Follow on Google News
മുംബൈ: വരാനിരിക്കുന്ന ഐപിഎൽ 2026 സീസണിൽ ചെന്നൈ സൂപ്പർ കിംഗ്സിന്റെ ഓപ്പണിംഗ് ജോഡികളിൽ വലിയ മാറ്റമുണ്ടാകുമെന്ന് ക്യാപ്റ്റൻ ഋതുരാജ് ഗെയ്ക്വാദ് (Sanju Samson CSK Opening IPL 2026). വിക്കറ്റ് കീപ്പർ ബാറ്റർ സഞ്ജു സാംസണും താനും ചേർന്നായിരിക്കും ഇത്തവണ സിഎസ്കെയ്ക്കായി ഇന്നിംഗ്സ് ഓപ്പൺ ചെയ്യുക എന്ന് ഗെയ്ക്വാദ് സൂചന നൽകി. മുംബൈയിൽ നടന്ന ഐപിഎൽ ക്യാപ്റ്റന്മാരുടെ മീറ്റിംഗിലാണ് അദ്ദേഹം ഈ നിർണ്ണായക വിവരം പങ്കുവെച്ചത്.
കഴിഞ്ഞ സീസണിലെ വലിയ തിരിച്ചടികൾക്ക് ശേഷം ടീമിനെ ശക്തിപ്പെടുത്തുന്നതിന്റെ ഭാഗമായാണ് സഞ്ജുവിനെ ടീമിലെത്തിച്ചത്. രാജസ്ഥാൻ റോയൽസിൽ നിന്ന് സഞ്ജുവിനെ സിഎസ്കെ ട്രേഡ് ചെയ്യുകയായിരുന്നു. ഇതിന് പകരമായി രവീന്ദ്ര ജഡേജയെയും സാം കറനെയും രാജസ്ഥാൻ റോയൽസിന് വിട്ടുകൊടുക്കേണ്ടി വന്നു.
കഴിഞ്ഞ സീസണിൽ ഓപ്പണിംഗിൽ സ്ഥിരത കണ്ടെത്താൻ സിഎസ്കെ ഏറെ ബുദ്ധിമുട്ടിയിരുന്നു. രചിൻ രവീന്ദ്ര, ഡെവോൺ കോൺവേ, രാഹുൽ ത്രിപാഠി എന്നിവരെ മാറി മാറി പരീക്ഷിച്ചെങ്കിലും പരാജയപ്പെടുകയായിരുന്നു. പിന്നീട് യുവതാരങ്ങളായ ആയുഷ് മ्हाത്രെയും ഡെവാൾഡ് ബ്രെവിസും വന്നതോടെയാണ് പവർപ്ലേയിൽ ടീമിന് അല്പമെങ്കിലും ആശ്വാസം ലഭിച്ചത്. എന്നാൽ ഇത്തവണ പരിചയസമ്പന്നരായ സഞ്ജു-ഗെയ്ക്വാദ് സഖ്യത്തെ തന്നെ പരീക്ഷിക്കാനാണ് മാനേജ്മെന്റ് തീരുമാനം.
മാർച്ച് 30-ന് ഗുവാഹത്തിയിലെ ബർസപ്പാറ സ്റ്റേഡിയത്തിൽ രാജസ്ഥാൻ റോയൽസിനെതിരെയാണ് സിഎസ്കെയുടെ ആദ്യ മത്സരം. ഏപ്രിൽ 3-ന് പഞ്ചാബ് കിംഗ്സിനെതിരെയാണ് ചെന്നൈയിലെ ചെപ്പോക്ക് സ്റ്റേഡിയത്തിൽ നടക്കുന്ന ആദ്യ ഹോം മാച്ച്. ഏപ്രിൽ 11-ന് ഡൽഹി ക്യാപിറ്റൽസിനെയും സിഎസ്കെ സ്വന്തം മണ്ണിൽ നേരിടും. മലയാളി താരം സഞ്ജു സാംസൺ സിഎസ്കെ ജേഴ്സിയിൽ ഓപ്പണറായി ഇറങ്ങുന്നത് കാണാൻ ആരാധകർ വലിയ ആവേശത്തിലാണ്. ടീമിന്റെ ടോപ്പ് ഓർഡറിലെ ദൗർബല്യം പരിഹരിക്കാൻ ഈ പുതിയ സഖ്യത്തിന് കഴിയുമെന്നാണ് പ്രതീക്ഷിക്കുന്നത്.
