കീവ്: യുക്രെയ്ൻ തലസ്ഥാനമായ കീവിൽ റഷ്യ നടത്തിയ മിസൈൽ ആക്രമണത്തിൽ
മൂന്ന് പേർ കൊല്ലപ്പെട്ടു. രണ്ട് കുട്ടികൾ ഉൾപ്പെടെ 15 പേർക്ക് പരിക്കേറ്റതായി കീവ് മേയർ വിറ്റാലി ക്ലിറ്റ്ഷ്കോ അറിയിച്ചു. പരിക്കേറ്റ എല്ലാവരെയും ആശുപത്രിയിൽ പ്രവേശിപ്പിച്ചു. ഒരാളുടെ നില ഗുരുതരമാണെന്നാണ് റിപ്പോർട്ട് (Russian Missile Attack Kyiv). ശനിയാഴ്ച പുലർച്ചെയുണ്ടായ ആക്രമണത്തിൽ നഗരത്തിന്റെ വിവിധ ഭാഗങ്ങളിൽ ശക്തമായ സ്ഫോടനങ്ങൾ കേട്ടതായി ദൃക്സാക്ഷികൾ അറിയിച്ചു. ഷെവ്ചെങ്കിവ്സ്കി, സൊലോമിയാൻസ്കി ജില്ലകളിലെ കെട്ടിടങ്ങൾക്ക് ആക്രമണത്തിൽ സാരമായ നാശനഷ്ടമുണ്ടായി. ഭാഗികമായി തകർന്ന ഒരു കെട്ടിടത്തിൽ തീപിടിച്ചതിനെ തുടർന്ന് നിരവധി പേർ കുടുങ്ങിയതായും രക്ഷാപ്രവർത്തനം തുടരുകയാണെന്നും അധികൃതർ വ്യക്തമാക്കി.
ഡാർനിറ്റ്സ്കി ജില്ലയിൽ വെയർഹൗസുകൾക്ക് തീപിടിച്ചതായും ഹൊലോസീവ്സ്കി മേഖലയിൽ മിസൈൽ അവശിഷ്ടങ്ങൾ കെട്ടിടങ്ങൾക്ക് മുകളിലേക്ക് പതിച്ചതായും റിപ്പോർട്ടുണ്ട്. അഗ്നിരക്ഷാസേനയും അടിയന്തര രക്ഷാസംഘങ്ങളും സംഭവസ്ഥലങ്ങളിൽ എത്തി തീ അണയ്ക്കാനും കെട്ടിടങ്ങൾക്കുള്ളിൽ കുടുങ്ങിയവരെ രക്ഷപ്പെടുത്താനുമുള്ള ശ്രമങ്ങൾ തുടരുകയാണ്. ബാലിസ്റ്റിക് മിസൈലുകളെ പ്രതിരോധിക്കാൻ ആവശ്യമായ വ്യോമപ്രതിരോധ സംവിധാനങ്ങളുടെ കുറവ് യുക്രെയ്ൻ നേരിടുന്ന സാഹചര്യത്തിൽ, സമീപ മാസങ്ങളായി കീവിനെ ലക്ഷ്യമിട്ടുള്ള റഷ്യൻ ആക്രമണങ്ങൾ ശക്തമായിട്ടുണ്ട്. കൂടുതൽ വ്യോമപ്രതിരോധ സഹായം നൽകണമെന്ന് യുക്രെയ്ൻ പ്രസിഡന്റ് വൊളോഡിമിർ സെലെൻസ്കി സഖ്യരാജ്യങ്ങളോട് ആവർത്തിച്ച് ആവശ്യപ്പെട്ടിരുന്നു.
പാട്രിയറ്റ് മിസൈൽ പ്രതിരോധ സംവിധാനത്തിനായുള്ള ഇന്റർസെപ്റ്റർ മിസൈലുകൾ യുക്രെയ്നിൽ നിർമ്മിക്കുന്നതിന് അമേരിക്കയുടെ അനുമതി തേടിയും സെലെൻസ്കി ഭരണകൂടം ചർച്ചകൾ നടത്തുന്നുണ്ട്. എന്നാൽ സാങ്കേതികവിദ്യ കൈമാറുന്നതുമായി ബന്ധപ്പെട്ട് അമേരിക്ക ഇതുവരെ അന്തിമ തീരുമാനമെടുത്തിട്ടില്ലെന്ന് പ്രസിഡന്റ് ഡൊണാൾഡ് ട്രംപ് വെള്ളിയാഴ്ച വ്യക്തമാക്കി. ഈ ആഴ്ച യുക്രെയ്നിന്റെ വിവിധ ഭാഗങ്ങളിൽ റഷ്യ നടത്തിയ ആക്രമണങ്ങളിൽ നിരവധി പേർ കൊല്ലപ്പെട്ടിരുന്നു. വ്യാഴാഴ്ച പുലർച്ചെ നടന്ന വ്യോമാക്രമണത്തിൽ കുട്ടികളടക്കം എട്ട് പേർ മരിച്ചതായും റിപ്പോർട്ടുകളുണ്ട്. ഏറ്റവും പുതിയ ആക്രമണത്തെ തുടർന്ന് കീവിൽ സുരക്ഷ ശക്തമാക്കിയിരിക്കുകയാണ്.
Summary: At least three people were killed and 15 others, including two teenagers, were injured after a Russian missile attack struck Ukraine’s capital, Kyiv. Several buildings were damaged and rescue operations continued as Ukraine renewed calls for stronger air-defence support.
