ചെന്നൈ: തമിഴ്നാട് ബി.ജെ.പിയിൽ പ്രതിസന്ധികൾ തുടരുന്നു. മുൻ സംസ്ഥാന അധ്യക്ഷൻ കെ. അണ്ണാമലൈ, വൈസ് പ്രസിഡന്റ് കരു നാഗരാജൻ എന്നിവർക്ക് പിന്നാലെ പാർട്ടി സംസ്ഥാന സെക്രട്ടറി സുമതി വെങ്കടേഷും രാജി പ്രഖ്യാപിച്ചു. എക്സിലൂടെ ആയിരുന്നു സുമതി തന്റെ രാജി വാർത്ത പങ്കുവെച്ചത്. പാർട്ടിയിലെ തന്റെ ഔദ്യോഗിക പദവികളിൽ നിന്നും സംഘടനയിൽ നിന്നും പടിയിറങ്ങുന്നതായി അവർ വ്യക്തമാക്കി.(Senior BJP Leaders Resign From Tamil Nadu Unit As Annamalai Gears Up For New Political Journey)
തീർത്തും വ്യക്തിപരമായ കാരണങ്ങളാലാണ് തീരുമാനമെന്ന് സുമതി വെങ്കടേഷ് അറിയിച്ചു. ബി.ജെ.പി മുന്നോട്ട് വെക്കുന്ന ദേശീയതയിലും സേവന ബോധത്തിലും താൻ വിശ്വസിക്കുന്നുണ്ടെന്നും, പ്രധാനമന്ത്രി നരേന്ദ്ര മോദിയുടെ നേതൃത്വം തനിക്ക് വലിയ പ്രചോദനമായിരുന്നുവെന്നും അവർ കുറിച്ചു. എന്നാൽ, പാർട്ടിയിലെ നിലവിലെ സാഹചര്യങ്ങൾ പടിയിറങ്ങാൻ പ്രേരിപ്പിക്കുകയായിരുന്നു. ഭാവി പരിപാടികളെക്കുറിച്ച് സുമതി വെങ്കടേഷ് ഇതുവരെ വെളിപ്പെടുത്തിയിട്ടില്ല.
അണ്ണാമലൈയുടെ രാജിക്ക് പിന്നാലെ, തമിഴ്നാട്ടിലെ പരമ്പരാഗത രാഷ്ട്രീയ പാർട്ടികളായ ഡി.എം.കെ, എ.ഐ.ഡി.എം.കെ എന്നിവയ്ക്കും ബി.ജെ.പിക്കും വെല്ലുവിളിയായി അദ്ദേഹം പുതിയ രാഷ്ട്രീയ നീക്കങ്ങൾ ആരംഭിച്ചിട്ടുണ്ട്. വ്യക്തികേന്ദ്രീകൃത രാഷ്ട്രീയത്തിൽ നിന്ന് മാറി ‘സാധാരണക്കാരന്റെ രാഷ്ട്രീയം’ എന്ന ആശയമാണ് അണ്ണാമലൈ മുന്നോട്ട് വെക്കുന്നത്. നടൻ വിജയിയുടെ പാർട്ടിയായ തമിഴക വെട്രി കഴകം തമിഴ്നാട്ടിലെ യുവജനതയ്ക്കിടയിൽ ഉണ്ടാക്കിയ സ്വാധീനം മുന്നിൽക്കണ്ടാണ് അണ്ണാമലൈ ഇത്തരമൊരു മാറ്റത്തിന് മുതിർന്നതെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
അണ്ണാമലൈയുടെയും മറ്റ് നേതാക്കളുടെയും രാജി പാർട്ടിക്ക് വലിയ തിരിച്ചടിയല്ലെന്ന് ബി.ജെ.പി തമിഴ്നാട് അധ്യക്ഷൻ നൈനാർ നാഗേന്ദ്രൻ പ്രതികരിച്ചു. ലോകത്തിലെ ഏറ്റവും വലിയ പാർട്ടിയാണ് ബി.ജെ.പി എന്നും, ഇത്തരം രാജികൾ പാർട്ടിയുടെ ആശയപരമായ നിലപാടുകളെ ബാധിക്കില്ലെന്നും അദ്ദേഹം വ്യക്തമാക്കി. അതേസമയം, വരാനിരിക്കുന്ന തമിഴ്നാട് നിയമസഭാ തിരഞ്ഞെടുപ്പിൽ മത്സരിക്കാനുള്ള തയ്യാറെടുപ്പിലാണ് അണ്ണാമലൈയുടെ പുതിയ കൂട്ടായ്മ.
Story Summary
The Tamil Nadu BJP is facing a wave of resignations, with state secretary Sumathi Venkatesh becoming the latest key leader to quit, following the exits of former state chief K. Annamalai and vice president Karu Nagarajan. While the state BJP leadership maintains that these departures will not impact the party’s ideological foundation, Annamalai is actively pursuing a new political path centered on “common man politics” to challenge the dominance of established parties like the DMK and AIADMK.
