ബംഗളൂരു: കർണാടകയിലെ വിജയപുര ജില്ലയിൽ പരിശീലനത്തിനായി ഉപയോഗിച്ചിരുന്ന സ്വകാര്യ വിമാനം തകർന്നു വീണു (Karnataka Plane Crash). റെഡ് ബേർഡ് ഏവിയേഷന്റെ (Redbird Aviation) ഉടമസ്ഥതയിലുള്ള വിമാനമാണ് അപകടത്തിൽപ്പെട്ടത്. പരിക്കേറ്റ ക്യാപ്റ്റനെയും ട്രെയിനി പൈലറ്റിനെയും വിദഗ്ധ ചികിത്സയ്ക്കായി ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമല്ലെന്നാണ് റിപ്പോർട്ടുകൾ.
കലബുറഗിയിൽ നിന്ന് ബെലഗാവിയിലേക്ക് പോവുകയായിരുന്നു വിമാനം. യാത്രയ്ക്കിടെ വിമാനത്തിന് പെട്ടെന്ന് സാങ്കേതിക തകരാർ അനുഭവപ്പെടുകയായിരുന്നു. നിയന്ത്രണം നഷ്ടപ്പെട്ട വിമാനം സമീപത്തെ കൃഷിയിടത്തിലേക്ക് കുത്തനെ വീണു.നിലത്തേക്ക് പതിച്ച വിമാനം തലകീഴായി മറിഞ്ഞ നിലയിലായിരുന്നുവെന്ന് നാട്ടുകാർ പറഞ്ഞു. വലിയ ശബ്ദം കേട്ട് ഓടിക്കൂടിയ നാട്ടുകാരാണ് പൈലറ്റുമാരെ വിമാനത്തിൽ നിന്ന് പുറത്തെത്തിക്കാൻ സഹായിച്ചത്.
സംഭവത്തിൽ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) അന്വേഷണം പ്രഖ്യാപിച്ചിട്ടുണ്ട്. വിമാനത്തിന്റെ യന്ത്രത്തകരാറാണോ അതോ മറ്റ് ബാഹ്യ ഘടകങ്ങളാണോ അപകടത്തിലേക്ക് നയിച്ചതെന്ന് പരിശോധിച്ചുവരികയാണെന്ന് അധികൃതർ വ്യക്തമാക്കി.
