മുംബൈ: മഹാരാഷ്ട്രയിലെ മുംബൈ-പൂനെ എക്സ്പ്രസ് വേയിലുണ്ടായ മാരകമായ വാഹനാപകടത്തിൽ രണ്ട് പേർ കൊല്ലപ്പെടുകയും എൺപതുകാരിയായ വൃദ്ധയ്ക്ക് ഗുരുതരമായി പരിക്കേൽക്കുകയും ചെയ്തു (Mumbai Pune Expressway Accident). എക്സ്പ്രസ് വേയിലെ ഒരു കണ്ടെയ്നർ ട്രക്ക് മറിയുകയും, തൊട്ടുപിന്നാലെ വന്ന മറ്റൊരു ട്രക്ക് ഇതിലേക്ക് ഇടിച്ചുകയറുകയുമായിരുന്നു. ഈ സമയം പാതയിലൂടെ കടന്നുപോവുകയായിരുന്ന കാറിലുണ്ടായിരുന്ന യാത്രക്കാരിയായ പ്രായമായ സ്ത്രീക്കാണ് ഗുരുതരമായി പരിക്കേറ്റത്. അപകടത്തെ തുടർന്ന് എക്സ്പ്രസ് വേയിലെ മുംബൈയിലേക്കുള്ള ‘മിസ്സിംഗ് ലിങ്ക്’ പാതയിൽ മണിക്കൂറുകളോളം ഗതാഗതം പൂർണ്ണമായി തടസ്സപ്പെട്ടു. അപകടത്തിൽപ്പെട്ട വാഹനങ്ങളും അവശിഷ്ടങ്ങളും ഹൈവേ അതോറിറ്റി പിന്നീട് നീക്കം ചെയ്ത ശേഷമാണ് പാത സാധാരണ ഗതാഗതത്തിനായി തുറന്നുകൊടുത്തത്. സംഭവത്തിൽ പ്രാദേശിക പോലീസ് വിശദമായ അന്വേഷണം ആരംഭിച്ചിട്ടുണ്ട്.
അപകടത്തെ തുടർന്ന് ലോണാവാലയിൽ നിന്നും മുംബൈയിലേക്ക് പോകുന്ന വാഹനങ്ങൾ പ്രധാന എക്സ്പ്രസ് വേയിലേക്കും പഴയ പൂനെ-മുംബൈ ഹൈവേയിലേക്കും വഴിതിരിച്ചുവിട്ടത് കടുത്ത ഗതാഗതക്കുരുക്കിനും രണ്ട് മണിക്കൂറിലധികം നീണ്ട യാത്രാ വൈകലിനും കാരണമായി. രണ്ടാഴ്ച മുൻപും ഇതേ ഹൈവേയിലെ ഖോപോളിക്ക് സമീപം മൂന്ന് ട്രക്കുകൾ കൂട്ടിയിടിച്ച് രണ്ട് പേർ മരണപ്പെട്ടിരുന്നു. മുംബൈ-പൂനെ എക്സ്പ്രസ് വേയിൽ 2025-ൽ മാത്രം 187 അപകടങ്ങളാണ് രേഖപ്പെടുത്തിയിട്ടുള്ളത്. തൊട്ടുമുൻപത്തെ വർഷങ്ങളെ അപേക്ഷിച്ച് മരണസംഖ്യയിലും മാരകമായ അപകടങ്ങളിലും നേരിയ കുറവുണ്ടായിട്ടുണ്ടെന്നാണ് ഔദ്യോഗിക കണക്കുകൾ വ്യക്തമാക്കുന്നത്. റോഡ് സുരക്ഷാ മാനദണ്ഡങ്ങൾ കൂടുതൽ കർശനമാക്കിയിട്ടും എക്സ്പ്രസ് വേയിലെ കനത്ത വാഹനങ്ങളുടെ അമിതവേഗത ഇപ്പോഴും വലിയ ഭീഷണിയായി തുടരുകയാണ്.
Summary: A major accident on the Mumbai-Pune Expressway left two people dead and an 80-year-old woman seriously injured after a container truck overturned and collided with another heavy vehicle. The incident caused severe traffic disruptions on the Mumbai-bound lane, forcing authorities to divert vehicles via the old Pune-Mumbai highway for several hours. Although emergency teams eventually cleared the debris to reopen the stretch, the route remains prone to heavy congestion following such multi-vehicle pile-ups.
