Follow on Google News
ന്യൂഡൽഹി: തന്നെ സിനിമയ്ക്ക് ക്ഷണിച്ച അധ്യാപികയുടെ വാട്സാപ്പ് ചാറ്റിന്റെ സ്ക്രീൻഷോട്ടുകൾ വിദ്യാർത്ഥി സോഷ്യൽ മീഡിയയിൽ പങ്കുവെച്ചതോടെ വലിയ ചർച്ചകൾക്ക് തുടക്കമായിരിക്കുകയാണ് (Teacher Invites Student to Movie). അധ്യാപികയുടെ പെരുമാറ്റം തികച്ചും പ്രൊഫഷണൽ അല്ലാത്തതും അതിർവരമ്പുകൾ ലംഘിക്കുന്നതുമാണെന്ന് ചൂണ്ടിക്കാട്ടി നിരവധി പേരാണ് രംഗത്തെത്തിയത്. റെഡ്ഡിറ്റിലാണ് വിദ്യാർത്ഥി ഈ അനുഭവം പങ്കുവെച്ചത്.
പതിനെട്ട് വയസ്സുകാരനായ വിദ്യാർത്ഥിയെയാണ് 28 വയസ്സോളം പ്രായമുള്ള അധ്യാപിക സിനിമയ്ക്ക് ക്ഷണിച്ചത്. “നാളെ നിനക്ക് ഒരു ക്ലാസ്സ് മാത്രമേ ഉള്ളൂവല്ലോ, എന്റെ കൂടെ ‘പ്രോജക്റ്റ് ഹെയിൽ മേരി’ കാണാൻ വരുന്നോ? നീ വരികയാണെങ്കിൽ ഞാൻ അതിനായി പകുതി ദിവസം അവധി എടുക്കാം” എന്നായിരുന്നു ടീച്ചറുടെ സന്ദേശം. എന്നാൽ അധ്യാപികയെ നേരിട്ട് എതിർക്കാതെ തനിക്ക് സുഹൃത്തുക്കളുമായി മറ്റ് പരിപാടികൾ ഉണ്ടെന്ന് പറഞ്ഞ് വിദ്യാർത്ഥി ഒഴിയാൻ ശ്രമിച്ചു. എന്നാൽ ആ പ്ലാനുകൾ മാറ്റി വെച്ച് വരാൻ അധ്യാപിക വീണ്ടും നിർബന്ധിച്ചെങ്കിലും താൻ വരുന്നില്ലെന്ന് വിദ്യാർത്ഥി ഉറപ്പിച്ചു പറഞ്ഞു.
My teacher asked me to go for a movie with her🙀😭🙏🏻
by
u/No_Falcon_9178 in
TeenIndia
വിദ്യാർത്ഥി ഈ ചാറ്റ് പങ്കുവെച്ചതോടെ അധ്യാപകർ പാലിക്കേണ്ട ധാർമ്മികതയെക്കുറിച്ച് വലിയ ചർച്ചകളാണ് നടക്കുന്നത്. അധ്യാപികയുടെ പെരുമാറ്റം കുട്ടികളെ അസ്വസ്ഥരാക്കുന്നതാണെന്നും ഇത് സ്കൂൾ അധികൃതരെ അറിയിക്കണമെന്നും പലരും അഭിപ്രായപ്പെട്ടു. ലിംഗഭേദമന്യേ ഇത്തരം പെരുമാറ്റങ്ങൾ തെറ്റാണെന്ന് വിദ്യാർത്ഥി പോസ്റ്റിന് താഴെ കുറിച്ചു. വിദ്യാർത്ഥി പക്വതയോടെ സാഹചര്യത്തെ നേരിട്ടതിനെ പലരും അഭിനന്ദിച്ചു. എന്നാൽ ഇത് അധ്യാപിക വെറുമൊരു സൗഹൃദത്തിന് വേണ്ടി ചെയ്തതാണോ എന്ന് സംശയിക്കുന്നവരും ചുരുക്കമല്ല.
