കൊച്ചി: ഡിജിറ്റൽ പണമിടപാട് രംഗത്ത് ആഗോളതലത്തിൽ വീണ്ടുമൊരു ചരിത്ര നേട്ടം സ്വന്തമാക്കി ഇന്ത്യ (UPI in Cambodia). ഇനി മുതൽ കമ്പോഡിയ സന്ദർശിക്കുന്ന ഇന്ത്യൻ വിനോദസഞ്ചാരികൾക്കും വ്യാപാരികൾക്കും കമ്പോഡിയയുടെ ദേശീയ ക്യുആർ കോഡ് ആയ കെഎച്ച്ക്യുആർ (KHQR) സ്കാൻ ചെയ്ത് അവിടെയുള്ള 45 ലക്ഷത്തിലധികം കച്ചവട സ്ഥാപനങ്ങളിൽ സുഗമമായി പണമിടപാടുകൾ നടത്താം. നാഷണൽ പെയ്മെന്റ്സ് കോർപ്പറേഷൻ ഓഫ് ഇന്ത്യയുടെ (NPCI) അന്താരാഷ്ട്ര വിഭാഗമായ എൻപിസിഐ ഇന്റർനാഷണൽ പെയ്മെന്റ്സ് ലിമിറ്റഡ് (NIPL), കമ്പോഡിയയിലെ പ്രമുഖ സാമ്പത്തിക സ്ഥാപനമായ അക്ലെഡാ ബാങ്കുമായി (Acleda Bank) കൈകോർത്താണ് ഈ പുതിയ ക്രോസ്-ബോർഡർ യുപിഐ സംവിവധാനം യാഥാർത്ഥ്യമാക്കിയത്.
കമ്പോഡിയൻ തലസ്ഥാനമായ ഫ്നോം പെന്നിൽ (Phnom Penh) വെച്ച് നടന്ന ഔദ്യോഗിക ചടങ്ങിൽ കമ്പോഡിയ ദേശീയ ബാങ്ക് ഗവർണർ ഡോ. ചെയ സെറെ, ഇന്ത്യൻ റിസർവ് ബാങ്ക് (RBI) പ്രതിനിധികൾ എന്നിവരുടെ സാന്നിധ്യത്തിലാണ് പദ്ധതിക്ക് ഔപചാരികമായ തുടക്കം കുറിച്ചത്. ഇരു രാജ്യങ്ങൾക്കുമിടയിലുള്ള വിനോദസഞ്ചാരം, വ്യാപാരം, സാംസ്കാരിക ബന്ധങ്ങൾ എന്നിവ വലിയ രീതിയിൽ മെച്ചപ്പെടുത്താൻ ഈ ഡിജിറ്റൽ പങ്കാളിത്തം സഹായിക്കുമെന്നാണ് വിലയിരുത്തപ്പെടുന്നത്.
ഡിജിറ്റൽ പെയ്മെന്റ് രംഗത്ത് ഇന്ത്യ കൊണ്ടുവരുന്ന വിപ്ലവകരമായ പുതുമകൾ ആഗോള വിപണികളിലേക്ക് വ്യാപിപ്പിക്കാനാണ് എൻപിസിഐ ഇന്റർനാഷണൽ നിരന്തരം ശ്രമിക്കുന്നതെന്ന് കമ്പനി മാനേജിങ് ഡയറക്ടറും സിഇഒയുമായ റിതേഷ് ശുക്ല പറഞ്ഞു. ഇന്ത്യൻ യാത്രക്കാർക്ക് സ്വന്തം രാജ്യത്ത് ലഭിക്കുന്ന അതേ രീതിയിലുള്ള സുരക്ഷിതവും സൗകര്യപ്രദവും പരിചിതവുമായ യുപിഐ (UPI) പണമടയ്ക്കൽ സംവിധാനം വിദേശത്തും ഇതിലൂടെ ലഭ്യമാവുകയാണെന്നും അദ്ദേഹം കൂട്ടിച്ചേർത്തു.
ഇന്ത്യ-കമ്പോഡിയ ക്രോസ്-ബോർഡർ ഇന്ററോപ്പറബിലിറ്റി (Cross-Border Interoperability) പദ്ധതിയുടെ ആദ്യഘട്ടം ആരംഭിക്കുന്നതിൽ അക്ലെഡാ ബാങ്ക് പിഎൽസിക്ക് വലിയ അഭിമാനമുണ്ടെന്ന് ബാങ്ക് പ്രസിഡന്റും ഗ്രൂപ്പ് മാനേജിംഗ് ഡയറക്ടറുമായ ഡോ. ഇൻ ചന്നി വ്യക്തമാക്കി. ഈ സാങ്കേതിക വിദ്യയിലൂടെ കമ്പോഡിയയിലെത്തുന്ന ഇന്ത്യൻ യാത്രികർക്ക് തങ്ങളുടെ ഫോണിലുള്ള യുപിഐ സൗകര്യമുള്ള ഏത് ആപ്ലിക്കേഷനുകൾ (Google Pay, PhonePe, Paytm തുടങ്ങിയവ) ഉപയോഗിച്ചും വളരെ വേഗത്തിലും സുരക്ഷിതമായും ഡിജിറ്റൽ ഇടപാടുകൾ പൂർത്തിയാക്കാൻ സാധിക്കുമെന്നും അദ്ദേഹം പറഞ്ഞു. കറൻസി മാറ്റുന്നതിലെ ബുദ്ധിമുട്ടുകൾ ഒഴിവാക്കാൻ സഹായിക്കുന്ന ഈ സംവിധാനം ഇന്ത്യൻ പ്രവാസികൾക്കും സഞ്ചാരികൾക്കും വലിയൊരു അനുഗ്രഹമാകും.
Story Summary: NPCI International Payments has partnered with Cambodia’s Acleda Bank to enable UPI payments for Indian tourists in Cambodia. Users can now scan Cambodia’s national KHQR code across 45 lakh merchant locations using any UPI-enabled app. Launched in Phnom Penh in the presence of National Bank of Cambodia Governor Dr. Chea Serey and RBI officials, this initiative aims to boost cross-border tourism and business transactions.
