ന്യൂഡൽഹി: ലോക്സഭയിൽ പരീക്ഷാ തട്ടിപ്പ് തടയൽ (ഭേദഗതി) ബില്ലിന്മേൽ നടന്ന ചർച്ചയിൽ വേറിട്ട കാഴ്ചകൾ. ചോദ്യപ്പേപ്പർ ചോർച്ചയ്ക്കെതിരെ തലസ്ഥാനത്ത് മാസങ്ങളോളം സമരം ചെയ്ത വിദ്യാർത്ഥി സമൂഹത്തെ ചേർത്തുപിടിക്കാനും പ്രതിപക്ഷത്തെ കടന്നാക്രമിക്കാനും ബി.ജെ.പി, ശിവസേന എം.പിമാർ പുത്തൻ തലമുറയുടെ ട്രെൻഡിംഗ് സോഷ്യൽ മീഡിയ വാക്കുകൾ സഭയിൽ വ്യാപകമായി ഉപയോഗിച്ചു.(Lok Sabha NEET Paper Leak Debate Gen Z Slang Bansuri Swaraj)
‘ഡെലൂലു’ (Delulu), ‘ക്ലോക്ക് ഇറ്റ്’ (Clock it), ‘ഫോമോ’ (FOMO) തുടങ്ങിയ പദപ്രയോഗങ്ങളാണ് ലോക്സഭാ ചർച്ചയിൽ മുഴങ്ങിപ്പ കേട്ടത്. പ്രധാനമന്ത്രി നരേന്ദ്ര മോദി പരീക്ഷാ സമ്പ്രദായത്തിലെ പ്രശ്നങ്ങൾ കൃത്യമായി മനസ്സിലാക്കിയെന്ന് ചൂണ്ടിക്കാണിക്കാൻ “മോദിജി ക്ലോക്ക്ഡ് ഇറ്റ്” എന്ന് ബി.ജെ.പി എം.പി ബാൻസുരി സ്വരാജ് പറഞ്ഞു. ‘കൃത്യമായി ചെയ്തു/ശരിയായി കണ്ടെത്തി’ എന്നാണ് ഈ വാക്കിന്റെ അർത്ഥം.
പ്രതിപക്ഷത്തിന്റെ പ്രതിഷേധങ്ങളെ പരിഹസിക്കാൻ മൂന്ന് ജെൻ സി പദങ്ങളാണ് ശിവസേന എം.പി ശ്രീകാന്ത് ഷിൻഡെ ഉപയോഗിച്ചത്. സമരം തുടങ്ങിയ ആദ്യ 37 ദിവസം പ്രതിപക്ഷം സ്ഥലത്തില്ലായിരുന്നു (MIA – Missing in Action). പിന്നീട് മറ്റുള്ളവർ ചെയ്യുന്നത് കണ്ട് തങ്ങളും അതിൽ പങ്കാളികളാകണമെന്ന ഭയത്താൽ (FOMO – Fear Of Missing Out) അവർ പ്രധാനമന്ത്രിയുടെ വസതിക്ക് മുന്നിലേക്ക് സമരം മാറ്റി. ഒടുവിൽ വിദ്യാർത്ഥികൾ തങ്ങളോടൊപ്പം ചേരുമെന്ന മിഥ്യാധാരണയിലായി (Delulu – Delusional) അവർ എന്നും ഷിൻഡെ പരിഹസിച്ചു.
രാജ്യത്തെ യുവാക്കൾ തങ്ങൾക്കൊപ്പമുണ്ടെന്ന് കരുതുന്ന പ്രതിപക്ഷത്തേക്കാൾ വലിയ ‘ഡെലൂലു’ വേറെയില്ലെന്ന് ബി.ജെ.പി എം.പി തേജസ്വി സൂര്യയും വിമർശിച്ചു. അതേസമയം, ഗൗരവമേറിയ ഒരു വിഷയത്തിൽ ഡിക്ഷണറിയിലെ വാക്കുകൾ തിരയുകയല്ല വേണ്ടതെന്നും വിഷയത്തിൽ കേന്ദ്രീകരിച്ച് സംസാരിക്കണമെന്നും എൻ.സി.പി നേതാവ് സുപ്രിയ സുലെ ബി.ജെ.പി അംഗങ്ങളോട് ആവശ്യപ്പെട്ടു.
Story Summary
During the Lok Sabha debate on the Public Examinations Amendment Bill 2026, ruling alliance MPs used popular Gen Z slang like ‘Delulu’ and ‘Clock it’ to attack the opposition regarding NEET paper leak protests. The discussion comes following weeks of student demonstrations in Delhi that led to the resignation of Education Minister Dharmendra Pradhan and the introduction of stricter legal penalties for exam leaks.
