ജബൽപൂർ: മധ്യപ്രദേശിലെ ബർഗി ഡാമിലുണ്ടായ ക്രൂയിസ് ബോട്ട് അപകടത്തിൽ ഹൃദയഭേദകമായ ദൃശ്യങ്ങൾ പുറത്ത്. അപകടത്തിൽ മരിച്ച അമ്മയുടെയും നാല് വയസ്സുകാരനായ മകന്റെയും മൃതദേഹങ്ങൾ പരസ്പരം കെട്ടിപ്പിടിച്ച നിലയിലാണ് രക്ഷാപ്രവർത്തകർ കണ്ടെടുത്തത് (Madhya Pradesh Cruise Boat Accident). കുഞ്ഞിനെ രക്ഷിക്കാനുള്ള അവസാന ശ്രമമെന്നോണം നെഞ്ചോട് ചേർത്തുപിടിച്ച നിലയിലായിരുന്നു അമ്മയുടെ മൃതദേഹം.
അപകടത്തിൽപ്പെട്ടത് ദൽഹിയിൽ നിന്നുള്ള നാലംഗ വിനോദസഞ്ചാരികളുടെ കുടുംബമാണ്. ഇതിലെ അമ്മയും മകനുമാണ് മരിച്ചത്. പിതാവും മകളും അത്ഭുതകരമായി രക്ഷപ്പെട്ടു. വെള്ളിയാഴ്ച രാവിലെ വരെയുള്ള കണക്കുകൾ പ്രകാരം 24 പേരെ രക്ഷപ്പെടുത്തിയിട്ടുണ്ട്. ഇതിൽ 17 പേർ ആശുപത്രിയിൽ ചികിത്സയിലാണ്. അഞ്ച് കുട്ടികളടക്കം 9 പേരെ ഇനിയും കണ്ടെത്താനുണ്ട്. “കണ്ണടച്ചു തുറക്കുന്ന വേഗതയിലാണ് പ്രിയപ്പെട്ടവർ കണ്മുന്നിൽ നിന്ന് മറഞ്ഞത്” എന്ന് രക്ഷപ്പെട്ട സയ്യിദ് റിയാസ് ഹുസൈൻ പറഞ്ഞു. രണ്ട് മണിക്കൂറോളം വെള്ളത്തിൽ തല മാത്രം പുറത്തിട്ട് ശ്വാസം കിട്ടാനായി പോരാടിയാണ് അദ്ദേഹം ജീവിതത്തിലേക്ക് തിരിച്ചുവന്നത്. അദ്ദേഹത്തിന്റെ കുടുംബാംഗങ്ങളെ ഇനിയും കണ്ടെത്താനായിട്ടില്ല.
ബോട്ട് ക്യാപ്റ്റൻ മഹേഷ് പട്ടേൽ രക്ഷപ്പെട്ടിട്ടുണ്ട്. ശക്തമായ കാറ്റും മോശം കാലാവസ്ഥയുമാണ് ബോട്ട് മറിയാൻ കാരണമായതെന്നാണ് പ്രാഥമിക നിഗമനം. സംസ്ഥാന ദുരന്ത നിവാരണ സേനയുടെയും (SDRF) പോലീസിന്റെയും നേതൃത്വത്തിൽ കാണാതായവർക്കായി ഊർജ്ജിതമായ തെരച്ചിൽ തുടരുകയാണ്.
Summary: In a heartbreaking aftermath of the Madhya Pradesh boat tragedy, rescuers found the bodies of a mother and her four-year-old son holding each other tightly. Part of a tourist family from Delhi, the mother was clutching the child to her chest in a final attempt to save him. As of Friday morning, 24 people have been rescued, while nine others—including five children—remain missing. Survivors recounted harrowing tales of the sudden storm that capsized the vessel, as search operations by the SDRF continue urgently.
