തായ്ലൻഡിലെ മുക്ദാഹാൻ പ്രവിശ്യയിൽ തീർത്ഥാടനത്തിനിടെ നടന്ന വാഹനാപകടത്തിൽ ഒൻപത് ബുദ്ധ സന്യാസിമാർ കൊല്ലപ്പെട്ടു. 11 വയസ്സുള്ള ആൺകുട്ടി മാതാപിതാക്കളുടെ പിക്കപ്പ് ട്രക്ക് അനുവാദമില്ലാതെ ഓടിച്ചതാണ് അപകടത്തിന് കാരണമായതെന്ന് പോലീസ് അറിയിച്ചു (Thailand Monks Killed Accident). തീർത്ഥാടനത്തിന്റെ ഭാഗമായി റോഡിലൂടെ നടന്നുപോവുകയായിരുന്ന 35 സന്യാസിമാരും അഞ്ച് അനുയായികളും അടങ്ങുന്ന സംഘത്തിലേക്കാണ് ട്രക്ക് നിയന്ത്രണം വിട്ട് ഇടിച്ചുകയറിയത്.
അപകടസ്ഥലത്ത് നിന്നും പുറത്തുവന്ന ദൃശ്യങ്ങൾ അങ്ങേയറ്റം വേദനാജനകമാണ്. സന്യാസിമാരുടെ വസ്ത്രങ്ങളും സാധനങ്ങളും റോഡിൽ ചിതറിക്കിടക്കുന്നതും തകർന്ന വാഹനവും ദൃശ്യങ്ങളിൽ കാണാം. അഞ്ച് സന്യാസിമാർ സംഭവസ്ഥലത്തുവെച്ചുതന്നെ മരിച്ചു. നാലുപേർ ആശുപത്രിയിൽ വെച്ചാണ് മരണപ്പെട്ടത്. അപകടത്തിൽപ്പെട്ടവരിൽ പലരും ഗുരുതരാവസ്ഥയിൽ ചികിത്സയിലാണ്. മുക്ദാഹാൻ ആശുപത്രിയിൽ പരിക്കേറ്റവർക്കായി രക്തദാനം നടത്താൻ അധികൃതർ അഭ്യർത്ഥിച്ചു.
പ്രത്യേക പരിഗണന ആവശ്യമുള്ള കുട്ടിയാണ് ട്രക്ക് ഓടിച്ചത് എന്നാണ് പ്രാഥമിക നിഗമനം. സംഭവസമയത്ത് വീട്ടിൽ മറ്റാരും ഉണ്ടായിരുന്നില്ലെന്നും കുട്ടി സുഖമില്ലാത്തതിനാൽ സ്കൂളിൽ പോയിരുന്നില്ലെന്നും പോലീസ് പറഞ്ഞു. സംഭവത്തിൽ നിയമനടപടികൾ സ്വീകരിച്ചു വരികയാണെന്നും, വാഹനത്തിന്റെ ഫോറൻസിക് പരിശോധന നടത്തുമെന്നും പോലീസ് വ്യക്തമാക്കി. മാതാപിതാക്കൾ ഉൾപ്പെടെയുള്ള രക്ഷകർത്താക്കൾക്ക് വലിയൊരു പാഠമാണ് ഈ അപകടമെന്നും, റോഡ് സുരക്ഷയിൽ കൂടുതൽ ശ്രദ്ധ ചെലുത്തണമെന്നും പ്രവിശ്യാ ഗവർണർ വൊറായൻ ബുണ്ണരാത്ത് പ്രതികരിച്ചു.
Summary: Nine Buddhist monks were tragically killed and several others injured in Mukdahan, Thailand, after an 11-year-old boy drove his parents’ pickup truck into their pilgrimage procession. Preliminary reports suggest the child, who reportedly has special needs, took the vehicle without permission while alone at home. Thai authorities are currently investigating the incident and managing the emergency medical response, while officials have called for increased parental vigilance to prevent such devastating road safety failures.
