ബെയ്റൂട്ട്: ഇസ്രായേലും ഇറാൻ അനുകൂല സായുധ സംഘടനയായ ഹിസ്ബുള്ളയും തമ്മിലുള്ള താൽക്കാലിക വെടിനിർത്തൽ കരാർ പ്രാബല്യത്തിൽ വന്ന് മണിക്കൂറുകൾക്കകം ലെബനനിൽ വീണ്ടും ഇസ്രായേൽ ആക്രമണം (Israel strikes Lebanon after ceasefire). ശനിയാഴ്ച പുലർച്ചെ തെക്കൻ ലെബനനിൽ ഇസ്രായേൽ നടത്തിയ വ്യോമാക്രമണങ്ങളിലും ഡ്രോൺ ആക്രമണങ്ങളിലും അഞ്ച് പേർ കൊല്ലപ്പെട്ടതായി ലെബനൻ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. കനത്ത സംഘർഷങ്ങൾക്ക് വിരാമമിട്ടുകൊണ്ട് വെള്ളിയാഴ്ച ഇരുവിഭാഗവും വെടിനിർത്തലിന് ധാരണയായിരുന്നു.
ലെബനന്റെ നാഷണൽ ന്യൂസ് ഏജൻസി (NNA) നൽകുന്ന വിവരമനുസരിച്ച്, തെക്കൻ ലെബനനിലെ നബതിയ (Nabatieh) മേഖലയിലാണ് ഇസ്രായേൽ യുദ്ധവിമാനങ്ങളും ഡ്രോണുകളും രാത്രി വൈകി തുടർച്ചയായ ആക്രമണങ്ങൾ നടത്തിയത്. ആക്രമണത്തിൽ നിരവധി വീടുകളും പാർപ്പിട സമുച്ചയങ്ങളും പൂർണ്ണമായി തകർന്നു. വ്യോമാക്രമണത്തിന് പുറമെ പുലർച്ചെയോടെ നബതിയയിലും പരിസര പ്രദേശങ്ങളിലും ഇസ്രായേൽ സൈന്യം ശക്തമായ പീരങ്കി ആക്രമണവും (Artillery Shelling) നടത്തിയിട്ടുണ്ട്.
വെള്ളിയാഴ്ച പ്രാദേശിക സമയം വൈകുന്നേരം 4 മണിയോടെയാണ് ഇരുവിഭാഗവും തമ്മിലുള്ള വെടിനിർത്തൽ കരാർ നിലവിൽ വന്നതെന്ന് യുഎസ് ഉദ്യോഗസ്ഥർ സ്ഥിരീകരിച്ചിരുന്നു. ഒരു മുതിർന്ന ഇസ്രായേൽ ഉദ്യോഗസ്ഥനും ഹിസ്ബുള്ള വൃത്തങ്ങളും വാർത്താ ഏജൻസിയായ റോയിട്ടേഴ്സിനോട് കരാർ ഒപ്പിട്ട കാര്യം വ്യക്തമാക്കിയിരുന്നു. എന്നാൽ സമാധാന ശ്രമങ്ങൾക്ക് തിരിച്ചടിയായി മണിക്കൂറുകൾക്കകം ഇസ്രായേൽ വീണ്ടും ആക്രമണം അഴിച്ചുവിടുകയായിരുന്നു.
ആക്രമണത്തെക്കുറിച്ച് ഇസ്രായേൽ സൈന്യം ഔദ്യോഗികമായി പ്രതികരിച്ചിട്ടില്ല. വെടിനിർത്തൽ കരാർ ലംഘിച്ചുകൊണ്ട് ഇസ്രായേൽ നടത്തിയ ഈ പുതിയ നീക്കം മിഡിൽ ഈസ്റ്റിൽ വീണ്ടും കടുത്ത ആശങ്കയ്ക്ക് കാരണമായിട്ടുണ്ട്. കരാർ പൂർണ്ണമായി തകരുന്നതിലേക്ക് ഈ ആക്രമണങ്ങൾ നയിക്കുമോ എന്ന ഭീതിയിലാണ് അന്താരാഷ്ട്ര സമൂഹം.
