മുംബൈ: ഐപിഎൽ 2026 സീസണിൽ മുംബൈ ഇന്ത്യൻസ് ക്യാപ്റ്റൻ ഹാർദിക് പാണ്ഡ്യ തുടർച്ചയായി മത്സരങ്ങളിൽ നിന്ന് വിട്ടുനിൽക്കുന്നതിന്റെ കാരണം വ്യക്തമാക്കി സഹതാരം ശാർദൂൽ താക്കൂർ (Hardik Pandya Injury Update). പഞ്ചാബ് കിങ്സിനെതിരെയുള്ള മുംബൈയുടെ ആവേശകരമായ വിജയത്തിന് ശേഷം നടത്തിയ വാർത്താസമ്മേളനത്തിലാണ് ഹാർദിക്കിന് പരിക്കേറ്റ വിവരം ശാർദൂൽ വ്യക്തമാക്കിയത്. പരിക്കിൽ നിന്ന് പൂർണ്ണമായി മുക്തനാകാത്തതിനാലാണ് ഹാർദിക് കഴിഞ്ഞ മൂന്ന് മത്സരങ്ങളിൽ കളിക്കാതിരുന്നതെന്നും അടുത്ത ബുധനാഴ്ച കൊൽക്കത്ത നൈറ്റ് റൈഡേഴ്സിനെതിരെയുള്ള മത്സരത്തിൽ അദ്ദേഹം ടീമിലേക്ക് തിരിച്ചെത്തുമെന്നാണ് പ്രതീക്ഷയെന്നും ശാർദൂൽ പറഞ്ഞു. ഹാർദിക് മറ്റൊരു ഫ്രാഞ്ചൈസിയിലേക്ക് മാറുമെന്ന തരത്തിൽ സോഷ്യൽ മീഡിയയിൽ പ്രചരിക്കുന്ന വാർത്തകൾ വെറും അഭ്യൂഹങ്ങൾ മാത്രമാണെന്നും അദ്ദേഹം കൂട്ടിച്ചേർത്തു.
ചെന്നൈ സൂപ്പർ കിങ്സിനെതിരെയുള്ള മത്സരത്തിന് ശേഷമാണ് ഹാർദിക്കിന് പരിക്കേറ്റത്. കഴിഞ്ഞ മത്സരത്തിൽ കുഞ്ഞിന്റെ ജനനവുമായി ബന്ധപ്പെട്ട് സൂര്യകുമാർ യാദവും മാറിനിന്നതോടെ സ്റ്റാർ പേസർ ജസ്പ്രീത് ബുംറയാണ് മുംബൈയെ നയിച്ചത്. മത്സരത്തിൽ ആദ്യം ബാറ്റ് ചെയ്ത പഞ്ചാബ് കിങ്സ് പ്രഭ്സിമ്രാൻ സിങ്ങിന്റെ അർധസെഞ്ചുറിയുടെയും (57) അസ്മത്തുള്ള ഒമർസായിയുടെ (38) വെടിക്കെട്ട് ബാറ്റിങ്ങിന്റെയും കരുത്തിൽ 20 ഓവറിൽ 200 റൺസെടുത്തു. മുംബൈയ്ക്കായി ശാർദൂൽ താക്കൂർ നാല് വിക്കറ്റുകൾ വീഴ്ത്തി.
മറുപടി ബാറ്റിങ്ങിൽ റയൻ റിക്കൽട്ടൺ (48), രോഹിത് ശർമ്മ (25) എന്നിവർ മികച്ച തുടക്കം നൽകിയെങ്കിലും പിന്നീട് മുംബൈ തകർന്നു. എന്നാൽ, അഞ്ചാം വിക്കറ്റിൽ ഒന്നിച്ച തിലക് വർമ്മയുടെയും (33 പന്തിൽ 75*) വിൽ ജാക്സിന്റെയും (10 പന്തിൽ 25*) തകർപ്പൻ പ്രകടനമാണ് അവസാന ഓവറിലെ അഞ്ചാം പന്തിൽ മുംബൈയ്ക്ക് നാല് വിക്കറ്റിന്റെ വിജയം സമ്മാനിച്ചത്. നിലവിൽ എട്ട് പോയിന്റോടെ മുംബൈ ഇന്ത്യൻസ് പട്ടികയിൽ എട്ടാം സ്ഥാനത്താണ്.
Summary: Mumbai Indians all-rounder Shardul Thakur dismissed social media trade rumors and revealed that regular captain Hardik Pandya has been sidelined due to an injury. Hardik, who missed the last three games, is currently training in Mumbai and is expected to return for the upcoming match against Kolkata Knight Riders. In his absence, Jasprit Bumrah led MI to a thrilling four-wicket victory over Punjab Kings, powered by Shardul’s four-wicket haul and Tilak Varma’s explosive unbeaten 75.
