ഖത്തർ സമ്മാനമായി നൽകിയ പുതിയ എയർ ഫോഴ്സ് വൺ വിമാനം യുഎസ് പ്രസിഡന്റ് ഡൊണാൾഡ് ട്രംപ് അനാച്ഛാദനം ചെയ്തു. “പറക്കുന്ന വൈറ്റ് ഹൗസ്” എന്നാണ് ഈ ആഡംബര വിമാനത്തെ ട്രംപ് വിശേഷിപ്പിച്ചത്. വാഷിംഗ്ടണിന് പുറത്തുള്ള ജോയിന്റ് ബേസ് ആൻഡ്രൂസിൽ വെച്ചാണ് വിമാനം പൊതുജനങ്ങൾക്ക് മുന്നിൽ അവതരിപ്പിച്ചത്. (Qatar gifted Air Force One)
തുകൽ സീറ്റുകൾ, മൃദുവായ കാർപെറ്റുകൾ, തടികൊണ്ടുള്ള പാനലുകൾ എന്നിവ ഉപയോഗിച്ച് അതിഗംഭീരമായാണ് വിമാനം ഒരുക്കിയിരിക്കുന്നത്. സ്വർണ്ണത്തിന്റെ നിറത്തിലുള്ള അലങ്കാരങ്ങളും വിമാനത്തിലുണ്ട്. പതിറ്റാണ്ടുകളായി എയർ ഫോഴ്സ് വണ്ണിന് ഉണ്ടായിരുന്ന നീല-വെള്ള നിറത്തിന് പകരം, അമേരിക്കൻ പതാകയെ അനുസ്മരിപ്പിക്കും വിധം ചുവപ്പ്, വെള്ള, കടും നീല നിറങ്ങളാണ് പുതിയ വിമാനത്തിന് നൽകിയിരിക്കുന്നത്. നിലവിലുള്ള എയർ ഫോഴ്സ് വൺ വിമാനങ്ങളെക്കാൾ ദൂരപരിധിയും വേഗതയുമുള്ളതാണ് ഈ വിമാനമെന്ന് ട്രംപ് അവകാശപ്പെട്ടു.
ഖത്തർ സർക്കാർ സമ്മാനമായി നൽകിയ ഈ വിമാനത്തിന് കോടിക്കണക്കിന് രൂപ വിലമതിക്കുന്നുണ്ട്. ഈ സമ്മാനം സ്വീകരിച്ചത് ധാർമ്മികവും ഭരണഘടനാപരവും സുരക്ഷാപരവുമായ ഒട്ടേറെ ചോദ്യങ്ങൾക്ക് വഴിവെച്ചിട്ടുണ്ട്. എങ്കിലും, ഇത്രയും വിലപിടിപ്പുള്ള ഒരു സമ്മാനം നിരസിക്കുന്നത് മൗഢ്യമാണെന്നും രാജ്യത്തിന് ലഭിച്ച നേട്ടമാണിതെന്നും ട്രംപ് അഭിപ്രായപ്പെട്ടു. ഈ വിമാനം തന്റെ പ്രസിഡൻഷ്യൽ ലൈബ്രറിക്ക് സംഭാവന ചെയ്യുമെന്ന ട്രംപിന്റെ മുൻ പ്രസ്താവനയും നേരത്തെ ആശങ്കകൾക്ക് കാരണമായിരുന്നു.
ജൂലൈ 4-ന് നടക്കുന്ന അമേരിക്കയുടെ 250-ാം സ്വാതന്ത്ര്യദിനാഘോഷത്തിന്റെ ഭാഗമായി നടക്കുന്ന വ്യോമാഭ്യാസ പ്രകടനങ്ങളിൽ ഈ പുതിയ വിമാനം നേതൃത്വം നൽകുമെന്ന് ട്രംപ് വ്യക്തമാക്കി. പ്രസിഡന്റ് ഈ വിമാനത്തിൽ യാത്ര ചെയ്യുമ്പോൾ മാത്രമാണ് ഇതിനെ ഔദ്യോഗികമായി ‘എയർ ഫോഴ്സ് വൺ’ എന്ന് വിളിക്കുന്നത്. ദശാബ്ദങ്ങളായി സേവനമനുഷ്ഠിച്ച പഴയ ബോയിംഗ് 747 വിമാനങ്ങൾക്ക് പകരമായാണ് പുതിയ വിമാനം സേവനസജ്ജമാകുന്നത്.
Summary: US President Donald Trump officially unveiled a new Air Force One aircraft gifted by the government of Qatar, hailing it as a “flying White House” and the “world’s most luxurious plane.” The modified Boeing 747, which features a new red, white, and blue livery, was showcased at Joint Base Andrews, with Trump praising its superior speed and luxury interiors.
