ഭോപ്പാൽ: കന്നുകാലികളെ കടത്തിയെന്നാരോപിച്ച് 50-കാരനെ ആൾക്കൂട്ട മർദ്ദനത്തിനിരയാക്കി കൊലപ്പെടുത്തിയ 14 ഗോരക്ഷാ പ്രവർത്തകർക്ക് ജീവപര്യന്തം തടവ് ശിക്ഷ വിധിച്ച വനിതാ ജഡ്ജിക്ക് നേരെ വധഭീഷണിയും സൈബർ ആക്രമണവും (Judge tabassum khan threatened). മധ്യപ്രദേശിലെ അഡീഷണൽ ജില്ലാ സെഷൻസ് കോടതി ജഡ്ജിയായ തബാസും ഖാനെതിരെയാണ് വധഭീഷണിയും ബലാത്സംഗ ഭീഷണിയും ഉൾപ്പെടെയുള്ള അതീവ ഗുരുതരമായ സൈബർ ആക്രമണങ്ങൾ ഉയർന്നിട്ടുള്ളത്. ഭീഷണി ശക്തമായതിനെ തുടർന്ന് ഇവർക്ക് പോലീസ് അതീവ സുരക്ഷ ഏർപ്പെടുത്തി.
കഴിഞ്ഞ ജൂൺ 12-നാണ് 2022-ൽ നടന്ന ക്രൂരമായ ആൾക്കൂട്ട കൊലപാതകക്കേസിൽ ജഡ്ജി തബാസും ഖാൻ വിധി പ്രസ്താവിച്ചത്. പശുക്കളെ കടത്തിയെന്നാരോപിച്ച് ട്രക്ക് ഡ്രൈവറായ നാസിർ അഹമ്മദ് എന്ന 50-കാരനെ തല്ലിക്കൊന്ന 14 ഗോരക്ഷകർക്കാണ് കോടതി ജീവപര്യന്തം തടവുശിക്ഷ വിധിച്ചത്. നാസിർ അഹമ്മദിനൊപ്പമുണ്ടായിരുന്ന മറ്റ് രണ്ട് പേർക്കും അക്രമത്തിൽ ക്രൂരമായി പരിക്കേറ്റിരുന്നെങ്കിലും ഇവർ അത്ഭുതകരമായി ജീവൻ രക്ഷപ്പെട്ടിരുന്നു. ഇവർ കോടതിയിൽ നൽകിയ കൃത്യമായ മൊഴികളാണ് കേസിൽ പ്രതികൾക്ക് ശിക്ഷ ഉറപ്പാക്കാൻ നിർണ്ണായകമായത്. നടന്നത് കൃത്യമായ ആൾക്കൂട്ട മർദ്ദനവും കൊലപാതകവുമാണെന്ന് അടിവരയിട്ടായിരുന്നു ജഡ്ജിയുടെ ശിക്ഷാ പ്രഖ്യാപനം.
എന്നാൽ വിധി വന്നതിന് പിന്നാലെ മുസ്ലിം വിഭാഗത്തിൽ നിന്നുള്ള വനിതാ ജഡ്ജിയെ ലക്ഷ്യമിട്ട് തീവ്രവലതുപക്ഷ ഗ്രൂപ്പുകൾ രംഗത്തെത്തുകയായിരുന്നു. ജഡ്ജിയുടെ വിധി കുറ്റകൃത്യത്തിന്റെ ഗൌരവം പരിഗണിച്ചല്ലെന്നും, മറിച്ച് കുറ്റാരോപിതരുടെ മതം നോക്കിയാണെന്നുമുള്ള തരത്തിൽ വർഗീയ പ്രചാരണങ്ങളാണ് സോഷ്യൽ മീഡിയയിൽ ഇവർ അഴിച്ചുവിട്ടത്. വിധി പ്രഖ്യാപിച്ച ജൂൺ 12-ന് തന്നെ, പശുക്കളെ രക്ഷിക്കാൻ ശ്രമിച്ചവരെയാണ് ശിക്ഷിച്ചതെന്ന് ആരോപിച്ച് പ്രതികളെ ജയിലിലേക്ക് കൊണ്ടുപോയ വാഹനം കോടതി വളപ്പിൽ വെച്ച് ഒരു സംഘം തടഞ്ഞിരുന്നു.
ഇതിന് പിന്നാലെയാണ് ജഡ്ജിക്കെതിരെ വർഗീയ പരാമർശങ്ങളോടെയുള്ള സൈബർ ആക്രമണവും വധഭീഷണിയും ശക്തമായത്. ശിക്ഷിക്കപ്പെട്ട പ്രതികളെ ഉടൻ വിട്ടയച്ചില്ലെങ്കിൽ രാജ്യവ്യാപകമായി അക്രമങ്ങൾ അഴിച്ചുവിടുമെന്നും ഭീഷണിയുണ്ട്. തീവ്ര നിലപാടുകാരുടെ ഇത്തരം പ്രചാരണങ്ങൾക്ക് സാമൂഹ്യ മാധ്യമങ്ങളിൽ വലിയ പിന്തുണ ലഭിക്കുന്നത് സുരക്ഷാ ഏജൻസികളെയും ആശങ്കപ്പെടുത്തുന്നുണ്ട്. സംഭവത്തിന്റെ പ്രതികരണമെന്നോണം പഞ്ചാബിൽ ജഡ്ജിയുടെ കോലം കത്തിച്ച് പ്രതിഷേധ പ്രകടനങ്ങളും നടന്നു. ഭീഷണികളുടെ പശ്ചാത്തലത്തിൽ ജഡ്ജിയുടെ സുരക്ഷ ശക്തമാക്കാൻ മധ്യപ്രദേശ് ആഭ്യന്തര വകുപ്പ് പോലീസിന് കർശന നിർദേശം നൽകിയിട്ടുണ്ട്.
Story Summary: Tabassum Khan, an Additional District Sessions Court Judge in Madhya Pradesh, has received death and rape threats from right-wing outfits after sentencing 14 cow vigilantes to life imprisonment for a 2026 mob lynching case. Following severe communal cyber-attacks and nationwide protests by the groups, police protection has been heightened for the Muslim woman judge.
