വിയറ്റ്നാമിലെ ഫു കുവാക്ക് ദ്വീപിന് സമീപം ജൂലൈ 11-നുണ്ടായ ബോട്ട് അപകടത്തിൽ മരിച്ച 15 ഇന്ത്യക്കാരുടെ മൃതദേഹം മുംബൈയിലെത്തിച്ചു (Vietnam Boat Tragedy). വിയറ്റ്നാം എയർലൈൻസിന്റെ വിമാനത്തിലാണ് മൃതദേഹങ്ങൾ എത്തിച്ചത്. ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിൽ എത്തിച്ച മൃതദേഹങ്ങൾ, അതത് സംസ്ഥാന സർക്കാരുകളുടെ സഹായത്തോടെ ചെന്നൈ, ഹൈദരാബാദ്, തിരുവനന്തപുരം, കോയമ്പത്തൂർ എന്നിവിടങ്ങളിലേക്ക് കൊണ്ടുപോകും.
32 ഇന്ത്യൻ വിനോദസഞ്ചാരികളും നാല് വിയറ്റ്നാമീസ് ജീവനക്കാരുമടക്കം 36 പേരുമായി സഞ്ചരിച്ച സ്പീഡ് ബോട്ട് ഹോൺ മേ റൂട്ട് എൻഗോയ് ദ്വീപിന് സമീപം മറിഞ്ഞാണ് അപകടം നടന്നത്. പ്രതികൂല കാലാവസ്ഥയെത്തുടർന്ന് ബോട്ട് മറിയുകയായിരുന്നു. 21 പേരെ രക്ഷപ്പെടുത്താൻ സാധിച്ചെങ്കിലും 15 പേർക്ക് ജീവൻ നഷ്ടപ്പെട്ടു. മരിച്ചവരിൽ 10 പേർ തമിഴ്നാട്ടിൽ നിന്നുള്ളവരും, മൂന്നുപേർ ആന്ധ്രാപ്രദേശിൽ നിന്നുള്ളവരും, രണ്ടുപേർ കേരളത്തിൽ നിന്നുള്ളവരുമാണ്.
ഇന്ത്യൻ എംബസിയും ഹോ ചി മിൻ സിറ്റിയിലെ കോൺസുലേറ്റ് ജനറലും വിയറ്റ്നാമീസ് അധികൃതരുമായി ചേർന്ന് മൃതദേഹങ്ങൾ തിരിച്ചറിയുന്നതിനും മറ്റ് നടപടിക്രമങ്ങൾ വേഗത്തിലാക്കാനും വലിയ ഇടപെടലാണ് നടത്തിയത്. ഗുരുതരമായി പരിക്കേറ്റ ഒരാൾക്ക് അടിയന്തര ചികിത്സ ലഭ്യമാക്കുകയും പിന്നീട് കൂടുതൽ വിദഗ്ധ ചികിത്സയ്ക്കായി ഹോ ചി മിൻ സിറ്റിയിലെ ആശുപത്രിയിലേക്ക് മാറ്റുകയും ചെയ്തിട്ടുണ്ട്. അപകടത്തിന് കാരണമായ സാഹചര്യം പരിശോധിക്കുമെന്നും അധികൃതർ വ്യക്തമാക്കി.
Summary: The mortal remains of the 15 Indian nationals who perished in the Vietnam boat tragedy on July 11 have arrived in Mumbai and are being transported to their home states, including Kerala, Tamil Nadu, and Andhra Pradesh, for final rites. Following the capsizing of a tourist speedboat off Phu Quoc Island, Indian diplomatic missions worked closely with Vietnamese authorities to facilitate the repatriation of the victims and provide support to the survivors.
