ബെയ്ജിങ്: അന്താരാഷ്ട്ര വിലക്കുകളെയും അയൽരാജ്യങ്ങളുടെ ആശങ്കകളെയും അവഗണിച്ച് പസഫിക് സമുദ്രത്തിൽ അത്യാധുനിക സബ്മറൈൻ ബാലിസ്റ്റിക് മിസൈൽ പരീക്ഷിച്ച് ചൈന. സമുദ്രത്തിനടിയിലുള്ള അന്തർവാഹിനിയിൽ നിന്നും തൊടുത്തുവിട്ട മിസൈൽ പസഫിക് സമുദ്രത്തിലെ നിശ്ചിത ലക്ഷ്യസ്ഥാനത്ത് കൃത്യമായി പതിച്ചതായി ചൈനീസ് പീപ്പിൾസ് ലിബറേഷൻ ആർമി നേവി വക്താവ് സീനിയർ ക്യാപ്റ്റൻ വാങ് സ്യൂമെങ് ഔദ്യോഗിക പ്രസ്താവനയിലൂടെ അറിയിച്ചു.(China Submarine Launched Ballistic Missile Test Pacific Ocean Australia New Zealand React)
ചൈനയുടെ വാർഷിക സൈനിക പരിശീലനത്തിന്റെ ഭാഗമായുള്ള ഒരു സാധാരണ പരീക്ഷണം മാത്രമാണിതെന്നും ബന്ധപ്പെട്ട രാജ്യങ്ങളെ മുൻകൂട്ടി വിവരമറിയിച്ചിരുന്നുവെന്നും ചൈന അവകാശപ്പെട്ടു. അന്താരാഷ്ട്ര നിയമങ്ങൾക്ക് വിധേയമായാണ് പരീക്ഷണം നടത്തിയതെന്നും ഏതെങ്കിലും പ്രത്യേക രാജ്യത്തെയോ ലക്ഷ്യത്തെയോ ലക്ഷ്യമിട്ടുള്ളതല്ല ഇതെന്നും ചൈനീസ് വക്താവ് കൂട്ടിച്ചേർത്തു. എന്നാൽ മിസൈലിന്റെ പേരോ മറ്റ് സാങ്കേതിക വിവരങ്ങളോ ചൈന പുറത്തുവിട്ടിട്ടില്ല.
ചൈനീസ് നാവികസേനയുടെ പക്കൽ നിലവിൽ ‘JL-2’, ‘JL-3’ എന്നിങ്ങനെ രണ്ട് തരം സബ്മറൈൻ ബാലിസ്റ്റിക് മിസൈലുകളാണുള്ളത്. ഇതിൽ ‘JL-3’ മിസൈലുകൾക്ക് ചൈനീസ് തീരക്കടലിൽ നിന്നോ ദക്ഷിണ ചൈനാക്കടലിൽ നിന്നോ തൊടുത്തുവിട്ടാൽ പോലും അമേരിക്കൻ ഭൂഖണ്ഡത്തിലെ ലക്ഷ്യസ്ഥാനങ്ങളെ തകർക്കാനുള്ള പ്രഹരശേഷിയുണ്ടെന്നാണ് പ്രതിരോധ വിദഗ്ദ്ധർ വിലയിരുത്തുന്നത്. ചൈനയുടെ പക്കലുള്ള ആറ് ‘ടൈപ്പ് 094’ ആണവ അന്തർവാഹിനികളാണ് ഈ മിസൈലുകൾ വഹിക്കുന്നത്. ചൈന തങ്ങളുടെ ആണവശക്തി അതിവേഗം വർദ്ധിപ്പിക്കുന്നതിന്റെ ഭാഗമായാണ് ഈ അപ്രതീക്ഷിത നീക്കം.
ചൈനയുടെ മിസൈൽ പരീക്ഷണത്തിനെതിരെ കടുത്ത ഭാഷയിലാണ് ഓസ്ട്രേലിയയും ന്യൂസിലാൻഡും പ്രതികരിച്ചത്. 1986-ലെ രരോടോംഗ കരാർ പ്രകാരം പ്രഖ്യാപിച്ച ‘സൗത്ത് പസഫിക് ആണവമുക്ത മേഖല’യിലാണ് ചൈന മിസൈൽ പരീക്ഷിച്ചതെന്ന് ന്യൂസിലാൻഡ് വിദേശകാര്യമന്ത്രി വിൻസ്റ്റൺ പീറ്റേഴ്സ് കുറ്റപ്പെടുത്തി. ഈ മേഖലയെ മിസൈൽ പരീക്ഷണ കേന്ദ്രമാക്കാൻ ചൈന ശ്രമിക്കുന്നത് വച്ചുപൊറുപ്പിക്കാനാകില്ലെന്നും അദ്ദേഹം പറഞ്ഞു. 2024 സെപ്റ്റംബറിലും പസഫിക് സമുദ്രത്തിലേക്ക് ചൈന വൻതോതിൽ പ്രഹരശേഷിയുള്ള ഭൂഖണ്ഡാന്തര ബാലിസ്റ്റിക് മിസൈൽ പരീക്ഷിച്ചിരുന്നു.
ചൈനയുടെ നടപടി മേഖലയുടെ സുരക്ഷിതത്വത്തെയും തൽസ്ഥിതിയെയും അസ്ഥിരപ്പെടുത്തുന്നതാണെന്ന് ഓസ്ട്രേലിയൻ വിദേശകാര്യമന്ത്രി പെന്നി വോങ് വിമർശിച്ചു. ചൈനയുടെ ഭാഗത്തുനിന്നുണ്ടാകുന്ന അതിവേഗത്തിലുള്ള സൈനിക ശാക്തീകരണം സുതാര്യമല്ലെന്നും അയൽരാജ്യങ്ങളെ ഇത് ആശങ്കപ്പെടുത്തുന്നുണ്ടെന്നും അവർ കൂട്ടിച്ചേർത്തു.
Story Summary
China conducted a rare test-firing of a submarine-launched ballistic missile (SLBM) into the Pacific Ocean on Monday, drawing strong criticism from Australia and New Zealand. While Beijing described the launch of the dummy-warhead strategic missile as a routine annual training exercise, regional leaders condemned the move as destabilizing and a violation of the spirit of the South Pacific Nuclear Free Zone.
