കൊച്ചി: മൂന്ന് മലയാളികൾ ഉൾപ്പെടെ 16 ഇന്ത്യക്കാരടങ്ങിയ 26 നാവികരെ ഇക്വറ്റോറിയൽ ഗിനിയ അന്യായമായി തടവിൽ വെച്ച കേസിൽ നാവികർക്ക് അന്താരാഷ്ട്ര കോടതിയുടെ ചരിത്രവിജയം (MT Heroic Idun ITLOS verdict 2026). ജർമ്മനിയിലെ ഹാംബർഗ് ആസ്ഥാനമായി പ്രവർത്തിക്കുന്ന അന്താരാഷ്ട്ര സമുദ്ര നിയമ ട്രിബ്യൂണൽ (ITLOS – International Tribunal for the Law of the Sea) ആണ് നാവികരെ മുഴുവൻ കുറ്റവിമുക്തരാക്കിക്കൊണ്ട് നിർണ്ണായക വിധി പുറപ്പെടുവിച്ചത്. നാവികരെ അന്യായമായി കസ്റ്റഡിയിൽ വെച്ചതിന് ഇക്വറ്റോറിയൽ ഗിനിയ സർക്കാർ ഇവർക്ക് വൻ തുക നഷ്ടപരിഹാരം നൽകണമെന്നും കോടതി ഉത്തരവിൽ പറയുന്നു.
ഇതിനുപുറമെ, കേസിന്റെ ഭാഗമായി കപ്പൽ കമ്പനി കെട്ടിവെച്ച 2 മില്യൺ യൂറോ (ഏകദേശം 18 കോടിയിലധികം രൂപ) ഉൾപ്പെടെയുള്ള തുക പൂർണ്ണമായും തിരികെ നൽകാനും ഇന്റർനാഷണൽ ട്രിബ്യൂണൽ ഉത്തരവിട്ടിട്ടുണ്ട്. അന്താരാഷ്ട്ര കപ്പൽച്ചാൽ നിയമങ്ങൾ ലംഘിച്ചുവെന്നും ക്രൂഡോയിൽ കള്ളക്കടത്ത് നടത്താൻ ശ്രമിച്ചുവെന്നും ആരോപിച്ച് 2022 ഓഗസ്റ്റിലാണ് ‘എം.ടി. ഹീറോയിക് ഇഡുൻ’ (MT Heroic Idun) എന്ന എണ്ണക്കപ്പലും അതിലെ ജീവനക്കാരെയും ഇക്വറ്റോറിയൽ ഗിനിയൻ സൈന്യം തടവിലാക്കിയത്. മാസങ്ങളോളം നീണ്ട അനിശ്ചിതത്വങ്ങൾക്കും നയതന്ത്ര ചർച്ചകൾക്കും ഒടുവിൽ 2023 ജൂണിലാണ് നാവികർ മോചിതരായി നാട്ടിലെത്തിയത്.
തുടർന്ന് കപ്പലിന്റെ പതാക രാജ്യമായ മാർഷൽ ഐലൻഡ്സും ഇക്വറ്റോറിയൽ ഗിനിയയും തമ്മിൽ അന്താരാഷ്ട്ര കോടതിയിൽ നിയമപോരാട്ടം തുടരുകയായിരുന്നു. കോടതി വിധി വന്നതിന് പിന്നാലെ, സത്യം തെളിയിക്കാൻ ഒപ്പം നിന്ന എല്ലാവർക്കും ഹൃദയം നിറഞ്ഞ നന്ദി അറിയിക്കുന്നതായി കപ്പലിലെ ചീഫ് ഓഫീസറും കൊച്ചി സ്വദേശിയുമായ സനു ജോസ് പ്രതികരിച്ചു. ഒരു ഏകാധിപത്യ രാജ്യത്തിന്റെ കസ്റ്റഡിയിൽ ഇല്ലാത്ത കുറ്റം ചുമത്തി നേരിട്ട പീഡനങ്ങളും അന്യായമായ നടപടികളും ജീവിതത്തിലെ വലിയ വെല്ലുവിളിയായിരുന്നുവെന്നും ഒടുവിൽ നീതി നടപ്പിലായെന്നും അദ്ദേഹം വ്യക്തമാക്കി.
Story Summary: The International Tribunal for the Law of the Sea (ITLOS) has acquitted all 26 crew members, including 3 Malayalis, of the MT Heroic Idun who were wrongfully detained by Equatorial Guinea in August 2022. The court ordered Equatorial Guinea to pay compensation to the sailors and refund the €2 million deposit to the shipping company.
