ചെന്നൈ: തമിഴ്നാട് നിയമസഭാ തെരഞ്ഞെടുപ്പിലെ കനത്ത പരാജയത്തിന് പിന്നാലെ അണ്ണാഡിഎംകെയിൽ ആഭ്യന്തര തർക്കങ്ങൾ രൂക്ഷമാകുന്നു. എടപ്പാടി പളനിസ്വാമി നേതൃത്വം നൽകുന്ന പാർട്ടിയിലെ വിമത വിഭാഗത്തിൽപ്പെട്ട മൂന്ന് മുൻനിര എം.എ.എമാർ തങ്ങളുടെ നിയമസഭാംഗത്വം രാജിവെച്ച് മുഖ്യമന്ത്രി സി. ജോസഫ് വിജയുടെ നേതൃത്വത്തിലുള്ള തമിഴക വെട്രി കഴകത്തിന് പിന്തുണ പ്രഖ്യാപിച്ചു.(Three AIADMK MLAs Resign And Join CM Vijays TVK Five Return To EPS Camp)
മരഗതം കുമാരവേൽ, ജയകുമാർ, സത്യഭാമ എന്നിവരാണ് തങ്ങളുടെ രാജിപ്പത്രിക തമിഴ്നാട് നിയമസഭാ സ്പീക്കർ ജെ.സി.ഡി. പ്രഭാകറിന് സമർപ്പിച്ചത്. മുതിർന്ന നേതാവ് സി.വി. ഷൺമുഖത്തിന്റെ നേതൃത്വത്തിൽ 25 അണ്ണാഡിഎംകെ എം.എൽ.എമാർ വിജയുടെ ടി.വി.കെ സർക്കാരിന് പിന്തുണ പ്രഖ്യാപിച്ച് രണ്ടാഴ്ച തികയുന്നതിനിടയിലാണ് ഈ പുതിയ രാഷ്ട്രീയ നീക്കം. രാജി സമർപ്പിച്ചതിന് തൊട്ടുപിന്നാലെ മൂവരും ടി.വി.കെ മന്ത്രി ആദവ് അർജുനയുമായി അദ്ദേഹത്തിന്റെ ചേംബറിൽ കൂടിക്കാഴ്ച നടത്തി.
പാർട്ടി വിപ്പ് ലംഘിച്ച് മെയ് 13-ന് നടന്ന വിശ്വാസ വോട്ടെടുപ്പിൽ വിജയ് സർക്കാരിനെ പിന്തുണച്ച് വോട്ട് ചെയ്ത 25 വിമതരിൽ ഉൾപ്പെട്ടവരാണ് ഇപ്പോൾ രാജിവെച്ച മൂന്ന് പേരും. അണ്ണാഡിഎംകെയുടെ പരമ്പരാഗത കോട്ടകളിൽ നിന്നുള്ള ജനപ്രതിനിധികളുടെ രാജി പാർട്ടിക്ക് വലിയ ആഘാതമാണ് സൃഷ്ടിച്ചിരിക്കുന്നത്. മരഗതം കുമാരവേൽ ചെന്നൈയ്ക്ക് സമീപമുള്ള മധുരാന്തകം മണ്ഡലത്തിൽ നിന്നുള്ള പ്രതിനിധിയാണ്. പി. സത്യഭാമ പടിഞ്ഞാറൻ തമിഴ്നാട്ടിലെ അണ്ണാഡിഎംകെയുടെ ശക്തമായ കോട്ടയായ ധാരാപുരം മണ്ഡലത്തിൽ നിന്നുള്ള പ്രതിനിധിയും, എസ്. ജയകുമാർ കൊങ്കു മേഖലയിലെ തന്നെ പെരുന്തുറൈ മണ്ഡലത്തിൽ നിന്നുള്ള പ്രതിനിധിയുമാണ്.
അതേസമയം, പാർട്ടി പിളർപ്പിലേക്ക് നീങ്ങുന്നതിനിടയിൽ എടപ്പാടി പളനിസ്വാമിക്ക് ആശ്വാസമായി അഞ്ച് എം.എൽ.എമാർ മാതൃസംഘടനയിലേക്ക് തിരിച്ചെത്തി. സി.വി. ഷൺമുഖം – എസ്.പി. വേലുമണി ക്യാമ്പിൽ ഉറച്ചുനിന്നിരുന്ന അഞ്ച് പേരാണ് വിമത നീക്കം ഉപേക്ഷിച്ച് പാർട്ടി ജനറൽ സെക്രട്ടറി എടപ്പാടി പളനിസ്വാമിയോട് വീണ്ടും ആഭിമുഖ്യം പ്രഖ്യാപിച്ചത്. ആർക്കോട്ട് മണ്ഡലത്തിൽ നിന്നുള്ള എം.എൽ.എയായ എസ്.എം. സുകുമാർ ഉൾപ്പെടെയുള്ളവരാണ് ഇ.പി.എസ് ക്യാമ്പിലേക്ക് മടങ്ങിയെത്തിയത്. അഞ്ച് പേർ തിരിച്ചെത്തിയതോടെ നിയമസഭയിൽ പളനിസ്വാമിയെ പിന്തുണയ്ക്കുന്ന ഔദ്യോഗിക അണ്ണാഡിഎംകെ എം.എൽ.എമാരുടെ എണ്ണം 27 ആയി ഉയർന്നു. മൂന്ന് പേരുടെ രാജിയും അഞ്ച് പേരുടെ മടങ്ങിവരവും കൂടിയായപ്പോൾ, വിജയ് സർക്കാരിനെ പിന്തുണച്ചിരുന്ന സി.വി. ഷൺമുഖത്തിന്റെ നേതൃത്വത്തിലുള്ള വിമത വിഭാഗത്തിന്റെ ബലം 25-ൽ നിന്നും വെറും 17 ആയി ചുരുങ്ങി.
Story Summary
In a blow to the AIADMK, three rebel MLAs—Maragatham Kumaravel, Jayakumar, and Sathyabama—resigned from the Tamil Nadu Assembly and joined CM Vijay’s TVK party. Meanwhile, five other rebel MLAs returned to Edappadi Palaniswami’s camp, boosting his strength to 27, while reducing the strength of the rebel faction led by CV Shanmugam to 17.
