ചണ്ഡീഗഢ്: പഞ്ചാബ് മുഖ്യമന്ത്രി ഭഗവന്ത് മാന്നിനെതിരെ ക്രിമിനൽ കേസെടുക്കണമെന്ന ആവശ്യവുമായി ബിജെപി നേതൃത്വം രംഗത്ത്. പഞ്ചാബിലുണ്ടായ സ്ഫോടനങ്ങൾക്ക് പിന്നിൽ ബിജെപിക്ക് രാഷ്ട്രീയ ലക്ഷ്യങ്ങളുണ്ടെന്ന മുഖ്യമന്ത്രിയുടെ പ്രസ്താവനയ്ക്കെതിരെയാണ് പാർട്ടി പരാതി നൽകിയത് (Punjab Blasts Bhagwant Mann Controversy). മാന്നിന്റെ പ്രസ്താവനകൾ വ്യാജവും പ്രകോപനപരവും അപകീർത്തികരവുമാണെന്ന് ബിജെപി ആരോപിക്കുന്നു.
ബുധനാഴ്ച നടന്ന പൊതുപരിപാടിയിലാണ് ജലന്ധറിലെ ബിഎസ്എഫ് ഹെഡ്ക്വാർട്ടേഴ്സിന് സമീപവും അമൃത്സറിലെ സൈനിക ക്യാമ്പിന് സമീപവും ഉണ്ടായ ഇരട്ട സ്ഫോടനങ്ങളെ ബിജെപിയുമായി ബന്ധപ്പെടുത്തി മുഖ്യമന്ത്രി സംസാരിച്ചത്. 2027-ലെ തിരഞ്ഞെടുപ്പിന് മുന്നോടിയായി രാഷ്ട്രീയ ലാഭമുണ്ടാക്കാൻ ബിജെപി ശ്രമിക്കുന്നുവെന്നായിരുന്നു അദ്ദേഹത്തിന്റെ ആരോപണം.
ബിജെപി സംസ്ഥാന അധ്യക്ഷൻ സുനിൽ ജാക്കറുടെ നേതൃത്വത്തിലുള്ള സംഘം പഞ്ചാബ് ഡിജിപിയെ നേരിൽ കണ്ട് പരാതി നൽകി. ഔദ്യോഗിക അന്വേഷണ റിപ്പോർട്ടുകൾ പുറത്തുവരുന്നതിന് മുൻപ് തന്നെ കുറ്റാരോപണം നടത്തുന്നത് യഥാർത്ഥ പ്രതികളെ രക്ഷിക്കാനും അന്വേഷണത്തെ വഴിതിരിച്ചുവിടാനുമുള്ള ശ്രമമാണെന്ന് ബിജെപി ആരോപിക്കുന്നു. ഇത്തരം അടിസ്ഥാനരഹിതമായ ആരോപണങ്ങൾ പൊതുജനങ്ങളിൽ ഭീതിയും സാമുദായിക അസ്വസ്ഥതയും ഉണ്ടാക്കാൻ കാരണമാകുമെന്ന് പരാതിയിൽ പറയുന്നു. ഗ്രൂപ്പുകൾക്കിടയിൽ ശത്രുത വളർത്തുക, മാനഹാനി വരുത്തുക തുടങ്ങിയ വകുപ്പുകൾ പ്രകാരം മുഖ്യമന്ത്രിക്കെതിരെ എഫ്ഐആർ രജിസ്റ്റർ ചെയ്യണമെന്നാണ് ആവശ്യം. പഞ്ചാബിലെ ക്രമസമാധാന നിലയെച്ചൊല്ലി രാഷ്ട്രീയ പോര് മുറുകുന്നതിനിടെയാണ് മുഖ്യമന്ത്രിയും ബിജെപിയും തമ്മിലുള്ള ഈ പുതിയ തർക്കം.
Summary: Punjab BJP leaders, led by state president Sunil Jakhar, have filed a police complaint against Chief Minister Bhagwant Mann. They alleged that Mann made “false and inflammatory” statements by linking the BJP to recent explosions in Jalandhar and Amritsar. The BJP claims these remarks are an attempt to divert attention from the real perpetrators and incite communal disharmony ahead of the 2027 elections. They demanded an FIR against the CM for criminal defamation and promoting enmity.
