കുവൈത്ത് സിറ്റി: കുവൈത്തിലെ നുസ്ഹ മേഖലയിൽ പാർക്കിങ് സംബന്ധിച്ചുണ്ടായ വാക്കുതർക്കം രണ്ട് സ്വദേശി യുവാക്കൾ തമ്മിലുള്ള രൂക്ഷമായ കയ്യാങ്കളിയിൽ കലാശിച്ചു. സംഘർഷത്തിനിടെ ലോഹ മോതിരം ധരിച്ച കൈകൊണ്ട് മുഖത്തേറ്റ ഇടിയിൽ ഒരാളുടെ കണ്ണിന് ഗുരുതരമായി പരിക്കേറ്റതിനെ തുടർന്ന് അടിയന്തര ശസ്ത്രക്രിയ നടത്തേണ്ടിവന്നു. സംഭവത്തിൽ ഇരുവരും പരിക്കേറ്റതായും അധികൃതർ അറിയിച്ചു (Kuwait parking dispute). നുസ്ഹ പാർക്കിലെ പാർക്കിങ് ഏരിയയിലാണ് സംഭവം നടന്നത്. ഒരു യുവാവ് വാഹനം പുറത്തേക്ക് എടുക്കാൻ ശ്രമിക്കുന്നതിനിടെ മറ്റൊരാൾ തന്റെ വാഹനം തടസ്സമായി പാർക്ക് ചെയ്തതാണ് തർക്കത്തിന് തുടക്കമായതെന്ന് പ്രാഥമിക അന്വേഷണത്തിൽ വ്യക്തമായി. വാക്കുതർക്കം പിന്നീട് കയ്യാങ്കളിയിലേക്ക് നീങ്ങുകയായിരുന്നു.
സംഘർഷത്തിനിടെ ഒരാൾ ധരിച്ചിരുന്ന ലോഹ മോതിരം കൊണ്ടുള്ള ശക്തമായ ഇടിയാണ് എതിരാളിയുടെ കണ്ണിന് ഗുരുതര പരിക്കേൽക്കാൻ കാരണമായത്. പരിക്കേറ്റ യുവാവിനെ ഉടൻ അൽ-അമിരി ആശുപത്രിയിലെത്തിച്ച് അടിയന്തര ശസ്ത്രക്രിയയ്ക്ക് വിധേയനാക്കി. സംഭവത്തിന് പിന്നാലെ പരിക്കേറ്റ ഒരാൾ ഫൈഹ പൊലീസ് സ്റ്റേഷനിലെത്തി പരാതി നൽകി. ഏകദേശം 15 മിനിറ്റിനുശേഷം രണ്ടാമത്തെ യുവാവും തനിക്കും പരിക്കേറ്റതായി ആരോപിച്ച് സമാന പരാതിയുമായി സ്റ്റേഷനിലെത്തി. ഇരുവരുടെയും പരാതികൾ പരിശോധിച്ച പൊലീസ്, രണ്ടും ഒരേ സംഘർഷവുമായി ബന്ധപ്പെട്ടതാണെന്ന് സ്ഥിരീകരിച്ചു. രണ്ടാമത്തെ പരാതിക്കാരനും മെഡിക്കൽ റിപ്പോർട്ട് ഹാജരാക്കിയിട്ടുണ്ട്.
സംഭവത്തിൽ കേസ് രജിസ്റ്റർ ചെയ്യാൻ പബ്ലിക് പ്രോസിക്യൂഷൻ നിർദേശിച്ചു. വിശദമായ അന്വേഷണം നടത്തുന്നതിനായി കേസ് ജനറൽ ഡയറക്ടറേറ്റ് ഓഫ് ക്രിമിനൽ ഇൻവെസ്റ്റിഗേഷൻ വിഭാഗത്തിന് കൈമാറിയതായി അധികൃതർ അറിയിച്ചു.
Summary: A parking dispute between two Kuwaiti men in the Nuzha area escalated into a physical fight, leaving one man with a serious eye injury after being struck by a metal ring. Police have registered a case and referred it to the Criminal Investigation Department for further inquiry.
