ഹവാന: കടുത്ത ഊർജ്ജ, ഇന്ധന പ്രതിസന്ധികൾക്കിടയിൽ ക്യൂബയിൽ വീണ്ടും ദേശീയ വൈദ്യുതി ഗ്രിഡ് തകർന്നു. രാജ്യവ്യാപകമായി ലക്ഷക്കണക്കിന് ആളുകൾ പൂർണ്ണമായും ഇരുട്ടിലായ പശ്ചാത്തലത്തിൽ, വൈദ്യുതി വിതരണം പതുക്കെ പുനഃസ്ഥാപിക്കാനുള്ള ശ്രമങ്ങൾ ആരംഭിച്ചതായി ഗ്രിഡ് ഓപ്പറേറ്ററായ യു.എൻ.ഇ അറിയിച്ചു. നിലവിൽ ആശുപത്രികൾ, ഭക്ഷ്യോത്പാദന കേന്ദ്രങ്ങൾ തുടങ്ങിയ അത്യാവശ്യ സർവീസുകൾക്ക് മാത്രമാണ് വൈദ്യുതി ലഭ്യമാക്കിയിട്ടുള്ളത്. തലസ്ഥാനമായ ഹവാനയിലെ മൊത്തം ആവശ്യകതയുടെ ഒരു ശതമാനം മാത്രമാണ് നിലവിൽ പരിഹരിക്കാൻ കഴിഞ്ഞിട്ടുള്ളത്.(Cuba National Power Grid Collapses Widespread Blackout US Oil Blockade)
ഗ്രിഡ് പൂർണ്ണമായും തകരാൻ ഇടയാക്കിയ കൃത്യമായ കാരണം എന്താണെന്ന് അധികൃതർ ഇതുവരെ വ്യക്തമാക്കിയിട്ടില്ല. ക്യൂബയിലെ കാലപ്പഴക്കം ചെന്ന വിതരണ ശൃംഖലയും ക്യൂബയിലേക്കുള്ള ഇന്ധന വരവ് തടഞ്ഞുകൊണ്ട് അമേരിക്ക ഏർപ്പെടുത്തിയ കടുത്ത എണ്ണ ഉപരോധവുമാണ് മാസങ്ങളായി തുടരുന്ന ഈ കടുത്ത പ്രതിസന്ധിക്ക് പിന്നിൽ. വേനൽക്കാലത്തെ കടുത്ത ചൂടിനിടയിൽ മണിക്കൂറുകളോളവും ദിവസങ്ങളോളവും നീണ്ടുനിൽക്കുന്ന പവർകട്ട് ജനജീവിതത്തെ സാരമായി ബാധിച്ചിരിക്കുകയാണ്. 2025 ഒക്ടോബറിന് ശേഷം ക്യൂബയിലുണ്ടാകുന്ന എട്ടാമത്തെയും 2026-ൽ ഉണ്ടാകുന്ന മൂന്നാമത്തെയും സമ്പൂർണ്ണ തകരാറാണ് തിങ്കളാഴ്ച ഉണ്ടായത്.
വെനിസ്വേലയിൽ നിന്നും മെക്സിക്കോയിൽ നിന്നും ക്യൂബയിലേക്കുള്ള ഇന്ധന കയറ്റുമതി തടയാൻ യു.എസ് പ്രസിഡന്റ് ഡൊണാൾഡ് ട്രംപിന്റെ ഭരണകൂടം കടുത്ത സമ്മർദ്ദമാണ് ചെലുത്തുന്നത്. ക്യൂബയ്ക്ക് എണ്ണ നൽകുന്ന ഏതൊരു രാജ്യത്തിന് മേലും കടുത്ത താരിഫ് ചുമത്തുമെന്ന് യു.എസ് ഭീഷണിപ്പെടുത്തിയിട്ടുണ്ട്.
Story Summary
Cuba’s national electric grid collapsed on Monday, leaving millions of residents without power amidst ongoing severe fuel and medicine shortages. While grid operator UNE slowly began restoring electricity to vital services like hospitals, it could meet only 1% of Havana’s power demand. The blackout, the eighth since October 2025, is driven by an aging infrastructure and tightened U.S. oil sanctions.
