ന്യൂഡൽഹി: ചൊവ്വാഴ്ച വൈകിട്ടോടെ പെയ്ത കനത്ത മഴയെത്തുടർന്ന് ഗുരുഗ്രാമിൽ ഈ വർഷത്തെ ഏറ്റവും രൂക്ഷമായ ഗതാഗതക്കുരുക്കും പ്രളയസമാനമായ സാഹചര്യവും. റോഡുകൾ പൂർണ്ണമായും വെള്ളത്തിനടിയിലായതോടെ ആയിരക്കണക്കിന് യാത്രക്കാരാണ് മണിക്കൂറുകളോളം വഴിയിൽ കുടുങ്ങിയത്. വൈകിട്ട് 6 മണി മുതൽ 8 മണി വരെയുള്ള രണ്ട് മണിക്കൂറിനുള്ളിൽ മാത്രം ട്രാഫിക് പൊലീസിന്റെ ഹെൽപ്ലൈൻ നമ്പറുകളിലേക്ക് അഞ്ഞൂറോളം അടിയന്തര കോളുകളാണ് എത്തിയത്.(Gurugram heavy rain traffic updates, Heavy Rain Triggers Massive Traffic Jams And Road Cave In At Gurugram NH 48)
വെള്ളക്കെട്ടിൽ പെട്ട് കേടായ 70-ഓളം വലിയ വാഹനങ്ങൾ ക്രെയിൻ ഉപയോഗിച്ചാണ് റോഡിൽ നിന്നും മാറ്റിയത്. സിവിൽ ലൈൻസ്–ഝാർസ റൂട്ടിൽ രണ്ട് സ്കൂൾ ബസുകളും ഹീറോ ഹോണ്ട ചൗക്കിൽ ടെമ്പോ ട്രാവലറും ട്രക്കുകളും അടക്കം കുടുങ്ങിയത് ഗതാഗതക്കുരുക്കിന്റെ ആക്കം കൂട്ടി. ഡൽഹി-ഗുരുഗ്രാം എക്സ്പ്രസ് വേ (NH-48), ഗോൾഫ് കോഴ്സ് റോഡ്, എം.ജി റോഡ്, ഇഫ്കോ ചൗക്ക്, രാജീവ് ചൗക്ക് തുടങ്ങിയ പ്രധാന പാതകളെല്ലാം മണിക്കൂറുകളോളം നിശ്ചലമായി.
ശരാശരി 60-70 കിലോമീറ്റർ വേഗതയിൽ വാഹനങ്ങൾ പോയിരുന്ന എക്സ്പ്രസ് വേയിൽ വേഗത 30 കിലോമീറ്ററായി കുറഞ്ഞു.നർസിംഗ്പൂരിന് സമീപം പൈപ്പ് ലൈൻ നിർമ്മാണം നടക്കുന്ന ഭാഗത്ത് ദേശീയപാതയുടെ (NH-48) ഒരു വശം ഇടിഞ്ഞുതാഴ്ന്നത് സ്ഥിതിഗതികൾ കൂടുതൽ വഷളാക്കി. ഇതേത്തുടർന്ന് ജയ്പൂരിലേക്കുള്ള രണ്ട് ലെയ്നുകൾ അധികൃതർക്ക് താൽക്കാലികമായി അടച്ചിടേണ്ടി വന്നു. കുരുക്ക് ലഘൂകരിക്കാനായി ഡൽഹിയിൽ നിന്ന് ജയ്പൂരിലേക്ക് പോകുന്ന വാഹനങ്ങൾ ദ്വാരക എക്സ്പ്രസ് വേ വഴിയും മറ്റ് വാഹനങ്ങൾ സോഹ്ന റോഡ് വഴിയും തിരിച്ചുവിട്ടു.
മഴക്കാലത്തെ അടിയന്തര സാഹചര്യം നേരിടുന്നതിനായി ഗുരുഗ്രാം ട്രാഫിക് പൊലീസ് 260 അധിക ഉദ്യോഗസ്ഥരെക്കൂടി പുതുതായി റോഡുകളിൽ വിന്യസിച്ചിട്ടുണ്ട്. ഇതോടെ ട്രാഫിക് വിഭാഗത്തിന്റെ ആകെ കരുത്ത് 1500 ആയി ഉയർന്നു. എക്സ്പ്രസ് വേയിലെ തിരക്ക് നിയന്ത്രിക്കാൻ ഓട്ടോറിക്ഷകൾക്കും ഇരുചക്ര വാഹനങ്ങൾക്കും താൽക്കാലിക നിയന്ത്രണമേർപ്പെടുത്തിയിട്ടുണ്ട്. റോഡ് ഇടിഞ്ഞുതാഴ്ന്ന ഭാഗത്തെ അറ്റകുറ്റപ്പണികൾ യുദ്ധകാലാടിസ്ഥാനത്തിൽ പുരോഗമിക്കുകയാണെന്ന് അധികൃതർ അറിയിച്ചു.
Story Summary
Heavy monsoon rainfall brought Gurugram to a complete standstill on Tuesday evening, causing severe waterlogging and a massive 10-kilometer-long traffic jam on major corridors including NH-48. A road cave-in near Narsingpur further worsened traffic flow, forcing the deployment of 260 additional traffic personnel and vehicle diversions to restore normalcy.
