ബോളിവുഡിലും തെന്നിന്ത്യയിലും ഒരുപോലെ തിളങ്ങിയ പ്രിയ നടി സമീറ റെഡ്ഡി സോഷ്യൽ മീഡിയയിൽ പങ്കുവെച്ച പുതിയ പോസ്റ്റാണ് ഇപ്പോൾ കാട്ടുതീ പോലെ പടരുന്നത് (Sameera Reddy). തന്റെ ബാഹ്യസൗന്ദര്യത്തിലോ ശരീരവടിവിലോ ലുക്കിലോ ഒന്നും തന്നെ താനിപ്പോൾ പണ്ടത്തെപ്പോലെ അനാവശ്യമായ സമ്മർദ്ദം ചെലുത്താറില്ലെന്ന് തുറന്നു പറയുകയാണ് താരം. പരമ്പരാഗത ശൈലിയിലുള്ള മനോഹരമായ സാരി ചിത്രങ്ങൾ പങ്കുവെച്ചുകൊണ്ടായിരുന്നു സമീറ തന്റെ ഇൻസ്റ്റഗ്രാം കുറിപ്പിലൂടെ ഈ മനസ്സ് തുറക്കൽ നടത്തിയത്. ഒരു പരിധിക്ക് അപ്പുറം സ്റ്റൈലിഷ് ആയി വസ്ത്രം ധരിച്ചു നടക്കാനുള്ള താല്പര്യമൊക്കെ തനിക്ക് കുറഞ്ഞു എന്നാണ് നടി വ്യക്തമാക്കുന്നത്.
“നന്നായി വസ്ത്രധാരണം നടത്തുന്നത് നിങ്ങളൊക്കെ ഇപ്പോഴും ആസ്വദിക്കുന്നുണ്ടോ? സത്യസന്ധമായി പറഞ്ഞാൽ എനിക്ക് അതിലുള്ള താല്പര്യമൊക്കെ പണ്ടേ പോയി. പക്ഷേ അതിനൊരു വ്യക്തമായ കാരണമുണ്ടായിരുന്നു. മുൻപൊക്കെ എന്റെ ലുക്ക് മറ്റുള്ളവരുടെ മുന്നിൽ എന്തായിരിക്കും എന്നോർത്ത് ഞാൻ വല്ലാതെ ആശങ്കപ്പെട്ടിരുന്നു. ഞാൻ പെർഫെക്ട് ആണോ, എന്റെ അപ്പിയറൻസ് മറ്റുള്ളവർക്ക് മുന്നിൽ നന്നാവുമോ എന്നൊക്കെയുള്ള അനാവശ്യമായ സമ്മർദ്ദം എപ്പോഴും എന്റെയുള്ളിൽ തന്നെയുണ്ടായിരുന്നു.
എന്നാൽ ഇപ്പോൾ എനിക്ക് എന്റെ ലുക്ക്, എന്റെ സ്റ്റൈൽ, എന്റെ രീതികൾ എന്ന നിലയിലേക്ക് ചിന്തകൾ പൂർണ്ണമായി മാറിയിരിക്കുന്നു. ഇപ്പോൾ യാതൊരുവിധ സ്ട്രസ്സുമില്ല. സ്വന്തം ലുക്കിലും അപ്പിയറൻസിലുമൊക്കെയുള്ള മറ്റുള്ളവരുടെ സമ്മർദ്ദം നിങ്ങൾ പൂർണ്ണമായി ഒഴിവാക്കി കഴിഞ്ഞാലുള്ള വൈബ് ഒന്ന് വേറെ തന്നെയാണ്. നിങ്ങൾ ഇത് അംഗീകരിക്കുന്നുണ്ടോ സ്ത്രീകളേ?” – എന്നാണ് സമീറ ഇൻസ്റ്റാഗ്രാമിൽ കുറിച്ചിരിക്കുന്നത്.
സമീറ പങ്കുവെച്ച ഈ കുറിപ്പ് ശരിയാണെന്നും തങ്ങളുടെ ജീവിതത്തിലും സമാനമായ അനുഭവങ്ങളുണ്ടെന്നും കാണിച്ച് ഭൂരിഭാഗം സ്ത്രീകളും പോസ്റ്റിന് താഴെ കമന്റുകളുമായി രംഗത്തെത്തിയിട്ടുണ്ട്. ലുക്കിനെക്കുറിച്ചുള്ള ആശങ്കകൾ മാറ്റിവെച്ചതോടെ സമീറ പഴയതിലും കൂടുതൽ സുന്ദരിയായിരിക്കുന്നു എന്നാണ് ആരാധകർ ഒന്നടങ്കം കുറിക്കുന്നത്.
Story Summary: Actress Sameera Reddy shared a powerful note on Instagram along with her saree pictures, stating that she no longer feels the pressure to look perfect. Fans and followers widely appreciated her honest take on body positivity and self-love.
