോ സാഹചര്യത്തിലോ മാത്രം ഒതുങ്ങിനിൽക്കുന്ന വ്യാപനമാണെന്നും ഡോ. മരിയ വ്യക്തമാക്കി. സമ്പർക്കപ്പട്ടിക തയ്യാറാക്കിയും രോഗബാധിതരെ മാറ്റിപ്പാർപ്പിച്ചും ഈ വ്യാപന ശൃംഖല തകർക്കാൻ സാധിക്കും.
കപ്പലിലെ വ്യാപനം ആൻഡീസ് സ്ട്രെയിൻ മൂലമാണെന്ന് സ്ഥിരീകരിച്ചിട്ടുണ്ട്. ഈ വൈറസിന്റെ ഇൻകുബേഷൻ പിരീഡ് (രോഗലക്ഷണം കാണിക്കാനെടുക്കുന്ന സമയം) ആറ് ആഴ്ച വരെയായതിനാൽ കൂടുതൽ കേസുകൾ റിപ്പോർട്ട് ചെയ്തേക്കാം. എങ്കിലും പൊതുജനാരോഗ്യത്തിനുള്ള ഭീഷണി കുറവാണെന്നാണ് ലോകാരോഗ്യ സംഘടനയുടെ വിലയിരുത്തൽ.
Summary: The World Health Organization (WHO) has clarified that the current hantavirus outbreak is not like COVID-19 or influenza and is unlikely to become a pandemic. Dr. Maria Van Kerkhove emphasized that hantavirus spreads differently, primarily through rodents, and human-to-human transmission is extremely rare, requiring prolonged close contact. While the virus can be deadlier on a case-by-case basis, the overall public health risk remains low as officials work to break the chain of transmission.
