ഇന്ത്യൻ കുടുംബങ്ങൾ തങ്ങളുടെ പൂർവ്വികരുടെ ഗ്രാമങ്ങൾ സന്ദർശിക്കുന്ന രീതിയെ വാനോളം പുകഴ്ത്തി വിദേശ വനിത. തങ്ങളുടെ വേരുകളുമായുള്ള ഈ ആഴത്തിലുള്ള ബന്ധം ലോകം മാതൃകയാക്കേണ്ടതാണെന്ന് സെനിയ കാല എന്ന വിദേശ വനിത തന്റെ ഇൻസ്റ്റാഗ്രാം പോസ്റ്റിലൂടെ അഭിപ്രായപ്പെട്ടു (Foreigner praises Indian culture). വിവാഹം, കുട്ടികളുടെ ജനനം, മുതിർന്നവരുടെ വിയോഗം തുടങ്ങിയ ജീവിതത്തിലെ പ്രധാനപ്പെട്ട ഘട്ടങ്ങളിൽ പൂർവ്വിക ഗ്രാമങ്ങളിലേക്ക് തിരിച്ചുപോകുന്ന ഇന്ത്യൻ ശീലം വലിയൊരു സംസ്കാരത്തിന്റെ ഭാഗമാണെന്ന് അവർ കുറിച്ചു.
തന്റെ ഭർത്താവിന്റെ പൂർവ്വിക ഗ്രാമത്തിലേക്ക് മക്കളെയും കൂട്ടി നടത്തിയ ആദ്യ സന്ദർശനത്തിന് ശേഷമാണ് അവർ ഇങ്ങനെയൊരു കുറിപ്പ് പങ്കുവെച്ചത്. തലമുറകൾക്ക് മുൻപ് കുടുംബം ജീവിച്ചിരുന്ന ഇടങ്ങൾ കാണാനും, നേരിട്ട് പരിചയമില്ലാത്ത ബന്ധുക്കളെ കണ്ടുമുട്ടാനും ഈ യാത്ര മക്കളെ സഹായിച്ചു. 15-ാം നൂറ്റാണ്ടിലെ ക്ഷേത്രങ്ങളും നൂറ്റാണ്ടുകൾ പഴക്കമുള്ള ആൽമരങ്ങളും ഉൾപ്പെടുന്ന ആ ഗ്രാമം തങ്ങൾക്കൊരു പുതിയ അനുഭവമായിരുന്നുവെന്ന് സെനിയ പറയുന്നു.
തന്റെ വളർത്തുരീതിയിൽ വലിയ മാറ്റങ്ങൾ വരുത്താൻ ഈ ഇന്ത്യൻ ശീലം തന്നെ സഹായിച്ചുവെന്ന് അവർ വ്യക്തമാക്കുന്നു. കുട്ടികൾക്ക് കേവലം പറഞ്ഞു കൊടുക്കുന്നതല്ല സംസ്കാരമെന്നും, മറിച്ച് അവർക്ക് അത് അനുഭവിക്കാൻ അവസരം നൽകുകയാണ് വേണ്ടതെന്നും സെനിയ അഭിപ്രായപ്പെടുന്നു. “നമ്മുടെ വേരുകൾ എവിടെയാണെന്ന് കുട്ടികൾക്ക് നേരിട്ട് കാണിച്ചുകൊടുക്കുന്നത് അവരുടെ ആത്മവിശ്വാസവും ഐഡന്റിറ്റിയും വർദ്ധിപ്പിക്കും,” അവർ കൂട്ടിച്ചേർത്തു. സോഷ്യൽ മീഡിയയിൽ വലിയ ചർച്ചയായ ഈ വീഡിയോയ്ക്ക് താഴെ സംസ്കാരത്തെ ഓർമ്മിച്ചുവെക്കുന്നതിലെ പ്രാധാന്യം ചൂണ്ടിക്കാട്ടി നിരവധി പേരാണ് കമന്റുകളുമായി രംഗത്തെത്തിയത്.
