ചെന്നൈ: തമിഴ്നാട്ടിലെ സ്ത്രീ സുരക്ഷ ഉറപ്പാക്കാൻ മുഖ്യമന്ത്രി സി. ജോസഫ് വിജയ് പ്രഖ്യാപിച്ച ‘സിങ്കപ്പെൺ’ പ്രത്യേക ദൗത്യസേന ഔദ്യോഗികമായി നിലവിൽ വന്നു (Singapen Special Task Force). ചെന്നൈയിൽ നടന്ന പ്രൗഢമായ ചടങ്ങിൽ മുഖ്യമന്ത്രി സേനയുടെ ലോഗോ പ്രകാശനം ചെയ്തു. സേനയ്ക്കായി പ്രത്യേകം സജ്ജമാക്കിയ വാഹനങ്ങൾ അദ്ദേഹം നേരിട്ട് ഓടിച്ചാണ് ഉദ്യോഗസ്ഥർക്ക് കൈമാറിയത്. സത്യപ്രതിജ്ഞാ ദിവസം നൽകിയ പ്രധാന വാഗ്ദാനങ്ങളിലൊന്നാണ് വിജയ് ഇതോടെ നിറവേറ്റിയിരിക്കുന്നത്. 2500 വനിതാ പോലീസ് ഉദ്യോഗസ്ഥരെ ഉൾപ്പെടുത്തിയാണ് ഈ സേന രൂപീകരിക്കുന്നത്. സംസ്ഥാനത്തെ കുറ്റകൃത്യങ്ങൾ തടയുക, സ്ത്രീകൾക്കെതിരായ അതിക്രമങ്ങൾക്കെതിരെ കർശന നടപടി സ്വീകരിക്കുക എന്നിവയാണ് ഈ പ്രത്യേക ദൗത്യസേനയുടെ പ്രധാന ലക്ഷ്യം.
ചടങ്ങിൽ സംസാരിച്ച മുഖ്യമന്ത്രി വിജയ്, മുൻ ഡി.എം.കെ സർക്കാർ ലഹരിമരുന്ന് ഒഴുക്ക് തടയുന്നതിൽ പരാജയപ്പെട്ടത് മൂലമാണ് സംസ്ഥാനത്ത് കുറ്റകൃത്യങ്ങൾ വർധിച്ചതെന്ന് രൂക്ഷമായി വിമർശിച്ചു. അതേസമയം, മുഖ്യമന്ത്രിയുമായി നടത്തിയ കൂടിക്കാഴ്ചയ്ക്ക് ശേഷം എൻ.ഡി.എ നേതാവും പി.എം.കെ അധ്യക്ഷനുമായ അൻപുമണി രാമദാസ് സർക്കാരിനെ അഭിനന്ദിച്ച് രംഗത്തെത്തി. സർക്കാർ അധികാരമേറ്റ് ഒരു മാസം തികയുമ്പോൾ തന്നെ അഴിമതിയിൽ വലിയ കുറവ് ദൃശ്യമാണെന്നും, തമിഴ്നാട്ടിൽ ജാതി സെൻസസ് നടത്താമെന്ന് മുഖ്യമന്ത്രി തനിക്ക് ഉറപ്പുനൽകിയതായും അദ്ദേഹം മാധ്യമങ്ങളോട് വ്യക്തമാക്കി. മന്ത്രിമാരും വിജയുടെ അമ്മയും ഉൾപ്പെടെയുള്ള പ്രമുഖർ ചടങ്ങിൽ സംബന്ധിച്ചു.
Summary: Fulfilling a key electoral promise made on his swearing-in day, Tamil Nadu Chief Minister C. Joseph Vijay has officially launched the ‘Singapen’ special task force dedicated to women’s safety. During a formal event in Chennai, the Chief Minister unveiled the unit’s logo and personally inaugurated their patrol fleet. Comprising 2,500 female police officers, the force is specifically mandated to curb criminal activities and enhance protection for women across the state.
