വിയറ്റ്നാമിലെ ഫു ക്വോക്ക് ദ്വീപിന് സമീപം നടന്ന ബോട്ട് അപകടം അവിശ്വസനീയമായ ദുരന്തമെന്ന് ലാവ മൊബൈൽസ് അധികൃതർ. കമ്പനിയുടെ ബിസിനസ് ടാർഗറ്റ് കൈവരിച്ച ജീവനക്കാർക്കും വിതരണക്കാർക്കുമായി സംഘടിപ്പിച്ച വിദേശയാത്രയ്ക്കിടെയാണ് 15 ഇന്ത്യൻ വിനോദസഞ്ചാരികളുടെ ദാരുണാന്ത്യം ഉണ്ടായത് (Vietnam Boat Accident). മരിച്ചവരിൽ കൊട്ടാരക്കര സ്വദേശികളായ എ.സി. തോമസും ഭാര്യ ലോവിന തോമസും ഉൾപ്പെടുന്നു. തമിഴ്നാട്, ആന്ധ്രാപ്രദേശ് സ്വദേശികളാണ് മറ്റ് മരണപ്പെട്ടവർ.
ഏകദേശം 36 പേരാണ് അപകടത്തിൽപ്പെട്ട സ്പീഡ് ബോട്ടിലുണ്ടായിരുന്നത്. യാത്ര തുടങ്ങി വെറും മൂന്ന് മിനിറ്റിനുള്ളിൽ തന്നെ ശക്തമായ തിരമാലകൾ അടിച്ചതിനെത്തുടർന്ന് ബോട്ട് തലകീഴായി മറിയുകയായിരുന്നു. ബോട്ടിന്റെ പിറകുവശത്ത് ഇരുന്നവരാണ് അപകടത്തിൽ പെട്ടവരിൽ ഭൂരിഭാഗവും. അപകടസമയത്ത് ബോട്ട് ക്ലോസ്ഡ് ആയിരുന്നുവെന്നും, അതിനാൽ രക്ഷപ്പെടാൻ കൂടുതൽ ബുദ്ധിമുട്ടായിരുന്നുവെന്നും അപകടത്തിൽ നിന്ന് രക്ഷപ്പെട്ട ലാവ മൊബൈൽസ് ജീവനക്കാരൻ നിർമൽ കുമാർ വ്യക്തമാക്കി.
സംഭവത്തിൽ ലാവ മൊബൈൽസ് അധികൃതർ അതീവ ദുഃഖം രേഖപ്പെടുത്തി. മരിച്ചവരുടെ കുടുംബങ്ങളുടെ ദുഃഖത്തിൽ പങ്കുചേരുന്നതായും അവർക്ക് ആവശ്യമായ എല്ലാ പിന്തുണയും കമ്പനിയുടെ ഭാഗത്തുനിന്ന് ഉണ്ടാകുമെന്നും അധികൃതർ അറിയിച്ചു. മൃതദേഹങ്ങൾ എത്രയും വേഗത്തിൽ നാട്ടിലെത്തിക്കുന്നതിനായി വിയറ്റ്നാമിലെ ഇന്ത്യൻ എംബസിയുമായി ചേർന്ന് കമ്പനി അടിയന്തര പ്രവർത്തനങ്ങൾ നടത്തിവരികയാണ്. എം.പി അടക്കമുള്ളവരുടെ ഇടപെടലിലൂടെ മൃതദേഹങ്ങൾ നാട്ടിലെത്തിക്കാനുള്ള നടപടികൾ ഊർജിതമാക്കിയിട്ടുണ്ട്.
Summary: The tragic boat accident near Phu Quoc Island in Vietnam, which claimed 15 Indian lives including a Kerala couple, was an official incentive trip organized by Lava Mobiles for its employees and distributors. Survivors recounted that the closed-cabin speed boat capsized within three minutes of departure due to strong waves; Lava Mobiles has expressed deep grief and is currently coordinating with the Indian Embassy to repatriate the deceased.
