തിരുവനന്തപുരം: സംസ്ഥാനത്തിന്റെ സാമ്പത്തിക അവകാശങ്ങളിൽ കേന്ദ്ര സർക്കാർ ബോധപൂർവ്വം കടന്നുകയറുകയാണെന്ന് ധനമന്ത്രി കെ.എൻ. ബാലഗോപാൽ ബജറ്റ് പ്രസംഗത്തിൽ കുറ്റപ്പെടുത്തി. കേന്ദ്രത്തിന്റെ ശ്വാസംമുട്ടിക്കുന്ന നയങ്ങൾക്കെതിരെ ശക്തമായ പ്രതിഷേധമാണ് ധനമന്ത്രി സഭയിൽ രേഖപ്പെടുത്തിയത്.(The Centre is taking away the financial power of the states, says Finance Minister)
സംസ്ഥാനത്തിന് ഭരണഘടനാപരമായി ലഭിക്കേണ്ട നികുതി വിഹിതം കേന്ദ്രം ഗണ്യമായി വെട്ടിക്കുറയ്ക്കുന്നു. ഇത് സംസ്ഥാനത്തിന്റെ വികസന പ്രവർത്തനങ്ങളെ പ്രതികൂലമായി ബാധിക്കുന്നു. സംസ്ഥാനങ്ങൾക്ക് സ്വയം പണം കണ്ടെത്താനുള്ള വായ്പാ പരിധിയിൽ കേന്ദ്രം നിയന്ത്രണങ്ങൾ ഏർപ്പെടുത്തുന്നത് സാമ്പത്തിക സ്വാതന്ത്ര്യത്തിന് മേലുള്ള കടന്നുകയറ്റമാണ്.
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയെ കേന്ദ്രം അവഗണിക്കുകയാണ്. ഈ പദ്ധതിയുടെ “അന്ത്യത്തിന്റെ ആരംഭമാണ്” ഇപ്പോൾ കണ്ടുകൊണ്ടിരിക്കുന്നതെന്ന് മന്ത്രി ആരോപിച്ചു. സംസ്ഥാനങ്ങളുടെ സാമ്പത്തിക അധികാരം കേന്ദ്രം കവർന്നെടുക്കുന്നതിലൂടെ ഇന്ത്യയുടെ ഫെഡറൽ സംവിധാനം വെല്ലുവിളി നേരിടുകയാണെന്നും മന്ത്രി പറഞ്ഞു.
ഇത്രയേറെ സാമ്പത്തിക ഉപരോധങ്ങൾ കേന്ദ്രത്തിന്റെ ഭാഗത്തുനിന്ന് ഉണ്ടായിട്ടും കേരളം തളരാതെ പിടിച്ചുനിൽക്കുകയാണെന്ന് മന്ത്രി അവകാശപ്പെട്ടു.
