ലോകമെമ്പാടും ദശലക്ഷക്കണക്കിന് ആരാധകരുള്ള ‘ഗെയിം ഓഫ് ത്രോൺസ്’ (GoT) സീരീസിലെ ദാരുണമായ രംഗങ്ങൾ ആർട്ടിഫിഷ്യൽ ഇന്റലിജൻസ് ഉപയോഗിച്ച് തിരുത്തി എഴുതിയിരിക്കുകയാണ് ഹകം കിക്കി എന്ന കണ്ടന്റ് ക്രിയേറ്റർ. സീരീസിലെ ആരാധകർക്ക് താങ്ങാനാവാത്ത പല മരണങ്ങളും ക്രൂരതകളും ഇല്ലാതാക്കുന്ന കിക്കിയുടെ വീഡിയോ ഇപ്പോൾ സോഷ്യൽ മീഡിയയിൽ തരംഗമാണ്. (Game of Thrones AI Edit)
ഹൂഡിയും ടൈയും ധരിച്ച് വെസ്റ്ററോസിലൂടെ നടന്നുപോകുന്ന കിക്കി, കഥയിലെ നിർണ്ണായക നിമിഷങ്ങളിൽ ഇടപെട്ട് പ്രിയപ്പെട്ട കഥാപാത്രങ്ങളെ രക്ഷിക്കുന്നതാണ് വീഡിയോയുടെ സാരം. ബ്രാൻ സ്റ്റാർക്കിന്റെ വീഴ്ച തടയുന്നത് മുതൽ, നെഡ് സ്റ്റാർക്കിനെ വധശിക്ഷയിൽ നിന്ന് രക്ഷിക്കുന്നതും, വിവാദമായ ‘റെഡ് വെഡിംഗ്’ തടയുന്നതും വരെ കിക്കി തന്റെ എഡിറ്റിംഗിലൂടെ സാധ്യമാക്കി. ജോഫ്രി ബാരാത്തിയനെ അടിക്കുന്നതും ഓബറിൻ മാർട്ടലിനെ ആലിംഗനം ചെയ്യുന്നതും വീഡിയോയിലുണ്ട്. 65 ലക്ഷത്തിലധികം ആളുകൾ കണ്ട വീഡിയോയ്ക്ക് വലിയ പിന്തുണയാണ് ലഭിക്കുന്നത്. “നെഡ് സ്റ്റാർക്കിനെ രക്ഷിച്ചതിന് നന്ദി”, “നിങ്ങൾ ഞങ്ങളുടെ മുറിവുണക്കി” എന്നിങ്ങനെ വൈകാരികമായ കമന്റുകളാണ് ആരാധകർ രേഖപ്പെടുത്തുന്നത്.
View this post on Instagram
മറ്റു എഐ വീഡിയോകളിൽ നിന്ന് വ്യത്യസ്തമായി, ഒറിജിനൽ അഭിനേതാക്കളുടെ പ്രകടനത്തിൽ മാറ്റം വരുത്താതെ കിക്കി സ്വയം ഒരു കഥാപാത്രമായി അതിലേക്ക് കടന്നുചെല്ലുകയാണ് ചെയ്തത്. ഇത് ദൃശ്യങ്ങൾക്ക് കൂടുതൽ വ്യക്തതയും സ്വാഭാവികതയും നൽകുന്നു. സീരീസിലെ പല ദാരുണമായ അന്ത്യങ്ങളും ആരാധകർക്ക് ഇന്നും വേദനയുള്ള കാര്യമാണ്. ആ മുറിവുകൾക്ക് ഒരു മരുന്നാണ് കിക്കിയുടെ ഈ എഡിറ്റിംഗ് എന്നാണ് പലരും അഭിപ്രായപ്പെടുന്നത്.
Summary: Content creator Hakam Kiki has gone viral for using AI to “fix” traumatic scenes from Game of Thrones. In the two-minute video, he inserts himself into Westeros to save characters like Ned Stark and Bran Stark, and even stops the Red Wedding. Fans have praised the video as “healing,” with over 6.5 million views on Instagram.
