ജനീവ: അന്താരാഷ്ട്ര തലത്തിൽ വിവിധ രാജ്യങ്ങൾ വിദേശ സഹായങ്ങൾക്കുള്ള ഫണ്ട് വെട്ടിക്കുറച്ചതിനെ തുടർന്ന് കഴിഞ്ഞ 18 മാസത്തിനിടെ ലോകത്താകമാനമുള്ള പത്ത് ലക്ഷത്തിലധികം സ്ത്രീകൾക്കും പെൺകുട്ടികൾക്കും അടിയന്തിര മാനുഷിക സഹായങ്ങളും സുരക്ഷയും നഷ്ടമായതായി ഐക്യരാഷ്ട്ര സംഘടന. സ്ത്രീകളുടെ ക്ഷേമത്തിനായി പ്രവർത്തിക്കുന്ന യുഎൻ ഏജൻസിയായ ‘യുഎൻ വുമൺ’ വെള്ളിയാഴ്ച പുറത്തുവിട്ട പുതിയ റിപ്പോർട്ടിലാണ് ഈ ഞെട്ടിക്കുന്ന വിവരങ്ങളുള്ളത്.(UN Women Report One Million Women Lose Humanitarian Aid Due To Global Funding Slashes)
ഐക്യരാഷ്ട്ര സംഘടനയ്ക്ക് ഏറ്റവും കൂടുതൽ ഫണ്ട് നൽകുന്ന അമേരിക്കയിൽ, 2025 ജനുവരിയിൽ ട്രംപ് ഭരണകൂടം അധികാരമേറ്റെടുത്തതിന് പിന്നാലെ വിദേശ സഹായ ഫണ്ടുകളിൽ വലിയ വെട്ടിക്കുറയ്ക്കൽ വരുത്തിയിരുന്നു. ഇത് കൂടാതെ മറ്റ് ചില പ്രമുഖ വികസിത രാജ്യങ്ങളും തങ്ങളുടെ ആഭ്യന്തര സാമ്പത്തിക പ്രതിസന്ധികളും പ്രതിരോധ ചെലവുകൾ വർദ്ധിച്ചതും ചൂണ്ടിക്കാട്ടി സഹായ ധനം കുറച്ചു. ഈ സാമ്പത്തിക പ്രതിസന്ധി ദുരിതാശ്വാസ മേഖലയെ എങ്ങനെ ബാധിച്ചുവെന്ന് പഠിക്കാൻ 52 രാജ്യങ്ങളിലെ 855 വനിതാ സംഘടനകളിൽ യുഎൻ വുമൺ സർവ്വേ നടത്തിയിരുന്നു.
ഇതിൽ 84 ശതമാനം സംഘടനകളും 2025 ജനുവരിക്ക് ശേഷം തങ്ങളുടെ സഹായം തേടിയെത്തുന്ന സ്ത്രീകളുടെ എണ്ണത്തിൽ വലിയ വർദ്ധനവുണ്ടായതായി രേഖപ്പെടുത്തി. എന്നാൽ ഫണ്ടില്ലാത്തതിനാൽ ഇവരിൽ 90 ശതമാനം സംഘടനകൾക്കും ആവശ്യക്കാർക്ക് കൃത്യമായ സഹായം നൽകാൻ സാധിക്കുന്നില്ല. യുദ്ധങ്ങളിലും ആഭ്യന്തര കലാപങ്ങളിലും ലൈംഗിക അതിക്രമങ്ങൾക്ക് ഇരയായവർ, പലായനം ചെയ്യേണ്ടി വന്ന അമ്മമാർ, പഠനം മുടങ്ങിയ പെൺകുട്ടികൾ എന്നിവർക്കെല്ലാം ഈ ഫണ്ട് കുറയ്ക്കൽ വലിയ തിരിച്ചടിയായെന്ന് യുഎൻ വുമണിന്റെ ഹ്യുമാനിറ്റേറിയൻ ആക്ഷൻ ചീഫ് പറഞ്ഞു.
വനിതാ സംഘടനകൾക്കായി നീക്കിവെക്കുന്ന ഓരോ ഡോളർ കുറയ്ക്കുമ്പോഴും അത് ബാധിക്കുന്നത് സമൂഹത്തിൽ ഏറ്റവും ദുരിതമനുഭവിക്കുന്ന സ്ത്രീകളെയാണ്. ഫണ്ട് പ്രതിസന്ധി മൂലം സർവ്വേയിൽ പങ്കെടുത്ത അഞ്ചിൽ ഒരു സംഘടന അടുത്ത ഒരു വർഷത്തിനുള്ളിൽ തങ്ങളുടെ പ്രവർത്തനം താൽക്കാലികമായോ സ്ഥിരമായോ നിർത്തേണ്ടി വരുമെന്ന ആശങ്കയിലാണ്. അഫ്ഗാനിസ്ഥാൻ, ഡെമോക്രാറ്റിക് റിപ്പബ്ലിക് ഓഫ് കോംഗോ, ഹെയ്തി തുടങ്ങിയ സംഘർഷഭരിതമായ രാജ്യങ്ങളിലെ സ്ത്രീകളെയാണ് ഈ തീരുമാനം ഏറ്റവും മാരകമായി ബാധിച്ചിരിക്കുന്നത്.
Story Summary
According to a new UN Women report, at least 1 million women and girls globally have lost access to critical humanitarian aid due to international budget cuts over the past 18 months. The crisis deepened after the US Trump administration and other major donors slashed billions in foreign aid starting January 2025. Consequently, nearly 90% of surveyed women’s organizations can no longer meet rising demands, and 40% are at risk of shutting down within the next year, leaving survivors of conflict-related violence and displaced mothers highly vulnerable.
