വാരണാസി: രാഹുൽ ഗാന്ധിയുടെ ജന്മദിനാഘോഷത്തിന്റെ ഭാഗമായി വാരണാസിയിലെ യൂത്ത് കോൺഗ്രസ് പ്രവർത്തകർ ഗംഗാതീരത്ത് നടത്തിയ പൂജ വിവാദമായി. ഒരു കൈയിൽ മഴുവുമായി മറുകൈയിൽ ഇന്ത്യൻ ഭരണഘടനയുമായി രാഹുൽ ഗാന്ധിയെ ചിത്രീകരിച്ചുകൊണ്ടുള്ള പോസ്റ്റർ പ്രവർത്തകർ പ്രദർശിപ്പിച്ചു. ഇതിൽ പ്രവർത്തകർ പാൽ അഭിഷേകം നടത്തുകയും പ്രത്യേക പൂജകൾ സംഘടിപ്പിക്കുകയും ചെയ്തിരുന്നു.(Rahul Gandhi Birthday Controversy, Varanasi Youth Congress Controversy Over Depicting Rahul Gandhi as Lord Parshuram)
ഹിന്ദു വിശ്വാസങ്ങളെയും പരശുരാമനെയും അപമാനിക്കുന്ന നടപടിയാണിതെന്ന് ബിജെപി നേതാക്കൾ ആരോപിച്ചു. ഭഗവാൻ വിഷ്ണുവിന്റെ അവതാരമായ പരശുരാമനെ ഒരു രാഷ്ട്രീയ നേതാവുമായി താരതമ്യം ചെയ്യുന്നത് അസ്വീകാര്യമാണെന്നും, സനാതന ധർമ്മത്തെ എതിർക്കുന്നവർക്ക് ഇത്തരം താരതമ്യങ്ങൾ എങ്ങനെ സാധ്യമാണെന്നും യുപി ഉപമുഖ്യമന്ത്രി ബ്രജേഷ് പഥക് ചോദിച്ചു.
പ്രവർത്തകരുടെ വികാരപ്രകടനമാണ് നടന്നതെന്ന് കോൺഗ്രസ് നേതൃത്വം വ്യക്തമാക്കി. തിന്മയെ ഇല്ലാതാക്കാൻ പോരാടിയ പരശുരാമനെപ്പോലെ, രാജ്യത്തെ തിന്മകൾക്കെതിരെ പോരാടുന്ന നേതാവാണ് രാഹുൽ ഗാന്ധിയെന്നാണ് പ്രവർത്തകർ ഇതിലൂടെ അർത്ഥമാക്കിയത്. പരിപാടി സംഘടിപ്പിച്ചവർക്ക് പരശുരാമനോട് പ്രത്യേക ആദരവുണ്ടെന്നും കോൺഗ്രസ് വക്താക്കൾ കൂട്ടിച്ചേർത്തു. രാജ്യത്തുടനീളം കോൺഗ്രസ് പ്രവർത്തകർ രാഹുൽ ഗാന്ധിയുടെ ജന്മദിനം ആഘോഷിച്ചുവെങ്കിലും വാരണാസിയിലെ ഈ നടപടി സോഷ്യൽ മീഡിയയിലും രാഷ്ട്രീയ വേദികളിലും വലിയ ചർച്ചയായിട്ടുണ്ട്.
Story Summary
A controversy erupted on Rahul Gandhi’s 56th birthday after Varanasi Youth Congress workers depicted him as Lord Parshuram in a poster used during a celebratory ritual on the banks of the Ganga. While Congress supporters defended the act as an emotional tribute to his fight against “evil forces,” the BJP condemned the portrayal as a blasphemous insult to Hindu faith and traditions.
