ഇസ്ലാമാബാദ്: അയൽരാജ്യമായ പാകിസ്ഥാനിൽ ജനജീവിതം പൂർണ്ണമായും ദുസ്സഹമാക്കി ആഗോള പ്രതിസന്ധികളും ആഭ്യന്തര സാമ്പത്തിക തകർച്ചയും തുടരുന്നു (Pakistan Economic Crisis). അന്താരാഷ്ട്ര വിപണിയിലെ കടുത്ത ഇന്ധനവില വർധനവും രാജ്യത്തെ പണപ്പെരുപ്പം 300 ശതമാനത്തോളം ഉയർന്നതുമാണ് പാകിസ്ഥാനെ ചരിത്രത്തിലെ ഏറ്റവും വലിയ പ്രതിസന്ധിയിലേക്ക് തള്ളിവിട്ടത്. ഒരു ഘട്ടത്തിൽ പെട്രോൾ വില ലിറ്ററിന് 450 പാക് രൂപ വരെ എത്തിയിരുന്നുവെങ്കിലും പിന്നീട് സർക്കാർ ഇടപെട്ട് 22 രൂപ കുറച്ചിരുന്നു.
പാക് മാധ്യമമായ ‘ഡോൺ’ റിപ്പോർട്ട് ചെയ്യുന്നതനുസരിച്ച്, നിലവിൽ പെട്രോളിന് 381 രൂപയും ഡീസലിന് 380 രൂപയുമാണ് രാജ്യത്തെ നിരക്ക്. ഇന്ധനവില സാധാരണക്കാർക്ക് താങ്ങാനാകാത്ത വിധം കുതിച്ചുയർന്നതോടെ ഭൂരിഭാഗം ജനങ്ങളും മാസങ്ങളായി തങ്ങളുടെ കാറുകൾ നിരത്തിലിറക്കാതെ ഉപേക്ഷിച്ച മട്ടാണ്. ഒരു സാധാരണ ഇരുചക്രവാഹനം പോലും കൊണ്ടുനടക്കാൻ സാധിക്കാത്ത അത്രയും ദയനീയമായ അവസ്ഥയിലാണ് നിലവിൽ പാകിസ്ഥാനിലെ സാധാരണക്കാരും ഇടത്തരക്കാരുമുള്ളത്.
അമേരിക്ക-ഇറാൻ തർക്കങ്ങളും സുപ്രധാന എണ്ണക്കപ്പൽ പാതയായ ഹോർമുസ് കടലിടുക്കിലെ നിരന്തരമായ സംഘർഷങ്ങളുമാണ് ആഗോള ഊർജ്ജ വിപണിയെയും അതുവഴി പാകിസ്ഥാൻ സമ്പദ്വ്യവസ്ഥയെയും തകർത്തത്. എണ്ണവില കൂടിയതോടെ രാജ്യത്ത് ബസ് ചാർജും അവശ്യസാധനങ്ങളുടെയും ഭക്ഷണസാധനങ്ങളുടെയും വിലയും കുത്തനെ ഉയർന്നു. വരും വർഷങ്ങളിൽ പണപ്പെരുപ്പം ശരാശരി 9 മുതൽ 10 ശതമാനം വരെയാകുമെന്നാണ് കണക്കാക്കിയിരുന്നതെങ്കിലും 2026 സാമ്പത്തിക വർഷത്തിന്റെ അവസാനത്തോടെ ഇത് 11 ശതമാനവും കടക്കാൻ വലിയ സാധ്യതയുണ്ട്.
രാജ്യാന്തര വിപണിയിൽ എണ്ണയ്ക്ക് 10 ഡോളർ കൂടിയാൽ പാകിസ്ഥാനിലെ പണപ്പെരുപ്പത്തിൽ 50 ബേസിസ് പോയിന്റിന്റെ വർധനവുണ്ടാകും. കൂടാതെ 2027 സാമ്പത്തിക വർഷത്തിൽ രാജ്യത്തിന്റെ ജിഡിപി വളർച്ച വെറും 2.5 മുതൽ 3.0 ശതമാനം വരെ മാത്രമായിരിക്കുമെന്ന് റേറ്റിങ് ഏജൻസികൾ മുന്നറിയിപ്പ് നൽകുന്നു. ഇറാൻ യുദ്ധ പശ്ചാത്തലത്തിൽ ലോകത്തിലെ തന്നെ ഏറ്റവും മോശം പ്രകടനം കാഴ്ചവയ്ക്കുന്ന വിപണിയായി പാകിസ്ഥാൻ സ്റ്റോക്ക് എക്സ്ചേഞ്ച് മാറി. ബ്ലൂംബർഗ് റിപ്പോർട്ട് പ്രകാരം കെഎസ്ഇ-100 ഇൻഡക്സ് ജനുവരിയിലെ ഉയർന്ന നിരക്കിൽ നിന്നും 21 ശതമാനമാണ് ഒറ്റയടിക്ക് ഇടിഞ്ഞത്; ഇതിനകം 383 ദശലക്ഷം യുഎസ് ഡോളറിന്റെ ഓഹരികളാണ് വിദേശ നിക്ഷേപകർ വിറ്റൊഴിഞ്ഞത്.
Summary: Pakistan is facing a severe economic crisis as inflation nears 300% and petrol prices hit 381 Pakistani Rupees per liter due to global energy conflicts. The fuel price hike has forced many citizens to abandon their cars, disrupting daily life and significantly raising the cost of essential food items and transportation. Additionally, the Pakistan Stock Exchange has plummeted by 21% from its January peak, leading to a massive withdrawal of foreign investments worth 383 million US dollars.
