ഫിറോസാബാദ്: ഉത്തർപ്രദേശിലെ ഫിറോസാബാദിൽ വിവാഹാഭ്യർത്ഥന നിരസിച്ച യുവതിയുടെ ഒന്നര വയസ്സുകാരനായ മകനെ അതിക്രൂരമായി കൊലപ്പെടുത്തിയ പ്രതി പോലീസ് ഏറ്റുമുട്ടലിനൊടുവിൽ പിടിയിലായി (Firozabad Child Murder Case). ജിതേന്ദ്ര പഥക് എന്ന വിരാജ് ആണ് അറസ്റ്റിലായത്. ഒളിവിൽ പോയ പ്രതിയെ പിടികൂടാനുള്ള ശ്രമത്തിനിടെ ഇയാൾ പോലീസിനു നേരെ വെടിയുതിർക്കുകയായിരുന്നു. തുടർന്ന് പോലീസ് നടത്തിയ പ്രത്യാക്രമണത്തിൽ കാലിന് വെടിയേറ്റ പ്രതിയെ കീഴ്പ്പെടുത്തി കസ്റ്റഡിയിലെടുത്തു. ഇയാളുടെ പക്കൽ നിന്ന് നാടൻ തോക്കും ജീവനുള്ള തിരകളും പോലീസ് കണ്ടെടുത്തു.
യുവതിയെ വിവാഹം കഴിക്കാൻ പ്രതി നിരന്തരം സമ്മർദ്ദം ചെലുത്തിയിരുന്നതായി പോലീസ് പറഞ്ഞു. എന്നാൽ തനിക്ക് ഒരു മകനുള്ളതിനാൽ വിവാഹത്തിന് താല്പര്യമില്ലെന്ന് യുവതി വ്യക്തമാക്കുകയായിരുന്നു. ഇതേത്തുടർന്ന് കുട്ടിയാണ് തന്റെ വിവാഹത്തിന് തടസ്സമെന്ന് കരുതിയ പ്രതി കുട്ടിയെ കൊലപ്പെടുത്താൻ ആസൂത്രണം ചെയ്യുകയായിരുന്നു. മിഠായി വാങ്ങിനൽകാമെന്ന് പറഞ്ഞ് കുട്ടിയെ വീട്ടിൽ നിന്നും കൂട്ടിക്കൊണ്ടുപോയ പ്രതി കുട്ടിയെ ക്രൂരമായി തറയിലിടിച്ചു കൊലപ്പെടുത്തുകയായിരുന്നു. പ്രതിക്കെതിരെ കൊലക്കുറ്റത്തിന് കേസെടുത്തിട്ടുണ്ടെന്നും ശക്തമായ തെളിവുകൾ ശേഖരിച്ച് കോടതിയിൽ നിന്നും പരമാവധി ശിക്ഷ വാങ്ങിനൽകാൻ നടപടികൾ സ്വീകരിക്കുമെന്നും ഫിറോസാബാദ് സിറ്റി പോലീസ് സൂപ്രണ്ട് രവിശങ്കർ പ്രസാദ് അറിയിച്ചു.
Summary: A man named Jitendra Pathak, alias Viraj, was arrested in Firozabad, Uttar Pradesh, after a police encounter for brutally killing a one-and-a-half-year-old child. The accused committed the crime after the child’s mother rejected his marriage proposal, stating her son was her priority. Viraj was injured in the leg during the exchange of fire with the police and is currently in custody facing murder charges.
