മോസ്കോ: യുക്രൈനിലെ റഷ്യൻ നിയന്ത്രിത കിഴക്കൻ ലുഹാൻസ്ക് മേഖലയിലുണ്ടായ യുക്രൈൻ ഡ്രോൺ ആക്രമണത്തിൽ നാല് പേർ കൊല്ലപ്പെടുകയും 35 കുട്ടികൾക്ക് പരിക്കേൽക്കുകയും ചെയ്തതായി റഷ്യൻ അധികൃതർ വ്യക്തമാക്കി (Ukrainian Drone Attack Luhansk Region). ലുഹാൻസ്ക് പെഡഗോഗിക്കൽ യൂണിവേഴ്സിറ്റിയുടെ സ്റ്റാരോബിൽസ്ക് കോളേജ് ഹോസ്റ്റലിന് നേരെയാണ് ഒറ്റരാത്രികൊണ്ട് യുക്രൈൻ ഡ്രോൺ ആക്രമണം നടത്തിയത്. ആക്രമണം നടക്കുമ്പോൾ 14-നും 18-നും ഇടയിൽ പ്രായമുള്ള 86 കൗമാരക്കാരായ വിദ്യാർത്ഥികൾ ഹോസ്റ്റലിനുള്ളിൽ ഉറങ്ങിക്കിടക്കുകയായിരുന്നുവെന്ന് റഷ്യൻ മനുഷ്യാവകാശ കമ്മീഷണർ യാന ലാൻട്രാറ്റോവ പ്രസ്താവനയിലൂടെ അറിയിച്ചു. ഉറങ്ങിക്കിടന്ന കുട്ടികളെ ലക്ഷ്യമിട്ടാണ് യുക്രൈൻ സായുധ സേന ഈ ആക്രമണം നടത്തിയതെന്നും അവർ ആരോപിച്ചു.
കെട്ടിടാവശിഷ്ടങ്ങൾക്കിടയിൽ നിന്ന് രണ്ട് പേരെ രക്ഷപ്പെടുത്തിയതായും തകർന്ന അവശിഷ്ടങ്ങൾക്കടിയിൽ കൂടുതൽ കുട്ടികൾ കുടുങ്ങിക്കിടക്കുന്നുണ്ടോ എന്ന് കണ്ടെത്താൻ രക്ഷാപ്രവർത്തകർ തിരച്ചിൽ തുടരുകയാണെന്നും ലുഹാൻസ്കിലെ റഷ്യൻ അനുകൂല ഗവർണർ ലിയോണിഡ് പസെച്നിക് അറിയിച്ചു. ആക്രമണത്തിൽ കെട്ടിടം ഭാഗികമായി തകരുകയും വലിയ രീതിയിൽ തീപിടുത്തമുണ്ടാകുകയും ചെയ്തു. എന്നാൽ ഈ സംഭവത്തെക്കുറിച്ച് യുക്രൈന്റെ ഭാഗത്തുനിന്ന് ഔദ്യോഗിക പ്രതികരണങ്ങളൊന്നും ലഭ്യമായിട്ടില്ലെന്നും സ്വതന്ത്രമായ രീതിയിൽ ഈ വാർത്ത സ്ഥിരീകരിക്കാൻ കഴിഞ്ഞിട്ടില്ലെന്നും വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു. 2022-ൽ റഷ്യ തങ്ങളുടെ രാജ്യത്തോട് ഏകപക്ഷീയമായി ചേർത്ത ലുഹാൻസ്ക് ഉൾപ്പെടെയുള്ള നാല് മേഖലകൾ തിരിച്ചുപിടിക്കാനുള്ള ശക്തമായ പോരാട്ടത്തിലാണ് നിലവിൽ യുക്രൈൻ.
Summary: At least four people were killed and 35 children wounded following an overnight Ukrainian drone attack on a student dormitory in the Russian-controlled Luhansk region of eastern Ukraine. According to Russian Human Rights Commissioner Yana Lantratova, 86 teenagers aged between 14 and 18 were sleeping inside the Starobilsk College of Luhansk Pedagogical University when the targeted strike occurred.
