ചെന്നൈ: തമിഴ്നാട്ടിൽ എം കെ സ്റ്റാലിന്റെ നേതൃത്വത്തിലുള്ള ഡിഎംകെ സഖ്യത്തിൽ വലിയ വിള്ളൽ വീഴ്ത്തിക്കൊണ്ട് മറുമലർച്ചി ദ്രാവിഡ മുന്നേറ്റ കഴകം മുന്നണി വിടാനൊരുങ്ങുന്നതായി ശക്തമായ സൂചന (MDMK MLAs Resign). ഇതിന്റെ ആദ്യപടിയായി എംഡിഎംകെയുടെ രണ്ട് പ്രമുഖ എംഎൽഎമാർ പദവി രാജിവെച്ച് മുഖ്യമന്ത്രി സി. ജോസഫ് വിജyയുടെ തമിഴക വെട്രി കഴകം പാർട്ടിയിൽ ചേരുമെന്നാണ് പുറത്തുവരുന്ന റിപ്പോർട്ടുകൾ വ്യക്തമാക്കുന്നത്. ഡിഎംകെ ചിഹ്നത്തിൽ മത്സരിച്ച് വിജയിച്ച മൈലാടുതുറ ജില്ലയിലെ സീർകാഴി മണ്ഡലം എംഎൽഎ ആർ. സെന്തിൽ സെൽവൻ, തെങ്കാശി ജില്ലയിലെ കടയനല്ലൂർ മണ്ഡലം എംഎൽഎ ടി. എം. രാജേന്ദ്രൻ എന്നിവരാണ് രാജിവെയ്ക്കാൻ ഒരുങ്ങുന്നത്. നിയമസഭയിൽ ഡിഎംകെയുടെ വിപ്പ് അനുസരിക്കേണ്ടി വരുന്നതിനാലാണ് അയോഗ്യത ഒഴിവാക്കാൻ ഇവർ എംഎൽഎ സ്ഥാനം രാജിവെച്ച് പാർട്ടി മാറാൻ തീരുമാനിച്ചത്.
കഴിഞ്ഞ ദിവസം മുഖ്യമന്ത്രി വിജയ് തന്റെ തിരുച്ചിറപ്പള്ളി ഈസ്റ്റ് മണ്ഡലത്തിൽ നന്ദി പര്യടനത്തിന് എത്തിയപ്പോൾ എംഡിഎംകെ സ്ഥാപക നേതാവ് വൈകോയുടെ മകനും നിലവിലെ എംപിയുമായ ദുരൈ വൈകോ അദ്ദേഹത്തെ സ്വീകരിക്കാൻ എത്തിയിരുന്നു. എംഎൽഎമാർ രാജിവെച്ച് പാർട്ടി മാറുന്നതിനെ ദുരൈ വൈകോ പരസ്യമായി അനുകൂലിച്ചതോടെയാണ് മുന്നണി മാറ്റത്തെക്കുറിച്ചുള്ള ചർച്ചകൾ തമിഴ് രാഷ്ട്രീയത്തിൽ ചൂടുപിടിച്ചത്. ഡിഎംകെ തങ്ങളെ നിർബന്ധിച്ചാണ് സ്വന്തം ചിഹ്നം നൽകിയതെന്ന് വൈകോയും കഴിഞ്ഞ ദിവസം ആവർത്തിച്ചിരുന്നു. ഇതോടെ ഡിഎംകെ നേതൃത്വം നൽകുന്ന മതനിരപേക്ഷ പുരോഗമന സഖ്യത്തിൽ വലിയ രീതിയിലുള്ള രാഷ്ട്രീയ അസ്ഥിരതയാണ് ഉടലെടുത്തിരിക്കുന്നത്. തമിഴ്നാട് നിയമസഭാ തിരഞ്ഞെടുപ്പ് ഫലത്തിന് പിന്നാലെ വിജയുടെ രാഷ്ട്രീയ സ്വാധീനം വർദ്ധിച്ചുവരുന്നതിന്റെ തെളിവുകൂടിയാണ് ഈ കൂറുമാറ്റ നീക്കം.
അതേസമയം, തിരഞ്ഞെടുപ്പിലെ തിരിച്ചടികൾക്ക് പിന്നാലെ പാർട്ടി തലത്തിൽ വൻ അഴിച്ചുപണിക്കാണ് ഡിഎംകെ ഒരുങ്ങുന്നത്. ഓരോ രണ്ട് നിയമസഭാ മണ്ഡലങ്ങൾക്കും ഒരു ജില്ലാ സെക്രട്ടറി എന്ന രീതിയിൽ പുനഃസംഘടിപ്പിച്ച് ജില്ലാ സെക്രട്ടറിമാരുടെ എണ്ണം കുത്തനെ കൂട്ടാനാണ് എം കെ സ്റ്റാലിന്റെ തീരുമാനം. യുവാക്കളെ കൂടുതൽ പാർട്ടിയിലേക്ക് ആകർഷിക്കുന്നതിനായി പ്രത്യേക യുവജന ജില്ലാ സെക്രട്ടറിമാരെയും നിയമിക്കും. കഴിഞ്ഞ തിരഞ്ഞെടുപ്പിൽ പ്രതീക്ഷിച്ച ഫലം നൽകാത്ത പ്രമുഖ നേതാക്കളെ പദവികളിൽ നിന്ന് നീക്കുമെന്നും പാർട്ടി വൃത്തങ്ങൾ അറിയിച്ചു. പാർട്ടിയിലെ ആഭ്യന്തര പ്രശ്നങ്ങളെക്കുറിച്ച് പഠിക്കാൻ പ്രത്യേക സമിതിയെ നിയോഗിച്ച ശേഷമാണ് ഈ അഴിച്ചുപണിക്ക് ഡിഎംകെ തുടക്കമിടുന്നത്.
Summary: In a major setback for the DMK alliance in Tamil Nadu, two MDMK MLAs are likely to resign and join Chief Minister Vijay’s party, TVK. MDMK leaders expressed dissatisfaction, claiming they were forced to contest under the DMK symbol in the recent elections. In response to the shifting political landscape, DMK is planning a massive organizational overhaul by appointing younger district secretaries and removing non-performing leaders.
