ബക്സർ: ബീഹാറിലെ ബക്സർ ജില്ലയിൽ പരീക്ഷാ പേപ്പറുകളുടെ കെട്ടുകൾ മഴവെള്ളത്തിൽ ഒഴുകിനടക്കുന്നതായുള്ള വീഡിയോ ദൃശ്യങ്ങൾ സമൂഹമാധ്യമങ്ങളിൽ വൈറലായതിന് പിന്നാലെ, ആരോപണങ്ങൾ തള്ളി വിദ്യാഭ്യാസ വകുപ്പ്. സ്കൂളുകളിലേക്ക് ചോദ്യപ്പേപ്പറുകൾ വിതരണം ചെയ്യുന്നതിനിടയിൽ അപ്രതീക്ഷിതമായി പെയ്ത മഴയ്ക്കിടെ എടുത്ത ദൃശ്യങ്ങളാണ് തെറ്റിദ്ധരിപ്പിക്കുന്ന രീതിയിൽ പ്രചരിപ്പിച്ചതെന്ന് അധികൃതർ വ്യക്തമാക്കി.(Education Department clarifies on viral video of exam papers in Bihar)
ജൂൺ 27-ഓടെ ജില്ലയിൽ എത്തിയ ചോദ്യപ്പേപ്പറുകളും ഉത്തരക്കടലാസുകളും സുരക്ഷാ മുൻകരുതലിന്റെ ഭാഗമായി രാജ്കിയ ബുനിയാദി വിദ്യാലയത്തിലേക്ക് മാറ്റിയിരുന്നു. തുടർന്ന് ജൂൺ 30 മുതൽ വിവിധ സ്കൂളുകളിലേക്ക് ഇവ വിതരണം ചെയ്യുന്നതിനിടയിലാണ് ശക്തമായ മഴ പെയ്തത്. ഈ സമയത്ത് പാക്കറ്റുകൾ വാഹനങ്ങളിൽ കയറ്റുന്നതിനിടയിലാണ് വീഡിയോ ചിത്രീകരിച്ചത്. ദൃശ്യങ്ങളിൽ കാണുന്നത് പോലെ പരീക്ഷാ പേപ്പറുകൾ വെള്ളത്തിൽ നശിച്ചിട്ടില്ലെന്നും, എല്ലാ പാക്കറ്റുകളും സുരക്ഷിതമായി അതത് സ്കൂളുകളിൽ എത്തിച്ചതായും അധികൃതർ അറിയിച്ചു.
പരീക്ഷാ പേപ്പറുകൾ വെള്ളത്തിൽ കിടന്നത് അശ്രദ്ധ മൂലമല്ലെന്നും, സമൂഹവിരുദ്ധ ശക്തികൾ വിദ്യാഭ്യാസ വകുപ്പിനെ അപകീർത്തിപ്പെടുത്താൻ ബോധപൂർവ്വം വ്യാജവാർത്തകൾ പ്രചരിപ്പിക്കുകയാണെന്നും ഉദ്യോഗസ്ഥർ ആരോപിച്ചു.പരീക്ഷാ നടത്തിപ്പിൽ യാതൊരുവിധ വീഴ്ചയും സംഭവിച്ചിട്ടില്ലെന്നും, നിശ്ചയിച്ച പ്രകാരം പരീക്ഷകൾ സുഗമമായി തന്നെ നടന്നുവെന്നും അവർ കൂട്ടിച്ചേർത്തു. ചോദ്യപ്പേപ്പറുകളും ഉത്തരക്കടലാസുകളും അടങ്ങിയ പാക്കറ്റുകൾ സുരക്ഷിതമാണെന്ന് ഉറപ്പുവരുത്തിയ ശേഷം മാത്രമാണ് വിതരണ നടപടികൾ പൂർത്തിയാക്കിയത്.
Story Summary
The Bihar Education Department has dismissed social media reports claiming that examination papers in Buxar district were destroyed by rain, clarifying that the viral video captured a routine distribution process disrupted by a sudden downpour. Officials confirmed that all examination materials remained safe and secure, and that the exams were conducted without any interruptions or irregularities.
