പാരിസ്: പ്രശസ്ത ഫ്രഞ്ച്-മൊറോക്കൻ നടി നാദിയ ഫാറെസ് (Nadia Fares) അന്തരിച്ചു. 57 വയസ്സായിരുന്നു. പാരിസിലെ ഒരു സ്വകാര്യ സ്പോർട്സ് ക്ലബ്ബിലെ നീന്തൽക്കുളത്തിൽ അബോധാവസ്ഥയിൽ കണ്ടെത്തിയതിനെത്തുടർന്ന് ചികിത്സയിലായിരുന്നു അവർ. വെള്ളിയാഴ്ച (ഏപ്രിൽ 17) വൈകുന്നേരത്തോടെ പാരിസിലെ ആശുപത്രിയിൽ വെച്ചായിരുന്നു അന്ത്യം.
ഏപ്രിൽ 11-നാണ് പാരിസിലെ ഒൻപതാം ഡിസ്ട്രിക്റ്റിലുള്ള ഒരു ജിംനേഷ്യത്തിലെ നീന്തൽക്കുളത്തിൽ നാദിയയെ അബോധാവസ്ഥയിൽ കണ്ടെത്തിയത്. ഉടൻ തന്നെ ആശുപത്രിയിൽ പ്രവേശിപ്പിച്ചെങ്കിലും ആരോഗ്യനില വഷളായതിനെത്തുടർന്ന് കൃത്രിമ കോമയിലേക്ക് മാറ്റുകയായിരുന്നു. വെള്ളിയാഴ്ച ഹൃദയാഘാതം സംഭവിച്ചാണ് മരണം സ്ഥിരീകരിച്ചത്. നാദിയയുടെ മക്കളായ സീലിയ, ഷാന എന്നിവർ മൃതദേഹം ഏറ്റുവാങ്ങി. “ഫ്രാൻസിന് ഒരു മികച്ച കലാകാരിയെയാണ് നഷ്ടമായത്, എന്നാൽ ഞങ്ങൾക്ക് ഞങ്ങളുടെ അമ്മയെയാണ് നഷ്ടപ്പെട്ടത്” എന്ന് മക്കൾ വികാരാധീനരായി പറഞ്ഞു.
2000-ൽ പുറത്തിറങ്ങിയ ‘ദ ക്രിംസൺ റിവേഴ്സ്’എന്ന സൈക്കോളജിക്കൽ ത്രില്ലറിലൂടെയാണ് നാദിയ അന്താരാഷ്ട്ര ശ്രദ്ധ നേടിയത്. ‘ദ നെസ്റ്റ്’, ‘വാർ’, ‘സ്റ്റോം വാണിംഗ്’ തുടങ്ങിയ ചിത്രങ്ങളിലെ പ്രകടനം ശ്രദ്ധേയമായിരുന്നു. നേരത്തെയും ചില ആരോഗ്യ പ്രശ്നങ്ങൾ നാദിയയെ അലട്ടിയിരുന്നു. 2007-ൽ തലച്ചോറിലെ ധമനികളിലെ തകരാർ മൂലം ശസ്ത്രക്രിയയ്ക്ക് വിധേയയായിരുന്നു. തുടർന്ന് നാല് വർഷത്തിനിടെ മൂന്ന് ഹൃദയ ശസ്ത്രക്രിയകളും കഴിഞ്ഞിരുന്നു. വരും മാസങ്ങളിൽ തന്റെ ആദ്യ ചിത്രം സംവിധാനം ചെയ്യാനുള്ള ഒരുക്കത്തിലായിരുന്നു അവർ. നാദിയയുടെ വിയോഗത്തിൽ ഫ്രഞ്ച് ചലച്ചിത്ര ലോകവും ആരാധകരും അനുശോചനം രേഖപ്പെടുത്തി.
Summary: Acclaimed French-Moroccan actress Nadia Fares, known for her breakout role in ‘The Crimson Rivers’, passed away at the age of 57 on April 17, 2026. She was found unconscious in a swimming pool at a private sports complex in Paris on April 11 and spent a week in an induced coma before suffering a fatal cardiac arrest. Her daughters confirmed the news, mourning the loss of a “great artist and beloved mother.” Fares had overcome significant health hurdles in the past, including brain and heart surgeries, and was preparing for her directorial debut.
