മുംബൈ: ടി20 മുംബൈ ലീഗിൽ ബാറ്റിംഗിലും ബോളിംഗിലും ഒരുപോലെ അത്യുഗ്രൻ പ്രകടനം പുറത്തെടുത്ത് സച്ചിൻ തെണ്ടുൽക്കറുടെ മകൻ അർജുൻ തെണ്ടുൽക്കർ (Arjun Tendulkar T20 Mumbai League). വാങ്കഡെ സ്റ്റേഡിയത്തിൽ തിങ്കളാഴ്ച നടന്ന മത്സരത്തിൽ ബാന്ദ്ര ബ്ലാസ്റ്റേഴ്സിനെതിരെ ആർക്സ് അന്ധേരി ഒൻപത് വിക്കറ്റിന്റെ തകർപ്പൻ വിജയമാണ് സ്വന്തമാക്കിയത്. ആദ്യം ബോൾ ചെയ്ത അന്ധേരിക്ക് വേണ്ടി മൂന്ന് ഓവറിൽ വെറും 11 റൺസ് മാത്രം വിട്ടുനൽകി മൂന്ന് സുപ്രധാന വിക്കറ്റുകളാണ് ഇടംകയ്യൻ പേസറായ അർജുൻ വീഴ്ത്തിയത്. അർജുന്റെ മികച്ച ബോളിംഗ് പ്രകടനത്തിന്റെ കരുത്തിൽ ബാന്ദ്ര ബ്ലാസ്റ്റേഴ്സിനെ 20 ഓവറിൽ 144/9 എന്ന സ്കോറിലേക്ക് ചുരുക്കാൻ അന്ധേരിക്ക് സാധിച്ചു.
മറുപടി ബാറ്റിംഗിൽ മൂന്നാം നമ്പറിലിറങ്ങിയ അർജുൻ തെണ്ടുൽക്കർ വാങ്കഡെയിൽ സിക്സർ മഴ തീർക്കുകയായിരുന്നു. വെറും 25 പന്തുകളിൽ നിന്ന് അർധസെഞ്ച്വറി തികച്ച താരം 34 പന്തുകളിൽ നിന്ന് 4 ഫോറുകളും 5 സിക്സറുകളും അടക്കം 66 റൺസ് നേടി പുറത്താകാതെ നിന്നു. രണ്ടാം വിക്കറ്റിൽ മുഷീർ ഖാനൊപ്പം (38 പന്തിൽ 54 നോട്ടൗട്ട്) ചേർന്ന് 116 റൺസിന്റെ അപരാജിത കൂട്ടുകെട്ടുണ്ടാക്കിയ അർജുൻ, 13.5 ഓവറിൽ തന്നെ അന്ധേരിയെ ലക്ഷ്യത്തിലെത്തിച്ചു. മത്സരത്തിനിടെ അർജുൻ അടിച്ച ഒരു സിക്സർ ഗാലറിയിലുണ്ടായിരുന്ന ഒരു കൊച്ചുകുട്ടിയുടെ തലയിൽ തട്ടി പരിക്കേൽപ്പിച്ചെങ്കിലും, മത്സരശേഷം താരം നേരിട്ടെത്തി ആ കുട്ടിയെ കാണുകയും ഒപ്പിട്ട മാച്ച് ബോൾ സമ്മാനമായി നൽകുകയും ചെയ്തത് വലിയ കയ്യടി നേടി. അർജുന്റെ ഓൾറൗണ്ട് പ്രകടനത്തെ ഇന്ത്യൻ മുൻ സ്പിന്നർ ആർ. അശ്വിൻ ഉൾപ്പെടെയുള്ള പ്രമുഖർ അഭിനന്ദിച്ചു.
Summary: Arjun Tendulkar delivered an outstanding all-round performance to guide Arcs Andheri to a comprehensive nine-wicket victory over Bandra Blasters in the T20 Mumbai League 2026 at the Wankhede Stadium. Bowling first, the left-arm pacer registered brilliant figures of 3/11 in his three overs, restricted the opposition to 144/9, and then smashed an unbeaten 66 off just 34 balls coming in at number three.
