അറ്റ്ലാന്റ: അമേരിക്കയിലെ ജോർജിയയിൽ ഇന്ത്യൻ വംശജയായ മുതിർന്ന ഗൂഗിൾ ഉദ്യോഗസ്ഥയെ ഭർത്താവ് വെടിവെച്ചുകൊന്നു (Google engineer murder georgia). ആക്രമണത്തിൽ ഇവരുടെ മകനും ഗുരുതരമായി പരിക്കേറ്റിട്ടുണ്ട്. ഗൂഗിളിൽ സീനിയർ ടെക്നോളജി എക്സിക്യൂട്ടീവായി ജോലി ചെയ്തിരുന്ന ശീതൾ വ്രസെൻ (57) ആണ് കൊല്ലപ്പെട്ടത്. സംഭവത്തിൽ ഇവരുടെ ഭർത്താവ് കിർക്ക് ബി വ്രസെനെ (56) പോലീസ് സംഭവസ്ഥലത്തുനിന്ന് തന്നെ അറസ്റ്റ് ചെയ്തു.
ചൊവ്വാഴ്ച രാത്രി എട്ട് മണിയോടെ ജോർജിയയിലെ സ്മിർണയിലുള്ള ഇവരുടെ ആഡംബര വസതിയിലായിരുന്നു നാടുനെടുക്കിയ സംഭവം. ദമ്പതികൾ തമ്മിലുണ്ടായ കടുത്ത കുടുംബവഴക്കാണ് വെടിവെയ്പ്പിൽ കലാശിച്ചതെന്നാണ് പ്രാഥമിക വിവരം. വീട്ടിൽ നിന്ന് വെടിയൊച്ച കേട്ടെന്ന അയൽക്കാരുടെ റിപ്പോർട്ട് ലഭിച്ച ഉടൻ തന്നെ പോലീസ് സ്ഥലത്തെത്തുകയായിരുന്നു. പരിശോധനയിൽ ശീതളിനെ വീടിനുള്ളിൽ വെടിയേറ്റ് മരിച്ചനിലയിൽ കണ്ടെത്തി. വീടിന് പുറത്ത് ശരീരത്തിൽ മാരകമായി വെടിയേറ്റ് ചോര വാർന്നുകിടന്നിരുന്ന ഇവരുടെ 23 കാരനായ മകൻ ജെയ്സൺ വ്രസെനെ പോലീസ് ഉടനടി അത്യാഹിത വിഭാഗം ആശുപത്രിയിലേക്ക് മാറ്റി. മകന്റെ നില ഇപ്പോഴും ഗുരുതരമായി തുടരുകയാണ്.
കൊലപാതകം, മാരകമായ ആയുധം ഉപയോഗിച്ചുള്ള ആക്രമണം, അനുമതിയില്ലാതെ തോക്ക് കൈവശം വെക്കൽ തുടങ്ങിയ കുറ്റങ്ങൾ ചുമത്തിയാണ് ഭർത്താവ് കിർക്കിനെതിരെ പോലീസ് കേസെടുത്തിരിക്കുന്നത്. കോടതിയിൽ ഹാജരാക്കിയ പ്രതിക്ക് ജഡ്ജി ജാമ്യം നിഷേധിച്ചു. ദമ്പതികൾക്ക് ജെസീക്ക എന്നൊരു മകൾ കൂടിയുണ്ട്. വഴക്കിനെത്തുടർന്ന് പെട്ടെന്നുണ്ടായ പ്രകോപനമാണോ അതോ ആസൂത്രിത കൊലപാതകമാണോ എന്ന് വ്യക്തമല്ലെന്നും സംഭവത്തിൽ വിശദമായ അന്വേഷണം പുരോഗമിക്കുകയാണെന്നും സ്മിർണ പോലീസ് അറിയിച്ചു.
ഗൂഗിളിൽ എഞ്ചിനീയറിംഗ് ലീഡറായിരുന്ന ശീതൾ രണ്ട് പതിറ്റാണ്ടിലേറെയായി ആഗോള സാങ്കേതിക മേഖലയിൽ തിളങ്ങിനിന്ന പ്രതിഭയായിരുന്നു. ഗൂഗിളിന് മുൻപ് ഹോം ഡിപ്പോ, ദി വെതർ ചാനൽ തുടങ്ങിയ പ്രമുഖ അന്താരാഷ്ട്ര സ്ഥാപനങ്ങളിലും അവർ ഉന്നത പദവികൾ വഹിച്ചിട്ടുണ്ട്. പ്രശസ്തമായ ജോർജിയ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നിന്ന് കമ്പ്യൂട്ടർ സയൻസ് ബിരുദം പൂർത്തിയാക്കിയ ശീതൾ, സ്വന്തം പേരിൽ രണ്ട് സോഫ്റ്റ്വെയർ പേറ്റന്റുകൾ ഉള്ള കമ്പ്യൂട്ടർ ശാസ്ത്രജ്ഞ കൂടിയാണ്. ഇവരുടെ വിയോഗം അമേരിക്കയിലെ ഇന്ത്യൻ സമൂഹത്തെയും ഐടി മേഖലയെയും ഒരേപോലെ ഞെട്ടിച്ചിരിക്കുകയാണ്.
Story Summary: Sheetal Vrasene, a 57-year-old Indian-origin Senior Technology Executive at Google, was shot dead by her husband Kirk B. Vrasene at their home in Smyrna, Georgia. Their 23-year-old son Jason sustained critical injuries in the attack, and the suspect has been arrested on murder charges without bail.
