ന്യൂഡൽഹി: ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ പുതിയ പ്രസ്താവനയെച്ചൊല്ലി പ്രധാനമന്ത്രി നരേന്ദ്ര മോദിക്കെതിരെ കടുത്ത വിമർശനവുമായി കോൺഗ്രസ്. ഗാസയിലും ലെബനനിലും ഇസ്രായേൽ നടത്തുന്ന സൈനിക അധിനിവേശങ്ങളിൽ പ്രധാനമന്ത്രി പുലർത്തുന്ന ‘കല്ല് പോലുള്ള മൗനം’ ഇന്ത്യയുടെ പാരമ്പര്യ മൂല്യങ്ങളെ ഒറ്റിക്കൊടുക്കുന്നതാണെന്ന് ജയറാം രമേശ് കുറ്റപ്പെടുത്തി. പുരസ്കാരങ്ങൾക്ക് വേണ്ടി ദാഹിക്കുന്ന സ്വയം പ്രഖ്യാപിത ‘വിശ്വഗുരു’വിന്റെ ഈ നിലപാട് ഒട്ടും നീതീകരിക്കാനാവാത്തതാണെന്നും കോൺഗ്രസ് പ്രസ്താവനയിൽ വ്യക്തമാക്കി.( Congress Slams PM Modi Silence on Netanyahu’s statement )
അമേരിക്കൻ വൈസ് പ്രസിഡന്റ് ജെ.ഡി. വാൻസിന്റെ പ്രസ്താവനയ്ക്ക് മറുപടി നൽകവേ, തങ്ങൾക്ക് ഇന്ത്യ ഉൾപ്പെടെയുള്ള രാജ്യങ്ങളുടെ വലിയ പിന്തുണയുണ്ടെന്ന് നെതന്യാഹു അവകാശപ്പെട്ടതാണ് പുതിയ രാഷ്ട്രീയ വിവാദങ്ങൾക്ക് വഴിവെച്ചത്. എന്നാൽ നെതന്യാഹുവിന്റെ ഈ പ്രസ്താവന പൂർണ്ണമായും തെറ്റാണെന്ന് ജയറാം രമേശ് തിരിച്ചടിച്ചു.
“നെതന്യാഹുവിന് തെറ്റിദ്ധാരണ പറ്റിയതാണ്. ഇസ്രായേൽ ഒരുപക്ഷേ മോദിയുടെയും അദാനിയുടെയും കോർപ്പറേറ്റ് സാമ്രാജ്യത്തിന്റെ ഭാഗമായിരിക്കാം, നരേന്ദ്ര മോദി ഇസ്രായേലിനോട് അന്ധമായ ഭക്തി പുലർത്തുന്നുണ്ടാകാം. എന്നാൽ കോടിക്കണക്കിന് വരുന്ന സാധാരണ ഇന്ത്യക്കാർ ഗാസയിലെ കൂട്ടക്കൊലയെയും പലസ്തീനികളെ ആട്ടിയോടിക്കുന്നതിനെയും ലെബനനിലെയും ഇറാനിലെയും ഇസ്രായേലിന്റെ ക്രൂരമായ സൈനിക അധിനിവേശങ്ങളെയും ശക്തമായി അപലപിക്കുന്നുണ്ട്. മാനവികതയ്ക്ക് നേരെയുള്ള ആക്രമണമാണിത്,” ജയറാം രമേശ് എക്സിൽ കുറിച്ചു.
ലോകരാജ്യങ്ങൾക്കിടയിൽ ഒറ്റപ്പെട്ടുനിൽക്കുന്ന നെതന്യാഹുവിൽ നിന്ന് സർട്ടിഫിക്കറ്റ് ലഭിക്കുന്നത് ഇന്ത്യക്ക് അഭിമാനമല്ലെന്നും, വൈറ്റ് ഹൗസിലെ മോദിയുടെ നല്ല സുഹൃത്തായ യു.എസ് പ്രസിഡന്റ് ഡൊണാൾഡ് ട്രംപിന് പോലും നെതന്യാഹു ഇപ്പോൾ നിരാശയാണ് സമ്മാനിക്കുന്നതെന്നും കോൺഗ്രസ് നേതാവ് പരിഹസിച്ചു.
Story Summary
The Congress party heavily criticized PM Narendra Modi over his “stony silence” on Israel’s military actions, calling it a betrayal of India’s ethos. The attack came after Israeli PM Benjamin Netanyahu dismissed US VP J.D. Vance’s claim on his Facebook page. Congress leader Jairam Ramesh countered that while Modi may be devoted, crores of Indians strongly condemn Israel’s actions in Gaza and Lebanon.
