മുംബൈ: റോഡരികിൽ നിന്ന് വാങ്ങിയ തണ്ണിമത്തൻ മുറിക്കാതെ തന്നെ അതിൽ നിന്ന് നുരയും പതയും പുറത്തേക്ക് വരുന്ന ദൃശ്യങ്ങൾ പങ്കുവെച്ച് യൂട്യൂബർ ഗൗരവ് താനേജ (ഫ്ലയിങ് ബീസ്റ്റ്). ‘തണ്ണിമത്തനിൽ വിഷം’ എന്ന തലക്കെട്ടോടെ അദ്ദേഹം പങ്കുവെച്ച വിഡിയോ നിമിഷങ്ങൾക്കകം വൈറലായി (Watermelon Foaming). മുംബൈയിൽ തണ്ണിമത്തൻ കഴിച്ച ഒരു കുടുംബത്തിലെ നാലുപേർ മരിച്ച പശ്ചാത്തലത്തിൽ ഈ വിഡിയോ വലിയ തോതിൽ ചർച്ച ചെയ്യപ്പെടുകയാണ്.
ഏപ്രിൽ 26-നാണ് മുംബൈയിലെ ഡോകാഡിയ കുടുംബത്തിലെ നാലുപേർ രാത്രി ഭക്ഷണത്തിന് ശേഷം തണ്ണിമത്തൻ കഴിച്ച് മരണപ്പെട്ടത്. അബ്ദുല്ല ഡോകാഡിയ (40), ഭാര്യ നസീം (35), മക്കളായ ആയിഷ (16), സൈനബ് (13) എന്നിവരാണ് മരിച്ചത്. രാസപരിശോധനയിൽ തണ്ണിമത്തനിലും മരിച്ചവരുടെ ശരീരത്തിലും എലിവിഷത്തിന്റെ (Rat Poison) സാന്നിധ്യം കണ്ടെത്തിയിരുന്നു. ഇത് ബോധപൂർവ്വം ആരെങ്കിലും വിഷം ചേർത്തതാണോ എന്ന കാര്യത്തിൽ പോലീസ് അന്വേഷണം പുരോഗമിക്കുകയാണ്.
ഗൗരവ് താനേജയുടെ വിഡിയോ കണ്ട് പലരും പരിഭ്രാന്തരായെങ്കിലും ഇതിന് പിന്നിൽ ശാസ്ത്രീയമായ കാരണങ്ങളുണ്ടെന്ന് ഭക്ഷ്യസുരക്ഷാ വിദഗ്ധർ ചൂണ്ടിക്കാട്ടുന്നു:
പുളിക്കൽ (Fermentation)
കഠിനമായ ചൂടിൽ തണ്ണിമത്തന്റെ ഉള്ളിൽ ബാക്ടീരിയകളും ഈസ്റ്റും വളരുകയും പഴം പുളിക്കുകയും ചെയ്യുന്നു. ഈ പ്രക്രിയയിൽ കാർബൺ ഡയോക്സൈഡ് വാതകം ഉണ്ടാകുകയും അത് പുറത്തേക്ക് വരുമ്പോൾ പത നുരയുകയും ചെയ്യുന്നു.
ചൂട്
ദീർഘനേരം വെയിലത്തോ ചൂടുള്ള അന്തരീക്ഷത്തിലോ ഇരിക്കുന്ന പഴങ്ങൾ ഇത്തരത്തിൽ ചീഞ്ഞുപോകാൻ സാധ്യതയുണ്ട്.
ശ്രദ്ധിക്കേണ്ട കാര്യങ്ങൾ:
നിരീക്ഷണം വേണം
പുറംതോടിൽ സുഷിരങ്ങളോ, അമിതമായ മണമോ, പതയോ ഉള്ള തണ്ണിമത്തൻ വാങ്ങരുത്. പഴങ്ങൾ മുറിച്ച ശേഷം ഉടൻ ഉപയോഗിക്കുകയോ ഫ്രിഡ്ജിൽ സൂക്ഷിക്കുകയോ ചെയ്യുക. കയ്പ്പുള്ളതോ അല്ലെങ്കിൽ അസാധാരണമായി പുളിച്ചതോ ആയ തണ്ണിമത്തൻ കഴിക്കരുത്. വിഷം ചേർത്തതാണോ അതോ അമിതമായി ചീഞ്ഞതാണോ എന്ന് തിരിച്ചറിയാൻ കൃത്യമായ പരിശോധനകൾ ആവശ്യമാണ്. ഏതായാലും മുംബൈയിലെ സംഭവത്തിന്റെ പശ്ചാത്തലത്തിൽ കമ്പോളങ്ങളിലെ ഭക്ഷ്യസുരക്ഷാ പരിശോധനകൾ കർശനമാക്കണമെന്ന ആവശ്യം ശക്തമായിട്ടുണ്ട്.
Story Summary: Following the death of a family of four in Mumbai after consuming watermelon, YouTuber Gaurav Taneja’s viral video showing a foaming watermelon has caused widespread panic. While chemical tests in the Mumbai case revealed rat poison, experts explain that the foaming in Taneja’s video could be due to natural fermentation caused by extreme heat.
