കൊൽക്കത്ത: തൃണമൂൽ കോൺഗ്രസ് (TMC) എംഎൽഎമാരുടെ വ്യാജ ഒപ്പിട്ടെന്ന പരാതിയുമായി ബന്ധപ്പെട്ട് മുൻ പശ്ചിമ ബംഗാൾ മുഖ്യമന്ത്രി മമത ബാനർജിയുടെ കൊൽക്കത്തയിലെ വസതിയിൽ പശ്ചിമ ബംഗാൾ പോലീസിന്റെ ക്രൈം ഇൻവെസ്റ്റിഗേഷൻ ഡിപ്പാർട്ട്മെന്റ് (CID) മിന്നൽ പരിശോധന നടത്തി (Mamata Banerjee residence CID raid Kolkata). ഹരീഷ് ചാറ്റർജി സ്ട്രീറ്റിലെ 30ബി വസതിയിലാണ് സിഐഡി ഉദ്യോഗസ്ഥരെത്തി വിശദമായ തിരച്ചിൽ നടത്തിയത്.
ഈ വിലാസം തൃണമൂൽ കോൺഗ്രസിന്റെ ഔദ്യോഗിക പാർട്ടി ഓഫീസായാണ് നിലവിൽ ഉപയോഗിക്കുന്നതെന്ന് ചൂണ്ടിക്കാട്ടിയാണ് സിഐഡി സംഘം പരിശോധനയ്ക്കുള്ള അനുമതി തേടിയത്. തുടർന്ന് സ്ഥലത്തുണ്ടായിരുന്ന പാർട്ടി ഭാരവാഹികളും ഉദ്യോഗസ്ഥരും തമ്മിൽ മിനിറ്റുകളോളം നീണ്ട രൂക്ഷമായ തർക്കത്തിനൊടുവിലാണ് സിഐഡി സംഘം മമതയുടെ വസതിക്ക് ഉള്ളിലേക്ക് പ്രവേശിച്ചത്.
മമത ബാനർജിയും പാർട്ടി ജനറൽ സെക്രട്ടറിയായ അഭിഷേക് ബാനർജിയും നിലവിൽ വീട്ടിൽ ഇല്ലെന്നും അതിനാൽ പരിശോധന അനുവദിക്കാനാകില്ലെന്നും മുൻ ടിഎംസി എംപി സുഭാഷിഷ് ചക്രവർത്തി പറഞ്ഞു. ഇരുവരും തിരിച്ചെത്തിയ ശേഷം ഒന്നോ രണ്ടോ ദിവസത്തിന് ശേഷം വരാൻ അദ്ദേഹം ആവശ്യപ്പെട്ടെങ്കിലും സിഐഡി ഉദ്യോഗസ്ഥർ ഈ ആവശ്യം പൂർണ്ണമായി തള്ളി. സുഭാഷിഷ് ചക്രവർത്തി ഔദ്യോഗിക അന്വേഷണം തടസ്സപ്പെടുത്തുകയാണെന്ന് ഉദ്യോഗസ്ഥർ കുറ്റപ്പെടുത്തുകയും ചെയ്തു.
നിയമസഭയിലെ നിലവിലെ പ്രതിപക്ഷ നേതാവായി ശോഭൻദേബ് ചതോപാധ്യായയെ നാമനിർദ്ദേശം ചെയ്തുകൊണ്ട് മേയ് 20-ന് സ്പീക്കർക്ക് നൽകിയ കത്തിൽ തങ്ങളുടെ ഒപ്പുകൾ വ്യാജമായി രേഖപ്പെടുത്തിയതാണെന്ന് ആരോപിച്ച് പാർട്ടി എംഎൽഎമാരായ ഋതബ്രത ബാനർജിയും സന്ദീപൻ സാഹയും രംഗത്തെത്തിയിരുന്നു. പരാതി ഉന്നയിച്ചതിന് പിന്നാലെ ഇവരെ തൃണമൂൽ കോൺഗ്രസിൽ നിന്ന് പുറത്താക്കുകയും ചെയ്തിരുന്നു.
ഈ പരാതിയുടെ അടിസ്ഥാനത്തിൽ കൊൽക്കത്തയിലെ ഹരേ സ്ട്രീറ്റ് പോലീസ് സ്റ്റേഷനിൽ രജിസ്റ്റർ ചെയ്ത എഫ്ഐആർ (FIR) പിന്നീട് അതീവ പ്രാധാന്യത്തോടെ സിഐഡിക്ക് കൈമാറുകയായിരുന്നു. വിവാദ കത്തിൽ ഒപ്പുവെച്ച പാർട്ടി ജനറൽ സെക്രട്ടറി അഭിഷേക് ബാനർജിക്ക് സിഐഡി നിരവധി തവണ ചോദ്യം ചെയ്യലിനായി സമൻസ് അയച്ചിരുന്നെങ്കിലും ആരോഗ്യപ്രശ്നങ്ങൾ ചൂണ്ടിക്കാട്ടി അദ്ദേഹം ഇതുവരെ ഹാജരാകാൻ തയ്യാറായിരുന്നില്ല. ഇതിന് പിന്നാലെയാണ് ഇപ്പോൾ പാർട്ടി ഓഫീസുകൂടിയായ വസതിയിലേക്ക് നേരിട്ടെത്തി സിഐഡി തെരച്ചിൽ നടത്തിയത്.
Story Summary: The West Bengal CID conducted a raid at the Kolkata residence of former Chief Minister Mamata Banerjee in connection with a forgery case involving fake signatures of TMC MLAs. The search at the 30B Harish Chatterjee Street residence, also used as a party office, took place after a heated argument with party leaders. The case followed complaints by expelled TMC MLAs Ritabrata Banerjee and Sandipan Saha, who alleged their signatures were forged on a letter recommending Sobhandeb Chattopadhyay as Opposition Leader.
