ലൂധിയാന: സഹോദര സ്നേഹത്തിന്റെ ഉദാത്തമായ മാതൃക കാണിച്ച് പഞ്ചാബിലെ ലൂധിയാനയിൽ നിന്നുള്ള രണ്ട് സഹോദരങ്ങൾ. തങ്ങളുടെ ഏക സഹോദരിക്ക് 50 ലക്ഷം രൂപ വിലമതിക്കുന്ന വീട് സർപ്രൈസ് സമ്മാനമായി നൽകിയാണ് അമർ ദേവ്ഗൺ, ദേവ് ദേവ്ഗൺ എന്നീ സഹോദരങ്ങൾ ലോകത്തിന്റെ കൈയടി നേടുന്നത് (Ludhiana Brothers Gift House to Sister). സർപ്രൈസ് അറിഞ്ഞ സഹോദരി മൻപ്രീത് കൗർ ബിർദി വികാരാധീനയായി സഹോദരങ്ങളെ കെട്ടിപ്പിടിച്ചു കരയുന്ന ദൃശ്യങ്ങൾ സോഷ്യൽ മീഡിയയിൽ വൈറലായി.
തങ്ങളുടെ സഹോദരിക്ക് സുരക്ഷിതമായ ഒരു തണൽ ഒരുക്കുക എന്നത് കഴിഞ്ഞ അഞ്ച് വർഷമായി ഈ സഹോദരങ്ങളുടെ സ്വപ്നമായിരുന്നു. 2007-ൽ പിതാവിന്റെ മരണശേഷം കുടുംബത്തെ താങ്ങിനിർത്താൻ മൻപ്രീത് നൽകിയ പിന്തുണയ്ക്കും സ്നേഹത്തിനുമുള്ള നന്ദിസൂചകമായാണ് ഈ സമ്മാനം നൽകിയതെന്ന് സഹോദരങ്ങൾ പറഞ്ഞു. ഒരു കുടുംബ ചടങ്ങായിട്ടാണ് സഹോദരങ്ങൾ ഈ സർപ്രൈസ് ഒരുക്കിയത്. ലൂധിയാനയിലെ കോട്ട് മംഗൾ സിംഗ് ഏരിയയിൽ പുതുതായി പണിത 175 സ്ക്വയർ യാർഡ് വീടിന് മുന്നിലേക്ക് ചെണ്ടമേളങ്ങളുടെ അകമ്പടിയോടെയാണ് സഹോദരിയെ എത്തിച്ചത്. വീടിന് മുന്നിലെ നെയിംപ്ലേറ്റിൽ മൻപ്രീതിന്റെ പേര് കണ്ടപ്പോഴാണ് ആ വീട് തനിക്കുള്ളതാണെന്ന് മൻപ്രീത് തിരിച്ചറിഞ്ഞത്. ഉടൻ തന്നെ അവർ സഹോദരങ്ങളെ കെട്ടിപ്പിടിക്കുകയും സന്തോഷക്കണ്ണീർ പൊഴിക്കുകയുമായിരുന്നു.
View this post on Instagram
വൈറലായ വീഡിയോയ്ക്ക് താഴെ ഹൃദയസ്പർശിയായ കമന്റുകളാണ് വരുന്നത്. “ലോകത്തിലെ ഏറ്റവും മനോഹരമായ വീഡിയോ”, “സഹോദര സ്നേഹത്തിന്റെ വലിയ ഉദാഹരണം” എന്നിങ്ങനെ പലരും കുറിച്ചു. വരാനിരിക്കുന്ന ജൂൺ 13-ന് മൻപ്രീതിന്റെ ജന്മദിനത്തിൽ വീടിന്റെ പാലുകാച്ചൽ ചടങ്ങ് നടത്താനാണ് കുടുംബത്തിന്റെ തീരുമാനം.
Summary: Two brothers from Ludhiana, Amar Devgan and Dev Devgan, surprised their sister Manpreet Kaur Birdi with a fully constructed house worth Rs 50 lakh as a token of gratitude for her lifelong support. The emotional video of the surprise has gone viral, with netizens praising the brothers for their heartwarming gesture and strong family values.
